WWW.TUNGZANGNEWS.COM

 
Leitung Gaalpi 3 na Hongpiang leh Hih Gam 5 Tengin Gaalzothei Ding / ZIA tawh tehkaak na

1945 kum August kha Ni 6 zingsang nai 8:15 am in American tote beltawng Atom bomb “ Boihno” kici “Little Boy” Japan gam Hiroshima ah khia in nuntakna 80,000 mitphiat sung in puulsih suk in khuazang seh 2/3 kisia cippah hi. Tuazawh ni 3 khitciang in, beltawng 2 na Nagasaki khuapi ah khiatleuleu in nuntakna 40, 000 siacip pahin, a nunggu thuak in tulsawm lom tampi nungsih lai uhhi. Hihbangteng tawh German galbukna dumthukpi ah Hitler ki gui awkzawh khakhat khitciang in Japan inzongh Gam Pangkhawm/ Allies tetung ah khutlaam/ surrender in Asia ahzongh WWII na hong bingtawp hi.


Tuni, nuclear vui kithun kg 1000 a gik beltawng khatpeen TNT( Tri-Nitro-Toluene) zothauvui ton 1, 200,000 zah agik tawh puakhap natha kikim tahi. Tuni Leitung galpi hong kipan vat hileh, alangnih tuak in hi bangaa suksiatna thakhauh beltawng te neituak tuak ta uh ahihi. Leitungbup ah nuclear beltawng kigawm 22, 000 omding in ki ummawh hi. Hihzah tazen kizang taktak leh leitung pen a bei keizong in siatum cip ding cihi.

Ngaihsun lehangh patauh huai mahmah hi, American in Japan ah tang 2 akhiat pen, a nunggu enkik hilehangh tuni ciangdong ahi theiding in kingaihsun zo mahmah nailo ahih manin, gamhau te in mailam ah tualampi pelh in a dang galvan ah ki demzawta uhhi. Genthena in Set khuakneel software code 24 000 tawh ki kilhcip F-35 vanleng, galkulh leh dumthuk vutlet ding beltawng (bunker bursting cruise missile), cihte ah kidem zawta ahihman in nuclear tawh thukhen zahding galpi piangding lam et tawm zaw cih dinghi.

Tunung deuh aa kipan nuclear beltawng khutlet gampi te hong ki nawkpian cih ihmuh ciangin Galpi masuan aa om ihiiam cih huaizel hi.

Galpi III na piang hileh kua in gaalzo dingcih tawh kisai thu leh la sumtha bekhilo galvan neihzah enkaak suk in anuai ah konggual suk hi.

Etkaak na:
-Military personnel count Leigaalkap mimal phazah (total active, reserve and paramilitary troops)
-Naval size Tuigaalkap leh gaalvan zah (by displaced tonnage of water, i.e. total real weight of military sea vessels)
-Air force size Gaalvanleng neihzah (number of combat planes and attack helicopters)
-Trends in military spending Gambup kumkhat sumlutzah ii sehbangzah gaalvai ah zeekzah (US $ tawh kisim hi, GDP gross domestic Product %).
-Estimated nuke count (Nuke Beltawng neihzah)
Tu in, kua in galzo zawding cihpen a kinai pen ding in sansat kawm in a omsa leh hongpai laiding hun ah khantohna zui in enkak ding hihangh.

Nuclear beltawng nei zihziah ciat ahihman in galpiang takpi leh thudik tang kido nazongh omzo takpi diam cihpen gencian haksa dinghi. Vanleng, tuilengpi leh tuisunglut te puak beltawng bek hilo in leimaitang bulphuh beltawng khahna tausang tezongh mangngilh ding hilo hi. Hih etkholhna pen 2014 kumsung galpi piangding hinailo in tuzawh kumsawtpi khitciang ding etkholh na hi, pilna siamna zongh khangtobeh laihamtang dinghi.

A tungaa thulu nam 5 tawh pii-ciangteh in kuate galhat pending cih anuai ah gualsuk ni. Tulian dinmun tawh gamlian 5 telsuk in a hatpen akhat na ah kikoih hi.

