WWW.TUNGZANGNEWS.COM

 
Na Pa Kua Hiam

Tuni peen Pate ni ahihmah bang in Pate itna  leh Pate’ itna tawh kisai Zomi pihte tung ah tawmkhat kongsuahkhia nuam hi. Leitung ah Paneilo te   peen kisim mawh zawdeuh se a, Paneilo te sang Pa neigegu Pa ginalo neite peen ki enneu, kisimmawh, kineumuh zawtham laai hi. Tua mah bang in Pa te zong tate adon zahding a adonte pilna siamna aneihsese loh hang kithupi muhmahmah a, Degree sang mahmah neina pin tate suah ni suahkha nangawn agentheilo Pa te peen mi ginalo in atamzaw in kimuh hi. Kei a kipan mitampi te in Pa te ithuaina thu leh itzia ding athu in kithei ciat a, Ahizong in Pa aw ong it ing cihsese ding peen hamsa kisaciat sim hi leh kilawm kasa mahmah hi. Tua mah banglian in zong Pate in zong tate peen ongngai mahmah ing acih ngaungau dingpeen pumpi kikim khitpian ciang hamsa sim hileh kilawm mahmah hi. Hih te peen ki it lohman zong hikhin tuanlo a, Zomi te zatdan hiphalo tawh kibang hi. Ahizong in si le naang in phone sung ahiphial zong in Pa aw ong it mahmah ing cikawmsa in atuam vilvel in Pa ading sumtawmbeek maw, van nengnokhat maw geelsiam leeng Pa te lungdamna peen kigenzolo cih itelding kisam mahmah kasa hi.

Ahizong in khatveivei Leitung nate leh sum le paai hauhna sung ah ikidiahkhaak luat ciang nuamsa tawntung leengbel mihing akuamaciat kimigi in kicing mahmah samnaven ihamsatciang Inu Ipa nangawn ngaihsun zolo, manlo zahdong in leitung nateen onghaisak thei a, Inu Ipa te  I itzahding in ki it zolo theimawk hi. Tuamah bang in Pa te in zong tate ong it ongngai mahmah napin sum le paai hamsatluatna tawh ong itlo ongngailo bang in gamlapi ah ongkikhenthaangpih in akimukha nawnlo bang mitampi tak ki omliang hi. Leitung mihing thagum haatna tawh ipa te ahi a Ta te ahizong itding ihan ciam hang ahangkhat peupeuh maw ahihkei leh nuntaakna hangmaw tawh ki it kimding leh khat le khat kisansiamding peen atamzaw hamsa kisa kimtek hi. Laisiangtho sung ah Leitung mihingte in Pa nih kinei a, Tuate in Jesu leh dawi mangpa  ahihi. Dawi mangpa ahihleh mipoite Hell khuk sung ah akhultumding pa hia, Jesu ahihleh Nuntaak tawntungna hongpia thei iPa ahihi. Sanggam nang napa kuazaw hiam cih nakhensat in.

Leitung ah Nu te leh Pa te in tate ong it mahmah hinapi  Nupi ten ata atawilaaitak aniik kiatsuah leh ata khia in aniik bawh kici hi. Tuamah bang in Pate zong Adam style tawh kisil laaitak tate banglokhat hileh adelh sansan ding kikhaat mahmahding in ka um hi. Ipa Jesu ahihleh mite maai ah azahmawh zong seello in eite ongit na haangbekbek in singkhuamtung ah kikhai a, bawlsiatna namkim thuak hi. Hih Jesu itna saang in Tui le kha tawh isuahkik naak leh Pahoih anei ihihban ah ileitung pianna Pa te mahmah zong itdansiam in a it huaizia athak in itelthei hi ci in Zomi akuamaciat konghansuah nuam hi. Vantung Pa leh Leitung Pa te a itsiamding in Zomi kheempeuh Topa’ khasiangtho in ong ompih ta hen!

Thang Khawm Pauzomi

http://zomipausektak.blogspot.com/2014/06/pa-te-ni-thupuakjune-15-2014.html    
--



Thang Khawm Pau ZOMi
Bowling Green , Kentucky
USA
Cell- 270 -217 9593
Personal -joseptpau@gmail.com
School -tpau0001@kctcs.edu 

Itna icih bangcihtheih ding ihihiam cih leh Khris in eite ading in anuntakna hongpia hi. Eite zong i khristian imipihte ading in inuntaakna ipiakngamding ahihi. (John masa 3:16)

 


Comments




Leave a Reply