WWW.TUNGZANGNEWS.COM

 
Kawlgam Zinna: Sep leh Bawlte Pulaakna

Tokyo: March 7-10; ZCF ah Hun zang
March 6, 2014 ni-in Tulsa pan ding khia in, Tokyo khuapi ah zan 3 taam hi. March 9, 2014 ni nipi-in Zomi Christian Fellowship ah hun zang hi. Mitampin ki lamthakna ngah uhhi.



Yangon: March 10 - Soccer Meeting
March 10, ni-nitak 5:30pm in, Yangon Airport cidam in tungin, 6:30pm Millionaire Coin Resturant ah Dr. Zam Boi leh a nau, Do Khup (CEO-Chin United) te toh Soccer (Football) tawh kisai, mailam ah khangno te pattah zia, kalsuan zia ding leh sep zia dingte kikum khawm thei uhhi. Tua bek thamlo, Dong Khup zong Siapa sapna sangin, May 24 & 26 ni-in, Tulsa khuapi a, Soccer kidemna a 4 veina (Myanmar World Cup – 2014) ah zong a zi tawh hong zin thei ding uhhi cih zong za sawnsawn ii hih manin lungdam huai mahmah hi.



Mandalay: March 11- 17; Southeast Asia Bible College Graduation
March 11 ni nitak flight toh Mandalay zinto suak in, March 12-14 sung sangnaupang te lai ka hilh hi. March 15 ni 1pm in, Sangnaupang 9 te’n buaih la hi. Hih graudation ah Norway gam Stavanger khuapi a om Northsea Baptist Pastor sem Rev. David Fresch te nupa leh Rev. Pum Za Chin te zong hong ki hel thei uhhi. Rev. David in, graduation speaker sem hi. SEABC sangpi ii kum 10 cin na lungdam kohna zong ki nei a, Board members 7 teng zong pahtawina Medal ki pia hi. Kum 10 sungin, hih sangpi pan in, sangnaupang 50 in, buaih la khin uha, hih sangnaupang te in, Mandalay khua kiim a om kawl mi nam te lak leh Shan minamte lak ah hangsan tak- in, Pasian na sem uhhi. Pawl khatte Tamu, Musee leh shan gam muntuamtuam ah na sem uhhi. March 14 ni in SEABC Alumni Association zong ki pan khia thei hi. Hih Alumni Association ah sang pan buaih ngah masa mi 7 lak pan 4 zong hong ki hel thei uh ahih manin lungdam huai mahmah hi.



Kalay Myo: March 18-20; Global Myanmar Ministers’ Alliance Conference 2014
Zogam a dingin Global Myanmar Ministers’ Alliance Conference 2014 pen Galillee pawlpi ah ki phualsep in a zang, akham pan pawlpi tuamtuam a Pasian na sem mi 350 tang hong ki hel thei ahih manin lungdam huai mahmah ki sa hi. Hih hun sungah : Dr. Kham Khan Khai (Sia Khaipi), Rev Pau Khan Khai, Dr. Zam Boi, Rev. David Fresch leh Rev. Pum Za Chin ten thusinna nei uhhi. Zan 3 sung Crusade ki nei a, Sia Kam Hau toh thu genna ka nei uha, mi tampi-in khalam kilam thakna ngah uhhi. Conference siim dingin, Tonzang/Cikha pan 17, Tedim pan 28, Tamu/Khampat pan 18, Thuklai pan 17, Kawlpi uk sung pan 29, leh Kawlpi khua sung pan 209 tengin, kipat ni lian in minkhum uhhi. A nung tun zong honkhat om ahih manin Pasian na semten hanciamna nei mahmah uhhi. HIh conference sungin aki sem khia pawlkhatte hih a nuai a bangin kong pulak nuam hi.



