WWW.TUNGZANGNEWS.COM

 
Kong it Leitung bup a om Zomite khempeuh aw, 

Na omna munmun tek pan un Pasian thupha sangin daihna leh lungdamna thupha a ngah dingin thupha kong paih masa hi. 

A beisa March kha sung a Tedim Khuapi ah akibawl GZA Makaite A (2) veina Khawmpi nuamtak leh lawhcing takin kizo ahih manin hong makaih Pasian tungah lungdam thu i ko hi. Kei pumpi ahih leh cidam loh na hangin ut pipi-in kaki hel thei kei hi. A hizongin tua khawmpi video te cimtheilo in ka-en ka-en a Pasian hong ompihna leh makaite hong makaih siamnate ka mit in mu kahih manin lungdamna lianpi kanei hi. 

Tu-in GZA vaitawh kisai-in anuai-a bangin Leitung Bup Zomite tungah thu kong zasak hi. 

1. Zomi khempeuh ZOMI  kici i minam min sungah kipumkhat dimdiam ihih manin Pasian min i phat hi. Hihin miphung khat leh pau awkaih khat peuh suksiat nopna leh valhtum nopna hipeuh mah lo-in tuate khempeuh kigawm in ZOMI hihang, aci nuam bek ihi hi.

2. Hih GZA makaipi kikhopna panin i Tedim Khuapi puahding zunding kipanni, ci-in lawngkhat in kiging hi. Tua ahih manin Leitung bup aom Zomi khempeuh aw i Tedim Khuapi hong maingat un la, Tedim Khuapi mah ah innthak lothak hong lam damdam dih un, ci-in kong zawn nuam hi. I tupna leh i thungetna in kum 2020 ciang peuhmah in Tedim Khuapi ah taihinn silsel athak 500 akibehlap nading leh innlui khempeuh athak a, akipuah nading ahihi. Topa' thupha sang Zomi namte aw i Khuapi leh i Minam zuunin, puahin, zeem dih ni Topa'n thupha hongpia ding hi.     

3. Zosuan tate pilna deih a neihloh man a, tansang kah zolo khempeuh laptohna sem nuam ihih manin tuate ading ngaihsutna tawh EDUCATION FOUNDATION khat phuh atum ihihi. Makaite in nasep kipat ding hong tangko peuh ciang un. Asem dingin kiging khol ciat ni. Topa'n thupha hongpia ding hi. 

4. GZA Makaipi (6) te sungah General Secretary asem Rev. Dr. Do Kham mun ah Rev. Dr. Do Suan Mung kikoih in ama mun ah Rev. Dr. Go Chin Zam kikoih cih thu kong tangko khiatsa ahihi. Tualo buang GZA Makai akilaihna leh a tawlnga cih bang kuamah omlo hi. Makaipi (6) mah hi-a term bei (kum 2015) dong akip suak ding ahihi.

Pasian in Leitung Bup Zomi khempeuh naom na mun tek uh ah thupha hongpia in lam hong lak kim ciat ta hen! 

Itna takpi tawh, 

Rev. Dr. S. Pau Khan En 

GZA Makaipi

7 May 2014

 


Comments




Leave a Reply