WWW.TUNGZANGNEWS.COM

 
Tedim Post August 23,2014

A Weekly News of Zomi Youth Association - Tedim

Vol.1, No. 7, August 23, 2014 Motto: "Kipumkhatin mainawt khawm ni" Estd. 2014
 
Guest Editorial....
 
KA NEU LAI-IN HONG KISIMMAWH
 
"Ka neu lai-in hong kisim mawh" ci a a awng awngte hi takpi-in ka um hi. Banghang hiam cih leh tuni dong gengen lai uh ahih man hi. A neu lai a ‘Nap tolh pa...’ cih a lawmte’ kona pen a gol khit dong a gengen lai nap siak thei nailo khat bel aneu lai-in tolh mahmah kan ding ahih manin alawm naupang hon lakah gual lel lua ding cih bel ka um takpi hi.
 
Ahi zongin a gol khit dong zum huai ahihna, za-hhuai ahihna theilo a agengen lai a om leh aneu lai thu thei lo kan ding ahih manin kisimmawh takpi ding hi. Tua ahih manin, "Ka neu lai-in hong kisim mawh" acicite pen "Ong kisim mawh lo zaw lai sa-ing" ka ci nuam hi. Ih neu lai a kisim mawh phadiak i sakte ngai-hsun kik le hang bangmah ngaihsutna picing a nei nai-lo naupangte sim mawh nop ding teng mah hi takpi a, alawm leh gual lak a a gual neek het lo teng mah zong hi takpi hi.
 
Picin khit ciangin bel mi’ simmawh dingin nap tolh sak nawn loin nap siak sam leng kilawm hi. Nap siak nuam tuan lo a hong kisim mawh leh bel "Hong kisim mawh lo zaw lai hi…" cih ding mah hong suak hi. By Hang Khan Lian
 
 
LEITANG VAI TEDIM KHUAPI SUNG MIPITEKIMUH KHOPNA KINEI
 
Tedim - August 23 ZYA-Tedim makaihna tawh FBBC Hall, Lawibual veng ah Tedim khuapi sung a om USDP, ZCD, CNDP leh NLD party, Town Elders, SSS, LKK, LLYA, ZOZUUN, TYF, TTWF, Biakna makaite leh veng hausate kihelin CNF-te in Tedim gamah leitang neih ding angetna uh tawh kisai mipi’ lung hihmawhnate koi cih ding cih thu kam-kupna nuamtak nei thei uh hi.
 
Hih hunah MP Pu Kham Suan Mung in zong kihelpih thei hi, cih kiza hi. CNF in Tedim gam mun pawlkhat ngen uh hi, cih thu pen tusawng tengin mipi lakah hong thang pha mahmah a, Tedim Khuanu Khuapate in zong Township Administrator Pu Tin Myo Lat tungah diksaklohna lai phah khin uh hi. Hih thuthang hangin CNF-te in "Ka ngen kei uh hi…" ci-in gen uh hi.
 
ZYA-Tedim in USDP Party makaipi Pu E. Khai leh MP Pu Kham Suan Mung-te kiangah hih thu kantel dingin huhna kingen a, ngen mah hi, cih thu Hakha khuapi thuneite kiang pan kiza hi. Hih kamkupna a kihel khempeuh in Tedim gam sungah kumpi’ maban losiah mimal leh kipawlna ahi a, company min tawh ahi zongin leitang golpipi hong neih loh hamtang ding uh leh tangtawng pek pan a mun minthangte hong suk lamdang loh phot nading uh Chin State Chief Minister Pu Hung Ngai tungah mipi min tawh ngetna lai puak ding kithukim diam hi.
 
ZOMI FORUM NUAMTAK KINEI THEI
 
Yangon - August 23 ECODS (Penglam Khui bawlte) makaihna tawh August 23, 2014 (Saturday) ni in, YMCA, Yangon ah "I GAM, I MINAM, I MAILAM" cih thubulphuhin ZOMI FO-RUM nuamtak kineih thei hi, cih thu kiza hi. Hih forum ah media tuamtuam, MR TV leh 7Day News cih bang gamsung media tuamtuamte zong hih munah thu-kanin sa khengkhang uh hi, cih thu limlak tawh ECODS facebook laimai ah khah khia uh hi. Thugenpi Rev. Dr. Simon Pau Khan En, Pu Chin Sian Thang, Pu Hang Za Thawn leh Pu Thang Cin Thawng te hi uh a, tha kingah mahmah hi, cih thu ECODS makaite tungtawnin kiza hi.
 
TEDIM ZATOPI AH SIAVUAN TUNGTHAK
 
Tedim - August 23 Tu nipi kaal sungin Tedim Zatopi ah Special-ist Siavuan 3 hong tun beh hi, cih thu zato nasemte tung panin kiza hi. Tua Specialist sivuante in: Dr. Nan Mu Huam (Anaesthetic/mih si), Dr. Kyaw Htet Htun (Tamadaw), Dr. Vel Chin Sang (Surgeon) te hi uh a tu-in siavuan vekpi 6 pha ta hi. Tulaitakin Tedim zatopi ah nasem khempeuh 68 pha uh hi.
 
TEDIM KHUAPI SUNG INN KILAMTHAKTE
 
Tedim - August 22 Meiphelh Zum Leh Mawtaw Koih Nading In-npi : Tedim khuapi, Khualai veng a om Meiphelh zum inn ding leh mawtaw koih nadingin Pu Tunta’ Com-pany in dawl nih apha innpi hoih mahmah khat Ks. 160000000/- tawh kumpi tung pan alamsan laitak ahi hi. Meiphelh Nasemte’ Omna Ding Inn: Meiphelh nasemte’ om nadingin Ka Zaitha Company in Ks.50000000/- tawh inn khat, My Sunlower Company inKs. 45000000/- tawh inn khat mah alamsan lai tak hi hi. Tedim Upadi Zum Inn Ding: Ka Zaitha Company in Ks. 20000000/- tawh Upadi zum inn ding khat Kam Hau tualpi sak zangah alamsan laitak ahi hi.
 
