WWW.TUNGZANGNEWS.COM

 
Nikhat ka lawmte inn khat ah ka hawh leh a haksatna teng hong gengen a, a nitak ciang ka ankam bang lim zo lo phial hi.

A hih hang in a haksatna, a lunggimna te ka dawn/puakpih thei tuan kei hi.


Kei haksatna teng pulak leng a man zong nitak an khawng ne zo kei kha leh ka cihna tawh a ni dang ciang in zong ka haksatnate zong ka gen ngam kei hi.

Gen ding hi leng ken zong ka gen khop ding haksatna ka nei hi.
Tua mah bangin mikim haksatna ki nei ciat hi.
Nang phulkhak haksatna neu deuh, kei phulkhak te ciang in gol deuh cih bangin ih mu thei hi.
Ei phul khak tek pen puak lah ih sa ciat hi.

Khat vei gam Sai(elephant) lian mahmah khat gamsung ah an zong dingin a kuan leh sing hiang kibal khat in a nungzaang khap khat ding khawng na kui kek hi.

Na sa lua in nitak ciangin gamsa dang te kiangah, "Tuni gam sungah an zong in ka pai leh sing hiang kibal khat in ka nungzaang khapkhat khawng hong kuihkek sak deda veh aw...na lua hi mai... hong tum ngakngak keei" a cih leh Simbeng(Zusa neu) mahmah khat in, "Na gen ngeei leh kei zong tuni gam sung ka pai na ah singzum khat in ka nungzaang khapkhat khawng hong kuihkek sak na lua," va ci hi. Saipi zong heh simpian in, "Nang Simbeng, min thu hoih a gen laitak tua bang thu nautang khawng gen kul kei, nang pumpi mahmah zong khapkhat zong a phak loh pi, a cih leh Simbeng in zong, "Ei khap tek ai ke maw" na cih san ziau hi.

Lian in neu taleng ei puakkhop tek, thuak khop tek haksatna ki nei tek hi.
Na haksatna pen mi tungah na koh ciangin hong puakpih thei tuan lo uh hi.
Na genna nu/pa zong lunggim lawh lel hi.

Khat veivei ih haksatnate mitungah ih gen ciangin ih van zang cih gen loh hong suatbeh thei zaw lai uh hi.

Tua bang din mun ah a om ihnuntakna pen Zeisu in, "Van gik pua aa a gim mite aw ka kiangah hong pai un.....kei mah in tawldamna kong pia ding hi..." hong ci hi Mate 11:28-30.

Na van gik mi tungah na pulak kawikawi leh amau van gik hong suatbeh zaw ding uh a, van gik lel in na puuk ding hi.`

Zeisu khephung ah sung lecin na puak zia ding hong hilh ding hi. Hong puakpih/puaksak ding hi.

Leitung mi khempeuh te' mawhna a pua khia zo Pa in nang' haksatna khempeuh zong hong puaksak nuam den Pa hi. Nang mimal haksatna pen pua lah het lo hi.

Zeisu khephung na zuat baih leh na van zangbaih ding, tawldam baih ding hiteh!

Haksatna kawmkal pan,

Zogam Mungpi

 


Comments




Leave a Reply