WWW.TUNGZANGNEWS.COM

 


 
Zolengthe te tawh Khualzinna


 


 
914 = ZOMI ci-in Zogam, Kawlgam, Vaigam, Leimong dong ah a ki gen hehu laitak in lam et ngamloh zah dongin ka nuntakna ah ziing nisuak bangin ki khelna hong om hi. Kawlgam khuapi Yangon khua nawl, Hlaingthayar akicihna- (Ka lawmte in Buan-ta-zar hong cih sak uh) buan nawng lakah a ki lehleh kim lai, Australia gamah ka zak ngeilohna khua khat ah "Daihna" Peace tawh kisai thukumna khat ah ki hel thei dingin VISA hong ki pia cih ka za hi. VISA a cih pen mei-aam bangin a san veva, a sa mahmah ding kasak leh, ka ngaihsut dan na hi lo bilbel hi. Kawlte'n Tanzung ( Embassy) a cih zong pen ka tual lungsim tawh sikling peuh tawh ki uum ding a, kahpa-siik bebek a dim ding kasak leh na hi hiaulo in, nungaak hoih kiukeuh leh mikaang tal gol, naak sau, luzaang kaang deda nih leh thum na ki leh hialhial lel dih hi. Tua bang teng ka muh khit, ka VISA ka ngah khit phet in ka inn ah ciah vingveng in khuk dinkawm in lungdam ka ko hi.

 

Kei kia hilo in Zomi Pastor 4 leh Nungak 1 zongin VISA ngah a cih ciangin, ka neulai hun khat ka phawk hi. Tedim ah antaw dingin zingsang khuavaakma in ka u te tawh ka pai khia uh hi. Khuaziing lua ahih manin lampi ah ka lau mahmah hi. Ka pai kawmkawm un meitei gun deek pan thakhat in the hong khuang a, ka u te in "Zolengthe khuangta, khua vaak in teh" kici uh hi. A cih bang teek mah in, vandumpi ah khuavaak hong ki zelh hiuhiau a, Zolengthe khuang hong ngaih semsem hi. Khuang ziahziah uh a, phalvaak ciim in, thangmual dungteng ah zingni a suak ciang... Zolengthe te khawlta uh a daii dide uh hi. A mau nung zui in zusa, vasa te hong ki pan uh a, gim leh tawl teng hong betkhiatsak uh hi. Tua bang keek khat tawh ki hawizawng kasak pen Kawlgam Census leh Zomi ngalliam, salpha te' aw(voice) in Zolengthe bangin Zomi te' khuamial pi hong muut khiatsak bangin ka ngaihsun a, Kum tammi mi nam neilo bangin "Chin, Thin, Chian, Thian, Tedim ...) peuh a kici mawkmawk, Identiy Crisis nei in a mial cip Zomi namte' a dingin Zolengthe te hong khuangta uh hi.

 

Tua Zolengthe khuangin keibang lel khuata mi, gam pua pial ngeilo, Kawlgam khuano khat ah Mission sem in a kibilh cip mi mawngmawng khat pen thakhat in a min thang vangvang Common Wealth gam lian penpen Australia kongpi hong honsak hi.

 

Sum Haulo te a ding Air Ticket( Budget Airline-Jet Star Connection)

Cikmah in ka pai ngeilohna mun ahi vanleeng ticket zum teng leh agent tengah ka pai kawikawi a, ka theihna leh muhna hong khang sak mahmah hi. Air Asia cih khawng, Tiger Air cih khawngin tawm man bilbel a, Thailand or Kualalumpur ah Transit(Vanleeng laih ding) vive ahihi. A tawm bei penpen leh Singapore gamsung lut theih na ding ka kankan ciangin Jetstar a kici Airline ka lei suk pah hi. Tua Vanleeng tawh Yangon pan nitak nai 4 in leengkhia ding a, Singapore vanleeng tual ah nai 6 sung tucip dingin, tua pan Australia gam Zomi te a tampenna Melbourne khuapi ah zingsang nai 6:30AM in tung ding a ci ka hihi. Ka pawlpi mite zong Vangam pai ding zah in hong lungdam pih uh a(RIP lukhuneelkai ngah cih daan a hi lo), sun leh zaan in hong tutpih uh hi.

