WWW.TUNGZANGNEWS.COM

 
Khatvei zankhat kalung khamna thu;

Nikhat Pawlpi mite khat in hong call in nitakteh hun hongzat pih in hong ci hi. Kei zong kasang pah hi. Kei bek pai ding pen hunlem theilo kasa aa, Laisang pa tawh Thuzeekpipa tawh hongzui thei ding khangno te ka zawn hi. Nitak ci ahih man leh nitak lam hun lem ngah ka hih man in lawmte teng tawh 7:30 hun in pawlpi te hong sap na lam zuan in kapai hi. Kalam paipai laitak in Japan pan Sya Mang tawh ka hihoho thei uh hi.

Ka paina vai uh pen siatveh ding thu ahihi. Hong kisapna phual ka tun uh teh innteek ten hong muak ngei ngai uhi. Tuivot khum kilkel hongpia sawnsawn uh hi. Tua teh hun bawl kipan in Pasian minphatna kabawl uhi. Hun bawlbawl laitak in Zomi tampi omna Malaysia Khuapi sung Mentary Court ah Oparasi lut cih lai hong kikhak hi. Kalung nop loh khat hong kipan lian hi. Ko lah Pawlpi tengtawh Pasian phatna leh kiheh nepna te lasa thugen in ka buaisan laitak uh ahihi.

Hunpi teng ka man uh teh Malaysia O vai mah ka lung nuam lo in' online ka hon pah leh thu hoih lua lo ahihman in kikhopna phual ah omding cih thu hong deihsak pawlpi te in hong vaikhak zuahzuah uh hi. Hunpi pen 11:10 pm in kiman hi.

Ciah ding in innpua lam ka pusuak ta uh hi. Innteek te tawh byebye ka ki piapia ta uh hi. Innnuai ah Paak huan khat na om a, Paak hoih nono te lak ah tutna nuam mahmah tung ah Laisang pa leh Khangno te tawh ka tu khawm uhi. Pasian thu khantoh sak nading ka holiim uh hi.

Tua leh hun hongpaitoto in zingsang lam nai 2 hongsak ta hi. Thu zeek pi pa in 7/11 sai ah avot honglei in ka dawn khawm liailiai uh hi. Tualai tak ka ngal langkhat lam vuah Na siatak in la hong kisa kaza uh hi. Zomi te lasak na Home cell bawl na hi gige a, Topa hoih hi cih la asa uhi. Tua hun in zingsang nai 2: 27 hi tahi. Kuamah lah kitho nailo mi khempeuh lah imut sip dide laitak hi a, ka ngamlum ngam het kei uhi. Ko lawmte teng tawh mi 6 kapha uh a, tawm vei Laisang pa leh Makai huh pa in tua ka tutna uh ah hong itmut san pianpian in alususu ta uh ahihi.

Zingsang nai 3:00 hongsat khit teh Ka paam lam uh pan atha kicing simsim pasal khat meitang liim ah hongpai a, koteng tut khop na lam hong zuan pheiphei hi. Kua hiam cih mi kitheilo pa hong paipai a, katut khopna mai hong tun tak teh adeihtaktak in leituan lanlan kawmsa in apai hi. Maan kazaih nuam gige hi. Ahih hang aheh khak ding leh hong theih ding kalau pian hi.

Tua khit asawt lo in Malaysia omte in Pute acih te uh Pyramid lam ah lut cih thu online pan kazak leuleu khit deuh lian in Den a, Hongpai mi dang khat pa hong kileh kik ka mu hi. Ko teng omna lam hong zuan phei kik leuleu a, Ka nung uh ah 24 hunsung akihong sai 7/11 ( Seven Eleven) sung alut ka mu hi. Tua pan hong pusuah kik a, tuitawlpi khat atawi kawm hi. Lam apai teh deihtaktak in tuan daamdaam kawmsa in apaihi. Ka nung uh hong tun teh deih tak in atui thawl tawi lei deng a, nasia tak in hong awng lele in (Mau Matti aa) ci beba hi.

Tua a awtbeba ( Mau Matii aa) acih laitak amai ah mivom khat apai tawh kituak in tua mivom pa tawh hong ki en in kisaal gega tuak uhhi. Tua leh Mivom pa in paisan ding akithawi laitak' Tua a awng beba pa in a awm pan man in Mau Matii a, acih kik dihdih leh hong kibuan pah tuak uh hi.

Misek sol pa in tum taptap in buan vatvat khit teh apuan hong suah sawnsawn hi. Zingsang lam nai 4 sat nuam hita hi. Aban tha saal in akhut tum zial teta a, Hymmmmmmm! Ciaaaaa! cihi. Paak kung ngei akiphut sing hongbot khia in Molhtum in zang/ tawi kawmsa in mivompa sat ding hong delh zanzanhi. Hong ki uum vava in a omlai tak un' Alangkhat khuazing kawm sung khatpan in Numei aw tawh hong pau khat om a, Abangci ,note nih Abang ci, note nih abangci hong cilala ka za uh hi. Tua teh Eh hei Zomi pau hisi e ka ci uh hi.

Tua numei hongpai tai phei in akilai vanvan Pasal nih te ngei ah hong ding phei a, beer thawlpi khat tua numei nu in tawi kawm sa in " Khawl sinvua , Khawl sin vua ci hi. Tua leh mivom india minam khat hong pai leuleu in Tua mivom India minam khat pa in (Apahal dua orang kadaw , Apa hal duaorang kadaw), Saya call police ci in aphone amek zuahzuah ta hi. Tua leh ko tutna lam ah hong kibuan phei valval uh a, Makai huh pan in eimi hikha ding um ing ci in ding to a Khawl sin vua acih depdap leh 7/11 a tui tawl leii pa Zomi na hi dihdih tak pi in Laulo laulo si ngam hongcih suah lela zen hi.

Tua hong cih teh Zomi ahih lam kitel mahmah ta a, Numei beer thawlpi tawi nu lah Zopau in pau ahih teh a kinupa ahi kha ding in ka um pian uhi. Ahih kei leh lah tua numei nu hang in hih pasal te nih nakituh in kilai hi gelgel in ka um hi. Pian tuak kei ei ci in Laisang pa in hong mit heem in taxi nih sap in katai san vingveng uh hi. Tua hun in zingsang nai 4 asat khinta hi. Bang acite zen tam ci in tua zan kalung akham sim gige hi.

A kitawng te phelh ding lah kithei ngei hilo, Taisan ding hun teh lah Zomi hi sese, Omlai ni cileng lah mivom khat in palik te sam khin. Kalaisai gamdang pai hibang lawmlawm ki omta' Cih ka ngaih sutsut kawm sa in kakam pan in Pasian aw kacih khia kha a, kakhi tui hong luang detdet zen hi.

Hau Thang

 


Comments




Leave a Reply