WWW.TUNGZANGNEWS.COM

 
Pa Pan Tapa

Ka ta aw,

A sawtlo in tangval pah ding na hita hi. Na neulaiin ‘ka liat ciang’ na cihcih hun a sawtloin hong tung ding hi. Tua hi a, hih lai ah na liat ciang na zat ding, kei zong ka khangno laiin hih bang thute hong kihilh hileh, ka cihcih teng kong hawm nuam hi. Limtak na ngai in la; na lungngai dide in.

Tuni in Lai Siangtho in khangno hun bang hi a, bang ci zatding a cihte hong gen kik sawm ka hi kei hi. Tuni in kong gennop thute pen keima nuntakna sungpan ka sin thute leh ka khangualte tungpah ka sin leh ka theihte vive hi ding hi. Pilna masa sak in. Bangbang na lunglut zong in pilna hong masa sak in. Leitung ah i neih i lam i mangsak zong in i pilna i theihna pen a mang theilo khat hi bilbel hi. I pilna pen i neihsun leh ei a, kei a i cih theih sun zong hipah hi. Bang hiam hiam cih leh nate leh vante in sawtto loin, i nuntakna ah manphatna tam neilo uhi. Pilna in khuapite lam in puah a; pilna leh thutheihna in na nuntakna baihsak ding hi. Na khangno hun pen a tamzaw pilna sinna hun ahihi. Nidang ciang na hun kicing nawnlo ding a, na manlah ding hi. Hih hun sung in na school laibute bek hilo in laibu tuamtuam sim in; a tam thei pen sim in. Hihte ka gen ciang in laibu sung bek ah pilna om hi a ci ka hi kei hi.

Pilna leh theihna i nuntak sung a ding a manpha thute pen i kiim i kiang pan zong tampi muh ding leh theih ding om hi. Na lawm na gualte, na innkuanpihte (kei bang, a gentehna in), na siate, thugen mite, nasem mite, lokho singpua mite, zum nasemte, sumbuuk bawlte, summeet bawlte, van zuakte, cih bang in midang khat peuh tung pan in sin ding thuhoih om teitei hi. Tua man in kuamah deidan leh simmawh leh thupit bawl tuam nei kei in. Amaute tungpan bang sin ding, theih ding nei ka hiam ci’n zong zaw in. Mite nuntakna na kin a, na kan ciang in; mite’n nang zong hong kin ding uh a, lawm na hau ding hi.

Pilna leh theihna na zong ciang in a manpha ding leh a kisam dingte limtak ciamteh in. Thu leh la nang a ding a hampha bek hiloin na veng na paamte a ding in a manpha hiam, amau a ding in siatna hiam cih kantel in. Na innvengpa siatna ding leh supna ding thu peuhma in nang zong hong susia ding hi. Pilna maanlo; hauhna maanlo in bangmah thupi go (legacy) nusia lo ding hi.

Itna nei in. Zomite pen Christian kici napiin zi ding pasal ding a zong uh ciang in a itpen leh ngaihpente sang un, a kilawm leh a kituak ding in kizong uhi. Jesu in a kituahpih ding a kilawmpih dingte bek hong teel leh bang i suak zen tam!  Nang tua bang khialna na bawlloh na ding in, thu khualna leh thumuhna tawh itna zong in. Nungak hong ngai khempeuh in hong it kimlo ding uhi; a kisam zaw in, nang na it ding khat theitel zaw in. Na it ding nungak zong teel masa thei hi teh. Lunglut bangmah a neilo nungakte peel in; sinnop theihnop a neilote naih vet ken! Women without any kind of hobbies are also often without any hope! Pasal neih ding bek a thupi sak numei in kiteenna a man ciang in a zo khin kisa in, bang mah dang a nuntak sung in sep ding bawl ding ngaihsun nawn vetlo a, a nuntakna ama a ding bek in zang hithiat in bangmah manphatna neilo hi.  Na it nungak in nang hong it leh mi hampha na hi a, na pilna, theihna leh siamna tengteng tawh tua na ki-itna uh khosak in keem in. Itna sang in manpha zaw omlo hi. Na pilna tawh itna zong in.

Na itna pilna tawh zang in. Na pilna, siamna leh hamphatnate nang a ding kia in na zang theih hi. Ahizongin tua bang nuntakna in manphatna neilo hi. Nang mah leh na innkuanpihte nopsak nading leh hauh na ding bek in na pilna siamna na zat leh angsungthei mi na hi lel ding hi. A taktakin tua bang nuntakna in a to a kho ding nuntakna hilo. Khangkhat, khangnih kaan lo ding hi. Na innveng na innpaamte in na hoihna, na hauhna, na pilna, na siamna hong hamphatpih theih keileh na neihloh hoihzaw ding hi. Itna tawh zong in, itna tawh a piakhia mi in mi hampha ahihi.

In short, keep away from promiscuous women, drugs and alcohol, bad literature and bad company, then you’ll be fine. Listen to your heart, when in doubt.

Hong it,

Na Pa

 


Comments




Leave a Reply