WWW.TUNGZANGNEWS.COM

 


 
ZAM Thupuak :: 01 June  2014

 
ZAM Thupuak
ZAM :: Zomi Association of Malaysia

 


 
ZAM kum 8 cinna leh palaai kiteelna June 6, 2014, 11am-5pm, Chinese Assembly Hall ah nasia takin kinei ding

Tuma kha khat lai hong kisuak saksa mah bangin ZAM kum 8 cinna leh 2014-2015 palaai kiteelna ding pen nung kum a zatna Chines Assembly Hall mah kizang kik ding a, zingsang nai 11pm-5pm sung kum cin pawi leh palaai thak kihelna nasia tak a kinei ding ahih manin, Zomi a khua mapeuhin kihel kim sawm ciat dingin zahtakna lianpi tawh kong zawn uh hi. Khua khat panin mee pia thei ding tangmi 1 leh pawlpi pan mee pia thei ding tangmi khat in mee khia thei bek ding a, adang mipi a lunglut khempeuh hih hun nuam sungah noptakin kihel thei hi. Tangmi mee khia ding khempeuh zingsang nai 11am laplo te mee kikhia saklo ding hi.

 

May 26 ni sunin Election Committee makaihna 2014-2015 palaai kiteelna ah mee kuang lui ding teng a mau pau theih mangpau or Malay pau tawh pau sak ciat in mi sittelna nei uh hi. Mee kuanglui (candidate) ding peuhmah in Zopuan silhkim hamtang ding.

 

Hun masa pen ZAM kum 8 sung lam honglak, hong kituah pih Topa tung lungdam kohna leh 2013-2014 palaai sem te kiang pan sep khiatna pulak hun hi ding a, hun nihna ah a kisehsa election committee te in kiteena hong makaih ding uh hi. Hong kihel mipi khempeuh sunan leh avot hong kivak ding hi.

 

US a Resettlement Agencies ten bang hiam asep uh?

US a om gambelmi khempeuh kuamah deidan om lo in hih Agencies ten huh in panpih uh hi. Nuntak khuasakzia dingte limtak in hilh uh a, lungnopna khamuanna a neih theihna ding leh a kivaak zawhna ding un nasep hoih zonsak uh hi. Hawhna ciahnate ah haksatna a tuah lohna dingun makaih uh a, pilna sin thei khempeuh pilna sangah min ap uh hi. A tung khinsate tawh zong kitheisak uh a, na asep khop theihna ding unzong vaihawmsak hi.

 

US gam atun zawh uh ni 30 sung tawntung innsap, mei Bill akipan a kisam umlebel leh innsung vanzat khempeuh akipan lupna leh niikten puansilh dongin guan uh a, abei khempeuh piaksak uh hi. Mangkam sinnuamte a sinsak ban vuah gambel mite ngah theih hamphatna om bangbang a ngahna ding un huh in panpih uh hi.

 

Gambel mite dot theih zelzel thute:

Resettlemet Agency tungah kei lampan sum bangzah piak a kul tam aw?

Agencies te tungah nang lam panin sum peek khat zong na bei kul lo hi. Bang hang hiam cileh amau lampan in a khong, a mawkna, man ngen lo a ong huh uh na hihi.

US ah ka teen theihna dingin a tung khinsate khat leh nih bang meltheih neih kholh masak sese a kul diam?

Kul masa sese lo hi. Meltheih na neih kei leh phamawh kei, contact theih ding a om kei lezong poi kei, Address piak ding na nei kei zongin lungkhamna ding khat zong om lo hi.

Tua leh bang tanvei bang ngak kul ding a, angak hun sung asawt lua dia leh?

UNHCR zum pan na tangthu tomkim zum dang a tun theihna ding leh na lenkhiat hun ding kikaal a tampen kha 12 pan kha 16 sung sawt thei hi. Tuhun ciang US gam teel Refugee tam lua ta ahihman in bangtan sawt ding cih genkholh theih om kei. Ahizongin na tangthu tawh kizuiin sawt thei, sawt lo thei hi.