5. United Kingdom (UK): 2013 kum sumlut vekpi GDP $ awn tul 2,432 lak ah $ awn tul 60.8) GDP- gross domestic product

2.5% of GDP

Puan gialsilh/ Personnel: 387,570
Huihlak/ Air: 222 galdo vanleng/ combat aircraft, 153 galdo heli/attack helicopters
Tuitung/ Sea: Tui gihna ton 367,860 zahtawh kikim hiam leh thautang
Nuke Beltawng: Upmawh 160 keeksa, neihvekpi gawm 225

Tanglai aa minthang vangvang ahi Britain galhang galsiamna lakah leitung aa tui galkap siampen kici kumpinu minsuang tuigalkap tezongh tukhang huntak ciangin tuazah hizo nawnlo uhhi. Tu dinmun in Royal Navy pen leitung ah a hatpen nga na bek hita hi. Leitung aa huih galkap thuapcing masa peen hingei uh a, tuhun ciangin a lianpen 10 lak ahzongh kihel zonawn lo hi. 2013 kum Galkap zumpi sumzeekzah pen leitungbup ah a tampen 3 na hi. Nitum gamlam ah a lian pen nihna ding in France tawh kituh sak tadih uhhi. A taktak in nambat 5 nading in France, Germany leh Japan tawh ki gualkim piantek napi in banghang in UK kitel hiam cihleh;

2030 ciangin Europe ah tutadih a haupen Germany khengto suakin Euro sum zangkhawm gamte sum manneihna kiamsuk na in sukhalo bekthamlo in, hong khangthak India, Brazil tekheng in sumbawl lianpen gam suakding cih muhkholh na thu khat, (UK in Euro sum zanglo in sterling pound zang uh) tulai sumlutzah seh 1000 suah seh 25 bek galhiam lamah zeek uh himah leh patau khat hong omvat leh nawhtak in hong behlap zoding, US tawh ki meltheihna zongh hoihto suakding ahihman ahihi.

4. India: 2013 kum sumlut vekpi GDP $ awn tul 1,844 lak ah $ awn tul 46.1)

2.5% of GDP

Puan gialsilh/ Personnel: 4,768,407
Huihlak/ Air: 1,080 galdo vanleng/ combat aircraft, 140 galdo heli/attack helicopters
Tuitung/ Sea: Tui gihna ton 317,725 zahtawh kikim hiam leh thautang
Nuke Beltawng: Upmawh 100 keeksa 

Tu tadih India galhiam lam sumzeek na pen a 8 nabek hi, France, Japan, Saudi Arabia te nangawn in India sangin $ awn tul 10 tamzaw in zeeklai uhhi. Tua aihleh nidang lai Britainte siahkaihna gam khat ahilel India in, a siahpiak topu Britain khengto in hizah in muan’bawl ihhiam?

2007 kum Goldman Sachs Sumbul Bank muhna ah mailam kum 10 sungin India in Britain khengto in sumbawl nalam ah makhelh ding cihi. Nungkum sung inzongh, ‘IHS thupuak muhna ah tu aa danta in apai leh mai 2017 ciangin sumzuak sumlei nalam ah India in UK makhelh ziau ding cileuleu uhhi.

A kawmkal ah UK pen Euro sum mankiam na in nawk in tawlkhat dinkhawl tadih dingin zong a mukhol omban ah, tutadih leitungbup ah puangialsilh a tampen 2 na himawk uh ahihman in leitung galpi hongpiang leh a veng le pamteng tuancil cipzo zah in a tam uh ahihna zongh mangngilh kei ni.



3. The Russian Federation: 2013 kum sumlut vekpi GDP $ awn tul 2061.3 lak ah $ awn tul 90.70)


4.4% of GDP
Puan gialsilh/ Personnel: 3,250,000
Huihlak/ Air: 1,900 galdo vanleng/ combat aircraft, 1,655 galdo heli/attack helicopters
Tuitung/ Sea: Tui gihna ton 845,730 zahtawh kikim hiam leh thautang
Nuke Beltawng: Upmawh 1,480 keeksa, neihvekpi gawm 4,502

Galkap kivak na thapia in leitung ah galhiam lam sumzeekna a tampen 3 na zongh hi. India tawh ki valak sim cihding hiam Russia zongh US leh nitum gam tetawh kilehbulh in galhiam lam sumzeekna ah hong keekto saksak in a tawpna ah UK nangawn khengto ahihna kimu thei ahihi.

IHS Jane’s Annual Defense Budgets report nazui in hongpai ding kum 3 sungin galkap lam kisin na leh galhiam lam sumzeek na in sumzatsa sangin 44% khangsak tolai ding cih kimu hi. Tu tadih in, leitungbup ah US zom in huihlak leh tuitung galhiam a lianpen 2 na bek hilo lai, nuke beltawng zongh US zom in a nihna mah hilai uhhi. Tawlkhat sung hih dinmun khahsuah pak sawm in umkeng.

2. United States of America: 2013 kum sumlut vekpi GDP $ awn tul 15,500 lak ah $ awn tul 682)

4.4% of GDP
Puan gialsilh/ Personnel: 2,291,910
Huihlak/ Air: 3,318 galdo vanleng/ combat aircraft, 6,417 galdo heli/attack helicopters
Tuitung/ Sea: Tui gihna ton 3,415,893 zahtawh kikim hiam leh thautang
Nuke Beltawng: Upmawh 1,645 keeksa, neihvekpi gawm 5,113

US nungaa a zomto gam 10 kigawm sangin galhiam ah sumtam zeekzaw kimlai bekthamlo in, America pen tu tadih in kivak siamna leh galhiam lam ah paubang nading omhetlo mah in a siampen, a kiva pen, galhang pen leh galhiam hoihpen himah hi, tua bangkim lai banghang in United States galhiam sangin gamdang khat tha hatzaw dingin sehbawl mawk ihhiam? Tua aihmawkleh, mun 2 na ah bang hangin American tu kheukhau mawk hiam?

