WWW.TUNGZANGNEWS.COM

 
 

Tu nitak lam nai 3 hun in Aizawl Khuapi pan Singapore ah inn nasem a hong pai Laltlansangi @ Khin Thu Zar Aung luanghawm vuina ah ki hel thei ing. Hih Laltlansangi pen a mah leh a mah nuntakna ki beisak (gui-awk) a si hi ci in a beisa nipi ni May - 22 in Mizo Christian Fellowship Singapore (MCFS) makaite tung pan ki za hi.

 

Hih gui-awk na pen Singapore gam neu no khat a ding in a lauhuai mahmah natna gilote sang in a kih tak huai zaw hi a Kum 2012 in mi 467 in a nuntak na uh bei sak hi.

 

Hih dahna tuihual in Zomi sung ah zong hong nawk khakha a, mihing 5 (Falam 3, Mizo 1, Tedim 1) in mual hong liam san khin ta hi. Hih bang dahna bang ci bang in dal thei ding cih Chin Christian Fellowship, Singapore (CCFS) in pan mun la in nakpi tak in a vai hawm san laitak ahih man in ngaihsutna hoih leh thungetna tawh ma hong pan pih ciat un.

 

Tu ni sihvuina ah sanggam Mizote kum 20 gual ding mi a za a sim leh a u ham zawdiak pawlkhat tawh 150 bang pha ding uh a, pawlkhat a kap khia baba tawh a dang pawl khat a ki dikdik tawh a tua lo teng khitui mualtuang pippiap in hong koih uh hi.

 

Ih gam ih lei ah leitang awnglo lah hi lo a migam mi lei ah luanghawm sialna ding mun bekno khat zong ngah zo lo in ki haltum liang cih pen khasiat huai mahmah hi. Tua ban ah ka khasiat na pi lai ah nungak no milmel huih nun a singteh ki lok na ngawn a nuih zak laitak ding uh, nu leh pa sanggamte tawh inn lum lo lum nuai ah nuamtak a om ding kim lai mi gam mi leh ah sawlsuk sawl toh thuak in an na ngawn kham tak ne kha lo ban ah ih mut hun kician cih zong nei lo in sila innteng bang in a om lam uh ka theih khak sawnsawn teh ki dipngek hong zen mahmah hi.

 

A beisa kha ni lai pawl in zong Malaysia ah UNte lakkhiat ding a ngak ka gang in a nuntakna hong bei san ciang in sigal in ka pai a hanmual a singlamteh ki phutte a min ka sim kawikawi leh cik lai a si cih ka theih loh ka mel theih ngei mahmah pawlkhat min na om uh a, min ka theih ngei loh Zogam pan a piang honpi mah ka muh teh Zogam ah HAN ding ciang awng mahmah lai sam hi a maw ci in kei bek na khui sasa ing.

 

Ei Zeisu nung zuite in ih sih hang in ni khat ni teh Vantung ah ki mu kik ding ci in ih ki hehnem phial ta zong in hih leitung ah cik mah hun a ki mu nawnlo ding cih ngaihsut teh kua ta dah loh ding hi lo sihna hun ah beh leh phung mah, khua leh tui mah tawh mun khat ah dahna khitui nul khawm leng thuak nuam zawdiak veve hi.

 

Ih gam ih lei ah ih nusiat nu teek pa teek leh naupang milmel teng tawh mual za (tul) tapi hal a tuipi gal kai lai gui zom teng ki gawm kik in ih gam ih lei, ih inn phual zang pan bang hun teh zing vai ih hawm kik zen tam? Ih gam ih lei ih lam kiatna pan sing dang gam lei hong lawn khia in bang hi pen a hi tam? Zawn na in hong lawn khia maw? Cihtak lohna in hong lawn khia maw? Haina in hong tai khia sak maw?



Leitung gam tuamtuam ah Pasian thuzui mite om na gam ahih leh mi hau gam in ki ciamteh hi mah teh leh ei kiang ah a zawng pen mi nam i hih sese... Ih innkuan sung, ih beh ih phung sung, ih pawlpi sung leh ih khua sung hoih tak ki sit pha in Topa deih loh bang bawl kha ka hiam? Bang ngim kha ka hiam? Bang gen kha ka hiam? Kei a ki pan ki sit tel pha ciat ni.

 

Tu hun pen nau min phuak a buai hun ding hi nawn lo a ih gam khan toh na ding in tha neih zah sit lo a dian henhan hun ding hi ta hi.

 

Ih om tek pan tung lam en to in tha san ciat ni!

Vungh Suan Mang

 


Comments




Leave a Reply