 

US ka tun khit ciangin bang panpihna kangah tam aw?

America (US) I cih pen gam gol lua khat hi a, gam khat ahihangin a sungah States 50 tak om hi. Tua ahihmanin mun khempeuh ah galtaaite a panpihzia uh kibangkim thei lo hi. 
Amun natun ciangin Agency ten ni 30 sung inn hong saapsak dinga, nek leh dawn a kipan silh leh teen, zat ding kitangsam um leh bel dongin hong pia ding hi. Mei Bill, tui Bill cihte zong hong piaksak ding uh hi. Na tanote sangah a mawkna in kahsak ding uh a, mangkam na siamna dingin atuam vilvel a mangkam sinna sangah nang zong hong kahsak ding uh hi. Ahizongin hih panpihna leh huhna pen a tawntung a ngah ding kisa kha peuhmah ken, nasep hoih na ngah theih a nang leh na innkuanpihte na vaak zawhna dingin a kisam masa teng bek tawh ong huh uh ahihi. 
Ni 30 khit ciangin nang leh nangin na khempeuh na vaihawm kul ta ding cihna hi. Ahizongin gambelmi khat na hihna tawh huhna sumleh pai ngah theihna lampi om bangbang na Agency te hong theisak ding uh hi. Ek nutsiat in hong kinusia pah ding cihna bel hilo hi. Lungkham luatna ding bel om sam kei e.

Theiding: Hih atung a thu teng pen USRAP Handbook pan hi a ZAM zumpi pan a kilet khia hi. Azom tampi omlai hi.



Asam ding a neite Australia form 842 ki fillup thei lai

Australia gam ah meltheih, tanau neite adingin form 482 ki fillup thei lai hi. April kha fillup masak te sung pan pawl khat Australia kumpi in lai khak kikta ahih manin na address piakna laibawm uh na en zelzel un.

 

Kam tungnun sawm kei zaw in

UNHCR in kipawlna makai te tungah na mite uh thuman ngen ding na ki hanthawn un hong cihcih mah bangin thuman genlo mimal 4,000 val (innkuan pih pa nailo) mukhia in , tua te lak atam zaw pen khamtung gam pan hipha diak ding hi. Mimal 4,000 lak ah seh thum suah seh khat pen gam thumna tung khin uh ci hi. Thumanlo i cih ciangin min kibang, suah kum a manlo a gen, sanggam u le nau ci na pi’n sanggam te tawh kibanglo cih dan atuam- tuam…

 

Deih loh penin RSC, DHS, IOM, CO man khinsa te UNHCR pan hong sap kik a leh thu khat om hi ding cih na phawk pah ding kisam hi. Thu khat a om lam a theihkhiat khit man vua hong sam kik ahih manin sel taltal kei zaw inla khial mah ing ci-in thum bawl pah le leh nang ading hong zaw ding dan hi. Tua dan a tuak kha ten ahih theih leh UN zum a kamlet te maw kipawlna zum a te maw navai teng siang gen zawin bang ci leng ahoih tam ci-in ngaihdan la thei le teh hoih pen kha ding hi.

 

HELP-UNHCR “Project Self-HELP”

UNHCR vaihawm sakna tawh HELP College ah Manglai, An huan dan, IT leh sam bawl dan tuamtuam manh ngetlo in kisin thei hi.
A kisam teng, siamna sin ding nu/pa kum 15-24 kikal hi ding, UNHCR card or laidal pi nei hi ding.
Alunglut a form deih te in ZAM zumpi ah kikan thei thei hi. Form pen June 11 ni ma ap kim hamtang ding.

 

ZAM, FRO, CRC, ACR leh DAI Kipawlna te kimu khawm

May 28, 2014 nitak in Malaysia a om kham tunggam pan kipawlna lian 5 te kimuh khopna kinei hi. Kimuh khopna sungah FRAUD case vai tawh kisai kikupna kinei in mipi te adingin ahoih thei penin thumsakna leh ngetna lai piak kawmin UN thunei pipa tawh kimuh kisawm hi. Kimu khawm a paiteng FRO in nitak an steam boot hong taih ahih manin gilvahsa in ki ciah hi.

