WWW.TUNGZANGNEWS.COM

 
  Dear ... zahtak, muan leh suan, it leh ngaih;

Zomi Khawmpi asiim Zomi laizom U leh Nau, Nu leh Pa, Lawm leh Gualte aw;

Anungta Pasian hong ompihna leh Khawmpi siim Zomi-te' vang tawh "Zomi Khawmpi USA 2014" lawhcing tak leh cidam lungnuam takin bawlzo ihhih manin nakpi takin ih lungdam hi.

 

Khual panin Khawmpi siim mimalkim, cidam takin innlum azuankik zo dingin ih lam-en a, thu ih ngen hi. Hih Email ka gelh laitak in vanleng tawh inn lam azuan ding a kithawithawi zong om a, a gamla mahmah, mawtaw nai (33) sung a kihawl ding, San Francisco leh Portland lam a sanggamte zong lamkaal ah omlai hi cih ih thei a, lamkaal a omlai sanggamte khempeuh cidam takin a innlumciat uh a tunma teng anungta Pasian in ahong ompih dingin thu ih ngen hi.

 

Khawmpi innteek ZIOK kipawlna Makaite, Tanute, Palaite, Pawlmite, leh zin leh leengte innlum guanin annek tuidawn kicing takin hong vaak Tulsa khuanu khuapate tung ah lungdam zahtakna ih pia hi. Tutung zong, ngeina mahbang in, innteek khuanu khuapa, nungak tangvalte, Pawlpi tuamtuamte, zindo a kisiam dan hong kiphat mahmah ahih manin, lungdam huai mahmah hi.

 

Zomi-te tangthu ah tuipi galkaai Zomi-te' Khawmpi lianpen a kibawl zo hi a, hici zah a vai lianpi a kihawm zawhna pen Minam itna, khat leh khat kikhualna, lungsim siangthotak tawh deihsakna leh kipiakkhiatna, picing takin mapankhop theihna, lungduai takin hanciamna, khua leh tui kithutuahna, leh a thupi pen khat ahi Anungta Pasian ih muanna hang ahi hi. Mapang Khawmpi Tanu khempeuh in ama siamna, pilna, kivakna, kizenna, tangzanna, kipiakkhiat theihna munsanciat panin kipangkhawm ahi manin, Khawmpi picing mahmah hi. Tua in Minam khat hihna tawh mapankhopna hi a, Zomi-te Minam kician khat ih hihna hong kipsak hi.

 

* Nitumna lam pan a gamla pen San Francisco, Portland, Phoenix,
* Leitaw lam pan Miami, Houston,
* Nisuahna lam pan Charlotte, Jacksonville, New York,
* Leilu lam pan Buffalo, Chicago, cih US gam kiu li pan Tulsa khuapi zuanin Khawmpi hong siim laizom u leh nau khempeuh,
* Kawl gam pan Khawmpi hong siim Pu Gin Kam Lian leh azi Pi Ciin Khawm Cing, Sianu Cingsan, Makaipi Tg. Bia Mung,
* Khawmpi innteek ZIOK Kipawlna leh khuanu khuapa, nungak tangvalte

 

Na vekpi tung ah, Zomi Innkuan USA, Executive Committee pawl tangin zahtakna hong pia in, NAKPI LUNGDAMNA hong ko masa ingh. A sawtlo in Khawmpi Thupulakna bawlin akicing zaw in Lungdamna Thute hong suut nuamlai ungh.

 

GSKhup
President
Zomi Innkuan USA

 


Comments




Leave a Reply