Dawimangpa lungsim kihei in, 2100 kum masiah leitung galpi pianglo ding in sehta lehangh, anuaiaa teng etkak ding hong om hi:

2013 kum in galhiam lamah $ awn tul 682 ($ 682 billions) zeek in Leitungbup ah tuitung leh huihlak galhiam a lian penpen a nei bek hilo nuke beltawng hizah nei gegu bang cidan hiam? Maikum 2014 ciang $ 100 billions kiam in $ 574.9 billions bek zeekmah taleh a nungzom gam 8 kigawm sangin galhiam ah tam zeekzaw lai cih kimu hi. A nuaiaa ensuk dih ni…

1. The People Republic of China: 2013 kum sumlut vekpi GDP $ awn tul 8,300 lak ah $ awn tul 166)


2% of GDP
Puan gialsilh/ Personnel: 7, 054, 000
Huihlak / Air: 1, 500 galdo vanleng/ combat aircraft, ? galdo heli/attack helicopters
Tuitung/ Sea: Tui gihna ton 708, 086 zahtawh kikim hiam leh thautang
Nuke Beltawng: Upmawh 240 keeksa, neihvekpi gawm ki cianlo 

1970 kum khit sumbawl hauhna te a lamdang in hongkhangto ahihna tawh kizui in, khangto mawk hilo kikhawh liang in zang hi. Kim le pam, singkung ganhing susia in siatna tampi om himah leh tuihual bangin thatang tawh mainawt in a kidal zolo zahding khantoh na in hongnawh ahihman in gamdangte mai ah hong tai uhhi. Gam mite nuntak khuasak domkangto in sumlei sumzuak na ah meetbawl kiva uhhi.

Galhiam thatawh tungtuan na lam enkik hi lehangh, mipi lakah hauhna tanh kikimloh na in hongnawngkai sakdiam, aikeh party khat tawh ki vaipuak makaihna in mailam ah nitum gamlam tawh kidem na ah hong dualkik lel khadiam cih muanmawh na omhi.

- 2013 World Economic League Table thupuak tawh kizui in 2028 kum ciangin China’s Gross Domestic Product GDP in United States GDP khengto suak dinghi cihi. Tulel in China in 2% of GDP leh US in 4.4% of GDP ciat galhiam lamah zeek uhhi.

- 2011 International Institute for Strategic Studies thupuak muhna ah hongtung ding kum 15-20 sungin China in US galhiam neihna zah hong delh phato ziau ding ci uhhi. Tua pen nung 2011 kum lai hi a, China in kumkhat $ awn tul 166 zeek nailo hilai hi.

A taktak in kong kikhakkhum bangaa thu iimcip China galhiam thumeilet/ policy pen telcian ding hamsa laihi. Ahih hangin leitung galpi hong piangin US-China ki lawmtat na hong kisia leh sumsuak sum kilei na lamzongh hong toknawi to ding ahihman in US sumleina tha muang China thatang hong kiamsuk ding cihzongh mangngilhloh ding kisam hi.

Leitung galpi WWIII hong piangleh hih gam 5 teng galhiam lam pii-ciang tawh khinkhai in tu aa dan in a kimu thei hi. Bangthu te hangin leitung galpi piangthei ding cih thulu a dangte tawm enbeh lai dihni.

Sum lei/zuak Galpi Trade War: America Vs. China


Gaaltha tawh kilangdo kei ahihloh hangin, sumlei sumzuak kituhna ah sum thukhun vaitawh tulai nangawn in ki nawk gige uh hi. America kumpi in China te sumkhek diktatlohna leh sum pii-ciang khiakna ah thudik in gamtalo ci’n a phunsan zawh sawtta hi. Currency manipulation kici pen China in amau Yuan sum manneihna a ki lawmlopi in khiamgawp in tuatawh Dollar tampi leisemsem uh ahihman in sumlei sumzuakna ah China bawl vante tawmno tawh zuakzo uh aa, leitung ah gamdangte vantawh tehin tawmno tawh zuakzo uhhi. Tua thuhang in gamdangte bawlsa vanzat te in China bawl vante tawh a kizuakkhawm ciangin vanman kikhai lua ahihman in khawngzolo uh cihi. 2012 kumpi kiteelna ah Republican Telcing Mitt Romney in kei kumpi kasepleh zumkah ni masa ni in China tawh sumtualgal kigi kakhungpah ding cihi. Cihnop na ah US honglut ding China bawl vankhempeuh siahsum tax tamzaw sakin ka gawtding cipah hi.