 

Ka pai khiat ding ni April 7 ni hong tun ciangin zingsang thobaih in, ka nusiat ding ka innkuan pihte, ka biak inn leh naupang kepna innpi hoih tak ka en hi. Nitak nai 4 in pai ding ka hih hangin ni hong suak phet in, ka diip in khitkhit cita a, ka lung bang leeng khol zawzen hi. Zingsang thunget hun(devotion) ka bawl khit uh ciangin ka biak inn uh ah nisim in a om "Vondeih Pattahna-Mucu" (Wisdom Preschool) ki pat hun hong tung ta ahih manin, ka vanteng ka seng uh hi.

 

Yangon Vanleeng tual ah ka pawlpi mite' a teek, a khangin hong zui nuam uh a hih manin TAXI gol mahmah(121 DYNA) khat tawh pai dingin ka geel uh hi. Hun awng sungin ka Vanleeng letmat(Ticket) la veel kik leh van KG 20 bek ki pua thei ding ci ahih manin ka van ka sit kik leh tampi na vaal a hih manin kamtawh a kigen thei ding vankhak teng ka hemkhia kik hi. Sun thapai mahin sungtum zel, pusuak zel in ui mei kaang a cih bangin ka om thong thei kei hi. Nitak nai 1:00PM hong saat ciangin mucu naupang te thungetsak in ko inn kuan zong khuk din in lungdam ka ko uh hi.

 

Ka sanggam te Pasian nasem te zong hong tung uh a, hun bawl ding thusuak hong ngah uh ahih manin nial ngamlo in hun ka bawl uh hi. A hun om nawnlo a hih manin ka lungsum ah, "I bawlsa a khing mang mai lo ding ih hiam?" ka ci hi. Thu ka nget uh leh Khasiangtho a hi tam? A nin a hi tam ki theilo khat in na hong seem in hong nuam mahmah bilbel a, nitak nai 2:00PM in Amen ka pia thei uh hi. Amen cih khit phet in ka ding khia pah uh hi. Hlaingtrhayar pan Yangon Airport kikal ah lampi kikhaak a hih manin lungsim mawhna( ka hesuak man hi) tampi ka bawl man hi.



Vanleeng tual ka tun ciangin Jetstar Gate Closed na kici hi. A.A a cih uh Vanlleng tual thunei te kiangah pai pah ka thuum hangin vanleeng kahlei(keel-leii) ki dok khia khin hong ci uh hi. Na van teng nusia in hong ci a, tua lah hi thei kasa kei hi. Vanleeng tual ah thunget ding hi theilo, pauhlap ki zong thei nawn lo, hong it mahmah te zongin kei bang mikhat hangin vanleeng khat paina ding lampi ki sot to sak theillo ahih manin ka mit muh na ka maitang mahmah ah ka pahtaak mahmah Jetstar in hong leen san ciaiciai ta hi.

 

Ki bawl kik thei nawnlo, ki siik hang a mawkna hi a, ki kap theilo, ki nui theilo in ka lutang leh suangtawh a kibawl Innpi khuam te ka tat kham nuam mai hi. Nitawpni ciangin a piangthaklo, a kisa thei mahmah ci leh sa mite omzia ding ka pumpi mahmah in ka tuak a Khamangthang te' a ding ka khitui hong pulh ziahziah hi.

 

ZOP LAI DING

Zolengthe
Brisbane, QLD(May 8-16)
 


Comments

sam
12/21/2016 10:46

nice post

Reply

The chines people are so hard worker and also focus on the mission. They are amazing power of the chines people and also loyal of your work. They have the natural ability for doing the work with guilty. Chinese production is very famous in all over the world.

Reply
06/16/2017 01:39

Nearly anyone transferring planes in London has had to ensure the torturous airport transfer. Although airport transfers are nothing new (we're looking at you New York City), London has managed to make their transfers unique and at times headache inducing.

Reply



Leave a Reply