WWW.TUNGZANGNEWS.COM

 
Tulaai Leitung Thuthang Tuamtuam Updates June 12,2014


·      Leitung ah ikingaklah mahmah thu khat ahi 2014 World Cup Tukpeeng kimawlna June 12, 2014 ni in Brazil gam Sao Paulo khuapi ah kipan ziahziah ta hi. Leitung gamtuamtuam gam 32 pan kimawlding te kimtak in tungkim ciat uha, Amasa peen innteek Brazil leh Croatia te kipeek pah ciatciat ding uhhi. Final ahih leh July 13 niciang Rio khuapi ah kimawlding uh ahihi.

·      Pakistan gam nitum na lam Waziristan kuam teng a kibusa Taliban migilo te June 11,2014 pan zan thapaai ahawlpalo US Drone 2 ten buhluh uha, migilo 16 thatlum uhhi ci in Pakisatan kumpi thuneite in taangkokhia uhhi. Hih bang a Pakistan gamsung ah US ten autut na uh asuk ziauziau na uh peen Pakistan gamte lungkim thei mahmah lo uhhi.

·      Ukraine gam nisuahna lam kuamteng Russia tawh kigawmding aut thautawi migilo te leh Ukraine gaalkaap te nisim kikapden uha, Russia deih thautawi te huhding in Russia gampan Ukraine gamsung ah June 12, 2014 ni in Tanks Car 3 ongluut hi ci in Ukraine kumpi thunei te in taangkokhia uhhi.

·      Philippine gam Manila khuapi sung aom China Embassy mai ah mipi tampi tak te in June 12, 2014 ni in South China Sea sung a China kumpi te gamtatna deihlohna leh manlaangtak a akhawlnading deihngetna lungphona nasiatak neikhawm uhhi.

·      South China Sea sung ah June 11,2014 zanlam in China gamte gaalvaan leeng nih in Japan te Vanleeng meters 30 dongnehtak in umcih in vanlaai ah tobawl ahihman in Japan te heh mahmah uha, Tokyo khuapi sung a China Ambassador pa kiang adeihna uh ahang gending in Japan kumpi ten June 12, 2014 ni in thupia uhhi. Tua vanleeng te akimawlna mun peen gamnih in kogam acihtuakna mun zong ahihi.

·      US gamte a 41 na President luui ahi George H.W.Bush in kum 90 acinna Birth Day June 12, 2014 ni in Kennebunkport khuapi tung Main state  vanlaai zang ah skydive akicite tawh leengkawm in suahni nuamtak in zangsese hi. Bush in agenna ah tuma kum 70 kiim pan kipan vanlaai kalen cilna hi a kalau pian ci hi. Leitung Gaalpi nihna laai in atuanna vanleeng Pacific tuipi tung ah kikapkhiatsak ngei cih genbeh hi.


·      Piantit gam Trade Union te makaihna tawh June 12, 2014 ni in Meileeng nasem  tung lungkimlohna mipi tampitak in lak uha, June 12, 2014 niciang nasiatak in zomkikding in geelna nei uh ahihman in French gambup a meileeng khualzin alangbang in nasep khawlding in genkhia uhhi.
 


Comments




Leave a Reply