WWW.TUNGZANGNEWS.COM

 

Kipawlna khempeuh in amah bek in kal a suan sangin midang tawh khut kilen in na semkhawm leh kalsang suanzo zaw hi. Tua banga midang tawh sepkhopna, kikawina panin metna tampi ngah in khantohna manlang tuam a, gualzawhna sangzaw tawh matutna zong limci zaw hamtang hi. Banghang hiam cih leh seppih, kikawipih mite in a hun uh, a siamna uh, a theihna uh, amau kipawlna paipi ngeina kip tawh mainawtsiamna cihte hong zangkhawmsak, hong ciamsak uh hi. Amah beka kalsang suan theilo ding kipawlna tampi midang, pawldang tawh kizom in semkhawm leh hamphatna tampi ngah bek thamlo in a kipna dingin zong amau tungah a kingakna ciang khat na om khinkhian thei lai hi.


Ahi zongin kuatawh kipawl ding, kuatawh semkhawm ding, kuatawh tonkhawm ding cih pen teelsiam ding a kisam mahmah ahi hi. Kalsuannop dan a kibang mi leh kipawlna ahih loh phamawh hi. A muanhuai kipawlna a hih zong kisam hi. Kizop, kikawi a sepkhawm a lunglut leh a ut kipawlna ahih kisam hi. Tomvei sung kipawlna ding a ngaihsun pak a omtheih mah bangin saupi kizom suaksuak ding a ut, a lunggulh zong om thei ding hi - ei utna tawh kituak teelsiam kisam ding hi. Tua ahih manin a nuaia thute tawm i ensuk ding hi.

1. Na lunggulh kibatpih theiin: Kipawlpih ding mi zong leng, kipawlpih ding kipawlna dang zong leng tampi hong lengkhia naunau maithei hi; ahi zongin a hoih pen hikhin khollo thei hi. Tua ahih manin na kipawlna ngimna uh a kibang hiam, na tunsawmna uh lamtawp a kibang hiam, na sepnopdan uh kalsuanzia ding a kibang diam...cihte limtak suut in theician masa in. Nupa banga lungtup kibang ahih ban ah ngimna, tupna a kibang bek hilo in sumzatzia, vaihawmzia, malakzia nangawn a kihual mahmah ding kisam hi. Pawlkhat in amau bek khantohna dingin kipawl ut thei a, pawlkhat in midangte khantohna huh tuam dingin kipawlkhawm ut thei a, pawlkhat in mailam limci ding lunggulhna tawh sepkhawm ut thei hi. Tuate khempeuh ah deihna a kibat a kul ahi hi.

2. Meetpih a kibat kul: Kipawlkhawmna pan i phattuampih, i meetpih, i noptuampih a kibat kim diamdiam loh hangin a kizul mahmah ding kisam hi. Meetna kibang kei lua leh a sawtna ciangin kikhasiatna piang thei ahih manin kipawlna, kizopna, sepkhawmna a kipatma in i meetpih ding, i suppih ding, kipawlkhawmna hanga haksatna piangtheite bang hiam ciin limtak suut in kanin theitel in tua khit ciang kipat pan ding ahi hi. Tua kipawlkhawm kipawlna khempeuh in a kihel mimal khempeuh phattuamna ding leh meetpih ding a tam theithei a vaihawmpih, a geltheih ding zong kisam hi. Golkhadi kung banga zamkhawm liliai a i kizopna panin ciangtan omlo a kizamnelh ciat ding zong a kisap leh ahi thei dingin kiginkholh kul thei hi. Ciangtan oma kizopna ahih ding leh zong khentatna kician a om kul masa ahi hi. Khaugui zam bang hileh a sau zam deuh, a sau zamlo deuh cih bang a om leh zong phamawh kei cih tawh kipawlna, sepkhawmna ahih leh zong a sia hikhin pah lo hi, a kizamnelh tengin a thukim a, a lungkim ciat ding uh a thupi ahi hi. A taktak in bel kizamnelh gawp hile hang a hoihna tampi om a, a siatna zong khat leh nih om thei hi; minam kipawlna leh sum leh pai zonna khawngah bel a gol theithei, a lian theithei hoih hi.