 

ZAM Card tawi Zomi te ading nasep

Port Klang setzungah packing bawl ding Zomi pasal citak mi 17 kideih. Nipi sim off. Nasep hun nikhat nai 8 sung bek. Omna ding mun pia, an vaklo. Khasum kipatna RM900, OT tawh RM1100 ngah thei. Alunglutte kizopna ding: Mangpu 019 510 6413.

 

Tukal sung ZAM palaai te buaipih diak teng

Dal Muan Thang (Tungzang), Cing Za Dim (Thalmual), Lal Sian Sang (Singgial), Cin Suan Piang, Hau Lian Khup, Dal Khan Suan, Suan Khen Thang, Langh Do Nang, Hang Khan Muan, Mang Cin Nang, Khaipi, Nang Sawm Lian, Thang Sian Piang, Nu Luan (Guasing), Thang En Khup (Tuipi), Dong Lam Thang (Tuipi), Hau Lian Mang (Tonzang), Luke Khai (Dalkhai) , Thawng Khan Khup (Limkhai), Dal Mun Thang (Tungzang), Thawng Khan Khup (Limkhai), Dim Do San (Sezang)

 

Dahpihna

Malaysia gamsung ah Zomi te ih tun zawh kha khat huamsungin misi a tampen kha hi ci-in ih ciamteh aa, ih dahna khempeuh Topa’ tungah ih ko hi. Hong nusia ih sanggam te mangpha khak na in amin leh khua te tawh kongsuak sak uhhi.

Ih muh bangin May kha sung hong nusia ih sanggam te khempeuh ZAM-ZSM zumpi panin ih itna leh ih phawk nate ih pulak hi. Adah akap khempeuh tungah Topan hong hehnem ciata hen.

 

Pa Suan Sian Piang (kum 31, Tonzang)

Tg. Pau Sian Piang (kum 25, Tuipi)

Pa On Khan Kam Thang (kum 50, Anlangh)

Lia Dim Ngaih Cing (kum 33, Mawngken)

Pa Thang Suan Tuang (kum 35, Laaitui)

Tg. Thang Khan Khai (kum 29, Thangkai Suangpi)

Pa Thang Piang Lian (kum 39, Ngalbual)

Tg. Zen Lam Lian (kum 30, Lamzang)

Pa Zam En Piang (kum 40, Tuipi)

 

ZSM pan zaksak kikna

Genvai (ZSM) lutna laibu len Khua makai, Pawlpi makai, veng makai te khempeuh in amanlang thei penpen in ZSM zumpi ah laibu nong puakkik kim nangun kong zasak kikkik uhhi. 
A zenzen in nang khutsungah laibu na kep sungin member lutsa khatpeuh in sihna atuah khak leh zumpi vaipuak hinawnlo in nang vaipuak hi ta ding hi.

 

Refugee/Assylum Seeker khat in a omna kumpite deih loh na a sep a, thukhun palsatna a neih leh a thuak ding daan tawh kipelh lo ding

May 15 niin Petaling Jaya leh Klang ah palikte’n Tamil singnuaimi (LTTE) hi dinga upmawh UNHCR Card tawi mi thum man uh hi. Hih thu hangin Malaysia a om UNHCR te thugennu Yante Ismail in “Refugee/Assylum Seeker khat in a omna kumpite deih loh na a sep a, thukhun palsatna a neih leh a thuak ding daan tawh kipelh lo ding hi" ci hi. UNO kipawlna in gup ding leh huutbit a kisamte panpih ding a mawhpuak himah taleh UNO deih loh a gamta leh thukhun palsat te pum gup ding cih hi tuan lo hi.

