WWW.TUNGZANGNEWS.COM

 
Thai gamsung a pem Kawlgam pan galtaite (refugees) Kawlgam puakkik dingthu Thai galkap mangputal in pulak (July 13, 2014)

Nungkal sungin Kawl galkap mangputal leh Thai galkap mangputal te kimuh khopna panin Kawlgam pan galtaite vai zong deihtak kikum uh hi. Tua kikupna panin Thai kumpi leh Kawl kumpi in galtaite Kawlgam puakkik ding kithukim ta-ung cih Thai galkap kumpi makai Prayuth Chan-ocha in nung Friday ( July 11, 2014) ni-in pulak khia hi.


Prayuth Chan-ocha in agenna ah, "Gamtaite agam uh puakkik ciangin alemthei pen leh ahoihthei pen dingin koici vaihawm sakding cihzong kikum ung. Amau pen Thai gamah galtai in hongpem uhzong kum tampi sawtta a, suahtakna ngak in a-om zawh uhzong sawtlua ta hi," ci hi.

Asian Research Centre for Migration at Chulalongkorn University ah director asem Supang Chantavanich in kumpite in UN tawhzong akikup phot uh kulding hi ci hi.

Thai gam National Human Rights Commissioner nu Niran Pitakwatchara inbel hivai tawh kisai-in galtaite in a-ut uhleh Thai gamah omtheihna ahi zongin amau deihdan leh lunggulhdan zong kuppih kul hi ci hi. Tua banah athupi penah Kawlgamah kilemna taktak a-om phot kul a, tua khitciang galtaite lungmuang takin ciahkik thei panding hi cibeh lai hi.


Thai Action Committee for Democracy in Burma kipawlna panin Activist Myint Wai inbel Kawlgam nisuahna lamah Mines tampi omlai a, Kawlgamah Muslimte deihlohna nasia mahmah lai ahih ciang aciahkik Muslimte adingin nokkhaak nawngkaina piangthei laiding hi. Galtaite zong galkapte kihta a tai uh ahih ciang, galkapte kamciam muanhak sah mahmah lai-uh hi ci hi. Tua banah Kawlgam ciahkik leng nasep silbawl dingzong vai hamsakhat hongsuak hi ci hi.


Nunglam deuh in zong Thai galkap kumpi in galtaite milip simna nasia takin bawlkhin uh hi. Hihbang teng kawmkal ah, UNHCR panin gam thumna apaipai zong om veve sam hi. Thai gamin galtaite aciahsak nop uh sawtpi pek hi a, tutungin bang hongci vaihawm laiding uh hiam cih kithei nailo hi. Thai gamah galtai mi bangzah omcih atheinuam te adingin belhthuah ah hong khaksawn ing.

Sources: 
http://www.bangkokpost.com/news/local/420251/persecution-fears-grow-for-refugees
http://burmese.voanews.com/content/thai-myamar-refugee-to-go-back-to-own-land-/1956267.html

Thupuak,

Zam Sian Sum
Malaysia (Temp.)

 


Comments




Leave a Reply