3. Ngimna thak muhna thak a omte kikum pahpah ding: Kipawlna tuamtuam a kizopkhawm kik ciangin tuabanga kizopkhawm kikna hangin metna, hamphatna leh phattuampih om hi cih a kilat ding a hoih ahi hi. Meetzawkna ding ngaihsutna thak, muhna thak a om leh zong kikup a genkhawm pahpah ding hoih hi. Kipawlkhawmna sungah mipite in meetna tampi om hi cih mu thei peuh leh lawp semsem uh ahih manin a golzaw a kipawl toh semsem ding utna khangsak hi. Meetna leh phattuampihna omlua lo bek hilo in omvetlo bang ahih leh zong ngimna thak, ngaihsutna thak kikuppah ding akisam ahi hi. Tua hileh a kihel mimal kimin bangci'n meetpih thei ding ihiam cih lam kikupna behlap nuam ding uh hi. Tua bang ngaihsutna in kipawlna sungah a cihtaklo a bang vai tuamtuamte a vekpi in sittel sitset nopna lungsim hong guan ciat ding hi. Theihnopna khang semsem leh kipawlna vai ah mite lunglut semsem lai hi. Tua ahih manin siangtho tak, suakta tak, nopci taka kizopna kalsuanpih ding ahi hi.

4. Kidomtoh siam zong kisam veve: Lunggulhna kibang kipawlkhawm kik ahih hangin nasepzia leh kalsuanzia, sum leh pai zek zia, vaihawmzia, mapanzia leh kidomtohzia kibanglo ahih manin kipawlna thakte a kihual theihna ding, a kitonkhop theihna dingin kitheihsiamna takpi tawh a bul patkhawm kisam hi. Amau meetpih ding lam bek zong hipah lo in kipawlkhawmna pan i vekpi a i meetpih ding bangteng hong om thei ding hiam cih gelkhawmna, muhkhawmna, telkhawmna zong a liat mahmah kisam hi. Tua hileh a kipawlkhawmte mihing vive ihih manin a meet zong mimal kim adingin a huamzo pen, a tangzai pen hong suak thei ding hi. Kitheihsiamna leh kihualna tuipi a luankhawm ciangin ngaihsutna thak leh ngaihsutna zaizaw a omte damdam in khum theihtheih ding hita hi. Haksatna a piang thei te ah zong kidawm ding, a kipelh theilo vai ahih leh zong phusuak thei dingin kithawikholhna om thei hi. Haksatna tampi a phu khawm, a nawkkhawm, a thuak khawm kipawlna in ki-itna leh kihuainopna lungsim khangsak in liansak tektek ahih manin vai thupizaw ah kalsuan thei hi. Vaithak hawm in ngaihsutna thak omte zong sepsuah zia ding kikupna hong lian semsem ding hi.

5. Kimuanna liansak semsem ding: Kipawlkhawm theih ding thupi masa penpen a, sepkhawm theih ding zong thupi to leuleu hi. Pankhawm a kisam, pangkhawm dinga kipawl hiphot limlim ahih manin siamsa a om kei phial zongin kipawlkhawm cilna panin kalsuan kipankhawm, tonkhawm, mabung khawm ding hi. A kipawlkhawmte in nasepzia kisin khawm thei a, kisinna dinga hoihpen zong a kipawlpih kipawlna dangte tung pan ahi hi. Amau a ahoihzaw ahih leh amau a zuihpih ding, a hoihzaw ngaihsutna a om leh tua banga geltohna omte kikuppih ding siat ngaihsutloh ding, lungsim siangtho tak tawh theihlohte theilo cingama kisin ngam ding. Mi khempeuh in siamna tuam ciat i neih mah bangin i sepzia zong a tuamciat ahi hi. Ngaihsutna tuamciat sungkhawm thei limlim zong kipawlna a manphatna hi. Ngaihsutna sungkhawm peuh leng kitawsawnnopna, kipanpihnopnate hong piang toto lel hi.

Kipawlkhawm siamna in mi khempeuh lungdamsak in kizopna huang lian hi cih mite lungsim ah neisak ahih manin kimuanna, pum khat hihna cihte neisak hi. Kizop semsem utna leh kizopna huangdai golsak nopna zong khangsak hi. Kipawlna khempeuh ah ngaihsutna neulua omlo a, kipawlna tuamtuamna kipawl kikna ah zong ngaihsutna a neulua omlo hi. A neu pen a i ngaihsut te zong ngaihsutna limci mahmah na hithei veve hi. Tua ngaihsutna neu nono kisungkhawmte mite adinga nuntakna a khelsak ngaihsutna na hithei zawsop hi. Tua ahih manin ngaihsutna khempeuh a neulua cih omlo, a lianlua cih omlo in suakta takin i pulak theih, i pulak ngam, i sungkhawm ngam ding a thupi mahmah khat ahi hi.

Kipawlna lian leh thupi khempeuh ah suahtakna leh itna, kizopna kip leh kipattah tuahnopna lungsim, kitawsawn a kidomsang tuah ciat ding, tu khawm, gel khawm, gen khawm, zek khawm in mailam saupi in kal khat khit kal khat i mainawt liamliam ding a kisam ahi hi.


Hau Za Cin
Phuitong Liim
http://www.hauzacin.blogspot.com/





 


Comments




Leave a Reply