WWW.TUNGZANGNEWS.COM

 
Mipi ai-awh ding kiteldan nam nih: PR kiteldan le SW kiteldan

Democracy gamah, mipi ai-awh ding kitelna om a, tua kitelna ah kiteldan nam nih om hi. Tua te in, PR kiteldan le SW kiteldante ahi uh hi.

PR kiteldan pen Mangpau in "proportional representation" cih kammal pan hong paing ahi hi. Hih kiteldan akizatna munah, party te in mee (vote) a ngahzah tawh kizui in Hlutdaw (parliament) ah tutna ngah ding uh hi. Gentehna in, Kawlgam bup ah mee zalakah sawmli (40%) a ngah party in Hlutdaw ah zong tutna zalakah sawmli (40%) mah luah ding uh hi.


PR kiteldan tawh akibanglo kiteldan dang khat zong omlai hi. Tua pen, SW kici hi. SW pen Mangpau in "single winer" cih kammal pan hong piang hi. Hih kiteldan akizatna munah, mee (vote) tampen a ngah party te bek in mipi ai-awh suak thei ding hi. Gentehna in, Kawlgam bup ah mee zalakah sawmli (40%) a ngah party in Hlutdaw ah, tutna zalakah sawmli (40%) ngah pah ding cihna hilo a, meetang tampen a ngahna munte bek ah, mipi ai-awh suak ding hi.

Gentehna dang khat en pak ni: Tedim-Tonzang-Cihkha pan mipi ai-awh ding mi thum kitel thei ci ni. Tualai ah, Thang Ho party, Lian Do party leh Leng Tong party teng kidem ci ni. Mee kingah teng pen a nuia-a bang ahi hi.
(1) Tedim pan: Thang Ho (33.2%), Lian Do (33.3%), Leng Tong (33.5%)
(2) Tonzang pan: Thang Ho (33%), Lian Do (33%), Leng Tong (34%)
(3) Cikha pan: Thang Ho (32%), Lian Do (33%), Leng Tong (35%)

PR kiteldan akizat leh: Thang Ho party pan mipi ai-awh (1), Lian Do party pan (1), Leng Tong party pan (1) cih bangin party khat pan mipi ai-awh khatta in tutna ngah ding uh hi. Banghang hiam cih leh, a meetang ngahzah uh kikhai lua lo hi.

SW kiteldan akizat leh: Leng Tong party in Hlutdaw ah tutna khempeuh avekpi in luak ding hi. Bang hang hiam cih leh, Tedim, Tonzang, Cikha mun kempeuh ah meetang atampen a ngah party pen Leng Tong party ahi hi.

Hih atung a thute i et tak ciangin, PR kiteldan kizang hi leh, akidem party thum te pen lungkim lel kha ding uh hi. Ahi zong in SW kiteldan kizang hi zenzen leh, Thang Ho party makaite leh Lian Do party makaite lungkim zo taktak lo kha ding hi. A thu panin, amau meetang ngahzah leh Leng Tong party ii meetang ngahzah pen tampi kikhai lo napi, Leng Tong party in tutna khempeuh luah gai ahih manin na sa mahmah kha ding uh hi. Tua ahih manin, Thang Ho party leh Lian Do party hong kipawl in Leng Tong party tawh hong kidem thei kha ding hi. Tualai ah, party thum pha nawnlo in nih hong pha ta ding hi. Thang Ho le Lian Do kipawl ahih manin meetang (60%) val hong ngah ding a, Hlutdaw ah tutna khempeuh amau tegel in hong luak leuleu ding hi.

PR kiteldan akizatna mun te ah, party khat le khat kipawl khawm nuamlo uh a, party neuneu tampi hong piang thei hi. Gentehna in, PR kiteldan a zangh Israel gam ah, tulaitak in , party 14 pha hi. SW kiteldan akizatna munte ah, party neuneute khatguak in ding zolo uh ahih manin, tua gamte ah, party lianpi nih bek om thei zel hi. Gentehna in, SW kiteldan a zangh USA ah party nih bek om hi.

Tulaitak in, Kawlgam ah PR kiteldan zat ding leh zat loh ding a kikup san laitak uh ahi hi. Bangbang hi leh, Kawlgam ah Democracy i ngah nadingin, ngaihsutna leh sandan kibanglo mite kikal ah, kitelsiamna leh kimaisakna lungsim a om ding kisam pha mahmah lai hi.

Theisakna: Theih man leh siam man hilo a, theih zahzah leh siam zahzah tawh hanciam in lai hong gelh ka hi hi. PR system leh SW system tawh kisai in, Mangpau tawh ahi zongin, Kawlpau tawh ahi zongin akician zaw leh a kicing zaw in a kigelhsa zong om kha ding hi. Ahi zongin, Zopau thupi sa ka hih manin, Zolai tawh hanciam in hong gelh ka hi hi. Kicinlahna te comment piakna tawh na behlap sak un. Lungdam.

Eng Mang (Zolei Vontawi)
12 July 2014

 


Comments




Leave a Reply