WWW.TUNGZANGNEWS.COM

 
Kamin Rev. Lian Khan Hau (Sia Haumeng) hi-in, kazi min Gin Sian Vung ahi hi. Tanu khat kanei uh-a, amin Man Zam No hi-in, amah’n tanu khat nei-a Niang Deih Lam ahi hi. Ka kum 72 phata-a, Tamu gam Namuntha khua-a Agape EBC pawlpi ah pastor ka sem hi.
Kazi, ka tanu le ka tunu tawh thopuan khat sungah ka lum uh hi. Ka inn uh pen anuai, 24' X 18' hi-a, dei tungnung pen, 16' X 9' ahi hi. Ka innkuan un dei tungnung-ah a lum kahi uh hi.


23 March 2014, zingsang nai 3 pawlin ka inn uh kek in deng hi. Bomb ging bangin aw ngaih mahmah khat in hong phawng-a, ka dip uh kua mahmah hi. Ka zi in kek’ khuavak mu-a, ka khaan sung uh meikhu tawh kidim vat hi.

Ka pata tengun cihna ding ka thei kei uh-a, ka tuno uh ka et uh leh, amah a ihmu lua pen,a si kasa uh hi. Datmei de ding ka cih leh na kisia hi. Zingsang khuavak ding ka ngaklah mahmah uh hi. Zingsang ciangin Pasian hong kepzia nasia takin kamu hi.

Ko lupna tungah Solar panel khat tawh solar tha ka lakna uh meikhau zui-in, kek in hong deng na hi gige mawk hi. Ka lupna tungsan uh ah, mei bulb zong kisia in, kek in meikhau zuisuk ahih manin, inn nuai-ah, mei bulb zong na kisai bek tham lo, meibulb khaina khuam keksuk mang-a, khuambul (taan-pha-nat) puak kham hi.

Anbuk a mei bulb zong kisia-in, meibulb kingakna khuam kikek suk a, khuambul (taan-pha-nat) zong puakkham hi. Innsunga om, electric tawh kisai ka van neih khempeuh uh kisia mang hi. Ka radio kisia, datmei kisia, nai cihte kisia mang hi.

Khabei ciangin Tamu Bank ah pension kava thoh leh, ka pension card in computer ah bangmah laklo –a, nasemte’n lamdang sa mahmah uh hi. Kek vai ka gen leh kek hangin kisia hi ci uh-a, hong siauhsak kik uh-a, ka ngah nai kei hi.

Innkhum tung kava et leh ka dipkua mahmah hi. Sikkang dal 24 kisia hi. Kek in hong den ciangin sikkang teng kilawn to-a, sikkang kilhna bil phukham gawp hi. Mun khatkhat ah sikkang zawl kilongkhia hi. Sikkangte sawigawp, thep gawp-a, vang mang in, dal 24 khek kul hi.

Hih banga thakhauh kek denna innsungah Pasian in hong kem hi, ci-in Pasian hong kepna teci ka pang hi. Palik pension ka hi-a, palik ka sep lai-in zong Pasian in thautawimigilo te khutpan hong suakta sak hi. Gamlak-ah sa kabet lai-in ngal hapak khutsung pan zong hong suakta sak-a, gun-ah tuikhia-in sidek takin Pasian in hong suakta sak hi.

1979 kumin tuikhuk lui ka khuah leh hong kicim-a, lei in hong vuk gawp-a, Pasian in hong kem ahi manin kasi kei hi. Kek den innsungah Pasian in ka innkuan uh bittak-in hong kepna kalung damlua hi.

Rev. Lian Khan Hau
Church Pastor, Agape EBC 
Namuntha Village, Tamu Township.

Phone: 0949225786


 


Comments




Leave a Reply