DONGHU KIPAWLNA: Ministers’ Welfare Association (Ministers’ Care Program)
1. Hih conference sungah Pasian na semte khat leh khat pawl deidan omlo in, ki panpih, kihuai theih ding lunggulhna tawh Pasian na semte Donghu kipawlna- Ministers’ Welfare Association zong Makai siate toh abei sa kum 3 lai aki sem sate ka gen uhhi. 2011 kum in, Tahan a Fuller pawlpi kem sia Hau hong sihna ah hih kipawlna in, teng 2 leh alang a ki piakna thu Sia Pau Khai in gen a, Zangkong pan hong pai Dr. Zam Boi in, Sia Mang Sian hong nusiatna hang ah, a innkuan pihte hih ki pawlna pan teng 2 leh alang mah tawh a zi a tate huhna ki piakna thu gen uhhi.
2. Hih Donghun ki pawlna hoih ki sa in, Sumbul ding ki dong pah a, teng sawm nih kiim bang ki ngah in, Pasian na sem te khat leh khat kikhual ding thupi sak na ki lang sak mahmah uhhi.
3. Ministers’ Welfare Association ah kum 3 sung vaivan dingin mi 9 ki seh pah hi. Zogam teng a dingin Kawlpi pen a phual pi dingin ki seh hi.
4. Hih ki pawlna ah Kawlpi phualpi a thuvanpi ding leh ki zop na dingin: Rev. Thawng Do Thang (Galilee Church), Rev.Cin Lian Sum (Emmanuel Baptist Church), Dr. Hen Khan Go (ZBCM- Tahan) te ahi uhhi. Tua ban ah Tedim pan nih, Tonzang pan nih, Cikha pan khat, leh Tamu pan khat cih bangin, tavuan nei ding siate kiseh hi.
5. Kum sim in, Pasian na semte’n Kyats 5,000 tawh kipawlna sum khia ding uhhi. Innkuan pihta ding zong khiat sak thei hi.



ZOMI ENCYLOPIDIA
1. Rev. Pum Khan Nang zong hih khawmpi ah hong ki hel theia, ii gam leh ii minamte adingin deih sakna tawh a sep- Zomi Encylopidia thu hong gen a, thupi ki sa in, a laipei nading mantang sum donna ki neih sak pah a, teng 6 kiim mah ki ngah sak thei ahih manin lungdam huai mahmah hi.
2. Mai lam ah Sia Pum Khan Nang lai bawl pen Zomi bup ading in, ki mu ahih manin, Vol 22. a, ii neih khiat zawh nading in, thungetna leh hanciam pih theihna a om bang tawh manawtpih ding hih conference aki hel siapi ten lunggulhna lianpi ki nei hi.


Zin Hong Hawh-Special Guests: Dr. Thang Za Tuan & Comedian Kam Khen
1. Dr. Thang Za Tuan in, Pilna a thupitna thu hong gen hi.
2. Pu Kam Khen in, Lai siangtho zui a, theih ding thutawm hong gen hi.



Kalay Myo: March 21; ZOFA leh ZYA te toh Kimu
March 21 ni zing 8am in, Sia Kam Hau toh Zomi Youth Association te zum ah makaite leh Zofa makaite tawh ki muhkhopna niangtui hawpkhopna ka nei uha, mailam ah Zomi khangthak te ki lamkaih zia ding leh Football lam ah koi ci bangin ii khangno te pantah, lamlah dingdan zong ka gen uhhi. Tua baan ah, Tulsa khua a pawlpi Myanmar Christian Church - Sport Ministry pan ZOFA te maikum football game sponsor piak dingin zong ka kamciam hi. Tua khitciang in, Sia Kam Hau in,thungetna neih sak hi.



Mandalay: March 21-23; Paradise Mission Center
Mandalay kuam a om Pasian na sem siapi 5 te toh zong ki mu in, Donghu vaina sepna aki nei sa pen hoih tak phuah pha in, sep dingin geelna ki nei hi. Sang vai pawl khat zong van in, Paradise Mission Center ah thugen na ka nei thei hi.