ZDF CIDAMNA TRAINING NUAMTAK KIZO
 
Tedim - August 21 Zomi Development Foundation (ZDF) makai-hna tawh July 10 – August 20 sung teng kumpi zato om nai lohna khuate pan mi 10 teng khia-in ZDF HeadOfice, Tedim ah kiallap cidamna lam siamsinsakna training nuamtak kinei thei hi. August 20 ni-in Train-ing Mahialna abawl khit uh ciangin health center a om nailohna Zogam khua tuamtuamah nasem dingin kuan pah uh hi. A khawnkhong man ngen lo zato, ci-in Zampi khua ah zato khat hong khin uh a, zatui zaha zong man ngen loin cinate kibawl ding hi, cih thu ZDF Makaipi Pu Paul Pau’ tungtawnin kiza hi. Contact: 0947072124/ 09400534523. (Sia Paul Pau)
 
2015 KITEELPI ADINGIN MALEP NASEPNATEENCIANKIK
 
Tedim - August 21 Union Election Commission makaihna tawh In-ternational Foundation for Electoral Systems (IFES) sumsikin Tedim gam kumpi nasem tuamtuamte, CSO-te leh Biakna makaite pai khawmin Tedim Mangpi Zumah Pioneer Project kici 2015 Kiteelpi ciang a thu-man leh thudik om theihna ding pilsinsakna tawh kisai sepnasate etciankikna workshop khat August 21 ni-in nuamtak kinei thei hi.
 
Hih pilsinsakna program pen American mipite’ huhna tawh TSI leh Hornbill –te makai-in Myanmar gambup ah mun thum - Tedim (Chin State), Ah Lone (Yangon) leh Myitkyina (Kachin State) ah akinei hi a, hih kiteelpi malep nasepna khuapi thumte lakah Ted-im pen athangah huai pen khat hi, ci-in makaite in gen uh hi. Hih malep nasepna athupit diakna ah mipi lam pan suakta takin kihel theihna leh thusun theihna hun-pha ahi hi. Mimal kim in vote thupitna telcian a, anavak mipite hih theih nadingin hi bangin pilsinsakna akinei ahi hi, ci hi. Vote gu sim, behlap sim, mimal kizawhna om lopi a vote piak ding kihahsawlna leh kumpi nasem hih man a vote piak nading kivau khol cihte pen 2015
 
ciangin om nawn lo ding a, mimal kim in suakta tak leh lungnuam takin eima’ deih party zui-in vote piak ding ahi hi, cih pen "Free and Fair Election" thulupi sung pan ngimna ahi hi, cih thu election commission zum pan gen uh hi. Hih kigin kholhna nasepna hangin Tedim gam ah mipi 8614 in amau’ min leh matpongten diklote puah pha thei uh ahih manin sep taak mahmah hi, ci hi. Hih Workshop ah IFES panin Mr. James Meisenheimer le alawmte, TSI pan Director Sia Kapno le anaseppihte pawlkhat zong hong kihel thei uh hi.
 
Laisim mipite kiang pan...
Dear Editor, Tedim khuapi sung Khualai veng a om ZO LENGTHE naipi tau phung tengah mi pawlkhat in zun pheng thak gawpgawp uh in kilawmlah sa peu-hmah ing. "Ganhingte’ zun thak nading…" cih lai khat na suang deda ding ka hia? Zo Lengthe akem kua a le? (Pa Ngul Mung)
 
SAPNA
ZYA - Tedim makaihna tawh anuai a hungeel-na om bangin "Open Talk on Literacy Facing Zomi Youths Today" kinei ding ahih manin lai lam nasep alunglut khempeuh kong sam uh hi.
 
Amun : CSO Hall, Zogam Villa, Sakollam Ahun : August 31, 2014 (Sunday 2:00 PM)
Laigelh siam mipil Sia G.S Pau in sharing hong makaih ding hi.
 
ZYA TAWH KISAI ZAKSAKNA
 
Zomi omna peuh ah Zomi Khangno Kip-awlna om ham tang ding, cih pen Zosuan Tuailai Khawmpi pan lunggulhna ahih mah bangin Khuapi khuata khempeuh ah Zomi Khangno Kipawlna nei kim ciat dingin ih kihanthawn hi. 2015 ciang Zomi Khangno Khawmpi khat bawl kik ding kisawm hi. Pawl kilam daan leh ki-makaih zia ding zong tua hun ciangin kikipsak ding hi. Khua lam khangno kipawlna anei theite in ZYA-Tedim tawh contact address omsa bangin nong kizop ciat nading uh kong thum uh hi.
 
LUNGDAMNA
Tutung Tedim Post laihawmna sumbei khempeuhSiamah Hau Suan Huai Auditor, ZYA - Tedim te innkuan in hong sik uh hi.
 
THEIHSAKNA
•TEDIM POST pen 2014 kum sung tengman ngen loin hong kihawm ding a,2015 pan laidal man hong kingen ding hi.
•Tukum sung a angahte peuh mahhong la suak dingin hong kilamen hi.
•Hawm khat copy 2000 ciangin Ks. 30000/-kiciangtan a, huhna pia nuamtelungdam takin kisang ding hi.
 
Published by Pa Tuang Gin Mang (Gi Gin), President, ZYA-Tedim, Lawibual - 32, Kam Hau Road, Tedim. Ph : 50562

 


Comments

09/26/2014 05:04

mawtpaj

Reply



Leave a Reply