Hihbang hongpiang takpi hileh sumtualgal apiang hong kici diam? China in eeleh bangci thukkik dinghiam?

Leitungbup sumbawlna Thukhun zumpi World Trade Organization ah thu kineih sangin US leh China kikal ah awzol zaw in diplomacy kici tuidam tawh kihona bel teelzaw tham ding uhhi. Hih summeet vai hizeel ahihman in tuabek tawh tawlngalo in alauhuai zaw sumtual galzongh a piangthei thu bel higige hi.

Asia Pacific Galpi War: China Vs. Nitum lam Gamte (the West)


A paisa tawlkhat lai in, China khuataw tuipi nuai leitaw ah sumpiang tampi omding hicih lam etna tawh China leh Japan kikal vai pi khat hongom ciangin, China in a kituhna tuikulh kim le kiangteng huihlak amau thuneih na hi cih tangko uh ih zaakciat hi. Cihnopna ah tua kim le kiang huihlak tawn aa leng vanleng peuhmah in China tungah phalna ngen masak lohphamawh cihna hi. Japan inzongh akibangin tangko uh ahihman in genkholhlohpi in mei akuangvat thei ahihi.

Hih tuikulh neuteng paulap in Japan in 1937-1945 kikal sung minampi lungsim tawh galhong phawng khia uh ahihi. China gam khenpi khat Japan khutsung tungin mi awn tampi that, bawlsia leh numei tampi bawlsia gawp uh aa tuni ciangdong mangngilh zolo in nasa velval lai mahmah uhhi. Bekthamlo in hih tuikulhte in leisung piang huihtuisuak (natural gas) tampi om in, China gam kum 45 sungphial ding kicingtak zatkhop ding om hi cihzongh thulu khat hongsuak ahihi. Gamnihtuak in mawhna kikawk tuak in galhiam pua tuilengpi te ki nawk dekdek liangin ki talsik zeel uhhi. Japan in China gam kum 8 sung a vanawklai un China awn 20 si in, Japan awn 2 si hi.

Awlmawh huaithu ah, gal hongkipan leh tawmvei sungin leitungbup lawhziau dinghi. Alang ah, Asia sumbawl gamlianpen geel ahihman in leitungbup sumlei sumzuakna zong kisia pah ding cihi. Bekthamlo in, Japan tungah US kamciam ahi galvai ah kongpanpih tinten ding cihthu om ahihna leh China nungah Russia in nungthuappah ding ahihman in gal kilawh zauding cihna hi.

Gal Kido na/ Military Conflict: Russia leh Tumlam gamte

Zanmah thupiang Ukraine tualsung buaina ah abeisa galvot (cold war) hunlai khekhap teng hong maikah kik suak hi. Russia gam pummuan’na tawh Ukraine kumpi in EU gamtawh thukim na khutpi meekding utlo, EU pummuan’na tawh mipi hongso khia. Thutawh kipan in gamahtatna in zomto, tua paulam in Russia in Ukraine gamtaw leimeng Crimea luahphei ziau hi. US in awilo bekthamlo in thu le la tawh tawsat ding kithawi behlai hi.

A tom in gensuk lehangh, Ukraine mipi atamzaw in a pului uh Russia sangin EU tawh ki mehmat nuamzaw uh bekthamlo in suahta taktak zongh kisa zaw, lunggulh zaw uh cih kimu hi. Russian in kumpi pa panpih, EU leh US in tangpi mipi deihna panpih in tua tawsawn na ziak in Ukraine kumpi Russia ah galtai phei hi. Tua mipi gualzawhna Russia in galhiam leh galkap tha tawh buakhuan kik ahihman in Ukraine in Crimea gamke khahsuah uhhi.

Hih thulu hong kizom suaksuak hileh galpi pian nading meigiit kaatzongh himun tepan in hong ki pankha ding upmawh huai lahlo ahihi. Leitung mipil te in amau ciat pii-ciang te zangin ah muhkhiat thu hong hawmsawn ka hihi.

0. United Zoland: 2015 kum sumlut vekpi GDP $ awn 1.0)


0.5% of GDP
Puan gialsilh/ Personnel: 1300 (ZIA)
Huihlak / Air: 0 galdo vanleng/ combat aircraft, 0 galdo heli/attack helicopters
Tuitung/ Sea: Tui gihna ton 0 zahtawh kikim hiam leh thautang
Nuke Beltawng: Upmawh 0 keeksa, neihvekpi gawm ki cianlo

Laigelhte deihna nateltheih leh lungdam huai hita hi.

ZH



 


Comments




Leave a Reply