Yagon: March 21-25; Zolus Meeting
Zangkong ah ni 5 kiim ka om sungin, lawm leh gual pawl khat tawh ki muh khop theihna nei in, Zolus makaipi te tawh March 24, ni sun an nekhawm in, mailam na sep zia ding holim na ka nei khawm thei uhhi. Tua hun sungah, Dr. Thang Za Tuan, Rev. Khoi Lam Thang, Rev. Ngul Cin Thang leh Dr. Paupi te hong kihel thei uhhi.



Thailand: March 26- Apri 1, Umphiem, Nupo, Bangkok
March 26 ni in, Yagon pan Maesot ah Nok Airline toh zin in, sanggam u leh nauten na dawn thei uhhi. Umphiem Refugee Camp ah zan 3 taam in, Nupo Camp dong va pha in, ii mi ii sa haksatna thuakte thapia in, ka vahawh thei hi. Hih Umphiem ah pawlpi te kiangah hun ka zatni in, Karen nupi ta nih nei khin Daw Janet in nak siluang natna pan damna hong ngah hi.



Umphiem ah Damna: March 27, 2014
Hih Umphiem pawlpi te kiangah hun ka zatni in, Karen nupi ta nih nei khin Daw Janet pen, a nak pan siluang den in damna ngah hi. Sanno in, lai hong khak na ah;
“Pa Khai aw, Nipi ni a thu nanget sak Daw Janet (Kum 30) pen 2005 kum a kipan a nakpan si a luangluang hi. Tun kum 10 bang pha ta hi. Maesot Zatopi ah khasim in camp pan a kipuak den hi.(Camp leh Maesot pen nai 1 leh alang motor ki hawl hi.) Nong pai nipi ni thu na nget sak aki pan a dam siang hi. Tun Maesot zato pai kul nonlo hi. Tun a cidam sinsen in, zong thau mahmah ta hi.”



Bangkok ah zan khat taam in, April 2 ni zingin US zuan in kong ciah kik a, April 2, ni 5:30pm in Tulsa khuapi cidam in kong tung kik thei hi. Hih bang gualzawhna hong pia Pasian hehpihna nakpi ii phat hi.



Global Myanmar Ministers’ Alliance Conference – 2014 ading Mapang khawmte (Partners)
1. Myanmar Christian Church, Tulsa, Oklahoma
2. Myanmar Zomi Baptist Church, Tulsa, Oklahoma
3. ZBCM of Tulsa
4. Zomi American Church, Kansas City, Kansas
5. Zomi Community Church, Nashville, Tennessee
6. Zomi Myanmar Baptist Church, Bowling Green, Kentucky
7. Myanmar Mission Church, Hollywood, Florida
8. Chicago Zomi Community Church
9. Mauituang Gihar Restaurant, Tulsa, Oklahoma: Pa Kaipi & Nu Vung Lun Cing
10. Tuikhal Sushi Company: Pa Thawnpi te innkuan
11. Siansiam Sushi Company : Pa Suan Mang te innkuan
12. Siama Vung Prayer Group te leh Pa Tung te innkuan leh mimal tampin hih na sepna ah ma hong pan pih uh ahih manun lungdamna lianpi om hi ci-in i ciam teh hi.



Global Myanmar Ministers’ Alliance Conference – 2014 ah Pahtawina Ngah Siapite
Hih pahtawina ah Rev. Pau Khan Khai in, mimal te min sim in, Kalay Mayor Pu Kham Lian Khai in, pahtawina Laipi leh sum teng khat ta in kei ma tungah hong pia in hih pahtawina ka pia uhhi. [Hih pahtawina pen Tuikhal Sushi Company in tavuan la hi.]
1. Rev. Dr. Go Za Kham ( atapa Tuang in, sang hi.)
2. Rev. Dr. Kam Khaw Thang (a ta nu in sang hi.)
3. Rev. Zam Khaw Lian


Minsters’ Care Program: Ministers’ Welfare Association
Kalay Center: Zomi Land Region
2011 kum in, aki nei khin sa hi in, Rev. Pau Khan Khai in, hong makaih to a, a ma hong makaih sungin, Tahan Fuller Sia Hau hong nusiat in, Kyats 250,000 toh a innkuanpihte huhna ki pia hi. Pasian nasem te’ DONGHU kipawlna aom khin sa pen, tukum ciang in, mipi lunglutna dungzui in, ki semto suak a, hih anuai a bangin, a khuakhua a tavuan lading in ki seh thak hi.