 

Yante Ismail in a genkikna ah "Hih bang thu a om ciangin makaite'n thu leh laa kempeuh aneng atong in kan uh hi" ciin gen hi. UNHCR Card tawi Tamil singnuaimi thumte kimatna hangin Yante Ismail in "UNHCR kepna huang sunga om mimalte thu pulaak khiat ding pen ko paizia hi lo hi. Ahizongin hih bang thu piang pen thu mawkmawk hi lo ahihman in zaangkhai lak mawkmawk theih hi lo hi" ci hi. Hih akiman Tamil singnuaimi thumte pen kum 2004 akipan UNHCR Card tawh Malaysia gamsungah a bu khinkhian khin uh ahi hi.

 

Yante Ismail in a thugen zomto kik a “Refugee khat in ama omna gamte thukhun leh thukham tawh kizuiiin a gamtat kul hi. A zuih zawh kei leh thuak ding kilawmte a thuak ding mah ahi hi. Refugee Status ngahsa tampite lakah tangthu hamsa aneihonkhat om uh a, tuate’ thu akan ding leh thudong dingin tentan man khinsa misiam kisam khin hi. Tua banah UN thukhun sungah kihel zo ding maw, ahih kei leh UN thukhun pualam hizaw maw cih zong nakpi takin kan ding uh hi. Hun pen sawt thei kha ding hi.” ci hi.

 

A thugen zom kik leuleu in “Simmawhna, bawlsiatna tuamtuam hang leh thauvui thautang hanga galtaaite (Refugee) hun pen gamthumna atun mateng uh kibeisak lo dinga, a nutsiat uh ahi amau gamah zong kilehsak kik cih om lo ding hi. Tua bek tham lo in a taaina uh gammite tawh liangko kikim a nuntak theih ding leh hamphatna zong deidan om lo in angah theih ding uh zong UN in hanciampih hi. Ahizongin Malaysia gam thukhun sungah Refugee khat leh phalna om lo a gamsung lutsim mikhat kilamdang lo uh hi. Tua ahihman in Malaysia gam sungah Refugee khat in gammite bangin na kisem sak lo a, mat leh hen tuak thei dinmun ah om den hi. Ahizongin Malaysia kumpi in Refugee tawh kisai UNHCR te nasepna pen mihing nuntakna thu himawk ahihman in khaktan lo in thapia zaw hi. Mat leh hen vaiah hitaleh Refugee khat agam ah puak kik ding cihte a om lohna dingin UNHCR tawh khut kilen in pang khawm uh a, NGO leh Volunteers tuamtuam pan huhna ngah theihna lampi zong a honsak hizaw hi. Tua banah UNHCR leh Malaysia kumpi zumte in ten gamthumna ahi USA, Canada, Australia te atun theihna ding un nasem khawm in panpih uh hi,” ci in gen hi.

 

Yante Ismail genna tungtawn in tu ciangciang UNHCR minkhumna sungah Refugee leh Assylum Seekers phazah pen mimal 144,300 cing khin ta hi. SC: The Malay Mail Online.

 

Lungdam kohna

Zomi Catholic (ZCCM, St. Joseph Church, Sentul) pan tukal Thupuak bawlna ding RM50 hong piakhia leuleu uh ahih manin lungdam ihko hi. ZCCM Pawlpi tawh na kizop nop leh: Francis Khampi 016 269 1351.

Taungzalat sai neipa Philip Maungpi in Zomi zumpi panpihna RM300 phalna tak tawh hong piakhia ahih manin lungdam ihko hi.

Shalom Christian Fellowship pawlpi panin ZAM matlehhen vai panpihnading RM300 hong piakhia uh ahih manin ki lungdam mahmah hi. 

 

Address:

155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email:  zomiassociationmls@gmail.com

 

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna 
 


Comments

09/03/2016 04:25

I am touch with this article from many month ago and i check its new post at every weekend but i collect many useful news about the current situation of the world that is easy to understand. I am too much exited with this blog post and i appreciate the site owner for post such all great news and thanks for this great help.

Reply



Leave a Reply