Kalay Center: Chin State and Upper Chindwin Region
1. Rev. Thawng Do Thang, makaipi, (Galilee Church, Kalay)

2. Rev. Dr. Hen Khan Go, Lai atpi, ( ZBCM, Tahan )

3. Rev. Cin Lian Sum, Sumkempi, (Emmanuel Baptist Church, Kalay)

4. Rev. Suan Kho Zam, member, (BCM, Tedim )

5. Rev. Thang Ngaih Mang, member, (AG, Sakollam)

6. Rev. Hang Khan Nang, member, (AG, Thuklai)

7. Rev. Kai Suan Pau, member, (Shalom Church, Tamu)

8. Rev. Khen Biak Lian, member (Cauleng AG, Cikha)

9. Rev. Kulh Mung, member, (AG, Tonzang)

Mandalay Center: Central Region of Myanmar
Hih Kawlgam laizang lam ah, Donghun kipawlna dingin, hih nuai a, makaipi te ki seh thak hi.
1. Rev. Dr. Kam Cin Hau, makaipi, Paradise Mission Center, Mandalay
2. Rev. Khin Maung Thin, Makaipi Thuap, Living Water Church, Mandalay
3. Rev. A Thang, Sum Kem, Good News, Mandalay
4. Rev. Mung Mung, Lai atpi, AG, Mandalay
5. Rev. Thang Sian Khup, ZBCM, member, Mandalay



Yangon Center: Southern Region of Myanmar
Hih ki pawlna pen Zakong khuapi ah 2012 kum in ki pan khia hi. (hih ki pawl na in, Sia Mang Sian Thang hong nusiat na ah, 250000 kyats tawh a zi a tate tung huhna ki pia hi.)
1. Dr Nyunt Lah, Makaipi, (Ambassador International )
2. Dr. Suan Za Pau, makaipi Thuap, (Word of Hope)
3. Rev. Thang Nai, Lai atpi (Presbyterian)
4. Dr. Go Chin Zam, sum kempi, (OM)
5. Rev. Sawm Lian Pau, member, (Agape Orphanage)



Lungdam Kohna : Standing Committee te leh Galillee Pawlpi Tungah 
Global Myanmar Ministers’ Alliance Conference – 2014 a nih veina Zogam ading bawl na-ah, Thumlo, taulo in, vai teng hong na van sak City Mayor Pu Kham Lian Khai, Rev. Thawng Do Thang, Committee member teng leh a biakinn itlo in, Pasian na semte adding hong phal Galilee pawlpi tungah ahi zongin, a hun hong pia thei, Rev. David Fresch te nupa, Rev. Pum Za Chin, Dr. Zam Boi, Rev.Dr. Kam Hau, Rev. Pau Khai te tungah ii lungdam na lian mahmah hi cih thu ii pulaak nuam phapha hi.

Tua ban ah, Conference hun khempeuh a motor uh it siiklo tak a hong zang sak, Pa Pau leh Siama Ciin (Siampi te innkuan) tung leh, Nahnuai ka pai nadingin, a motor hong zangsak, hong hawl sak sia Do Khup tungah zong lungdamna lian lua hi cih zong kong pulaak sawnsawn nuam lai hi.



2017 kum ciangin GMMA conference bawl kik dingin geelna om khin hi. Tua hun ciangin Pasian leh ii gam adingin, mapangkhawm ciat lai dingin kong zawn sawnsawn nuam lai hi.



http://mcctulsa.com/blog/zomi/49-kawlgam-zinna-sep-leh-bawlte-pulaakna
link ah zong ki en thei ding hi.

Lungdamna lianpi tawh,



Pastor Kham Khan Khai (Sia Khiapi)
President
Global Myanmar Ministers’ Alliance



 


Comments




Leave a Reply