WWW.TUNGZANGNEWS.COM

 
The Last Letter of James Foley


James Foley in ngawngtan a thuak madiak in a innkuanpihte hibangin a nawnung pen lai khak hi. James Foley pen Syria gamah Muslim ISIS ten zan diak in a ngawng tan sak uh hi. (Siam man hizaw lo in deihsakna tawh ei kam in hong let khia ka hihi. Khialhna om ding hi, nong na maisak un! Kipan ta ni ei le...)

Ka it mahmah ka innkuanpihte leh lawm leh gual teng aw,

Van kizuakna munpi ah ka pa leh ka nu tawh Motorcycle saupi tak hawl a ka vaak lai khawng uh phawk mahmah ingh. Tua banga innkuan a hunnuam ih zat khop laite ka mangngilh ngei kei a, ka ngaihsut khak ciangin ka lungsim sung khempeuh nuamna tawh kidim a hihman in tulaitak a ka omna thong (Jail) sungah sih ding bek ngak a om ka hihlam bang ka mangngilh kha liang zel hi. No zong ong mangngilh kei ni uteh cih zong ka tel a, a diak in thu na nget sial un kei aa ding a tuam mahmah in thungen den ni uteh cih zong thei ka hihman in ka lunguam in no tungah lungdam kong ko nuam hi. Ih omna a kilamdan khit hangin no mau mah tawh a om khawm den bangin ka kingaihsun a, sih ding bek ngak a ka omna hih thong sung khuazing lak panin thu ka nget simin na khut te uh a len den mah tawh ka kibang hi. Tua ngaisutna in ka lung hong nuamsak bek tham lo in na thanem lohna ding vua kong thunget sak nopna tha zong hong khauhsak hi.

Ko hih thong inneu sungah mi 18 hong kikhum hi. Cikmah hun in cim cihbang om ngei lo hi. Nisim hun sim in ka muh bangbang utawh ka kimawl uh a, thu leh la tampi kikum in tangthu saupipi ka kigen uh hi. Chess, Chekers, Risk cihte kimawl in kidemna ka bawl den uh hi. Thugen khong kidem in ka ciak khengkhang den uh hi. Hih bang teng hangin ka hun uh mawk bei cih om ngei lo a, a nuam lopi mah nuam asa bang kek khat in a noplohna teng khempeuh mangngilh theih ding ka hanciam uh hi. Lamdang mahmah hi.

Mihing ngeina mah bangin khatveivei thenem ni leh thakhauh ni zong om veve a, a diak in ko lak pan a suakta ka om uh ciangin ka kilungdam pih mahmah uh hi. A taktak in cileng ko a suakta nai lo tengin zong ka ngaklah mahmah uh khat bek om a, tua pen Suahtaakna bek mah ahihi. A thanem tuan deuh ka om uh ciangin tha kipia in lametna ka kiguan uh hi. Nidang sangin ka nek ka dawnte uh zong lim zaw deuh ta hi. Niangtui leh khatveivei Coffee zong ka ngah thei zel uh hi. Kei bang ka ankam lim ahihman in nung kum a ka gih zah mah gik kik zo liang dingin ka kilamen hi.

Sanggam teng aw hong phawk mahmah ingh. Khuazing sungah Michael tawh Werewolf kineih a ka vaak thap lai khong uh mangngilh thei kei ingh. Mattie leh T tawh anbuuk sunga "Seng Seng" ka kineih lai khong uh ka mitkha ah thaam den lai hi. Mual liamsa hunnuamte ka ngaihsun kikkik a ka lung lah leng in ka lung zong nuam hi. Ka bank laibu sung na en unla sum a om lai leh a vekin Michael leh Mattie na ki kimhawm sak un maw. Lawm Michael aw ka naupan laiin hunnuam ka neih theihna pen nang hang bek hi, lungdam mahmah ingh. Ka gol khit ciangin hunnuam hong pia Kristie tungah zong lungdamna lianpi ka ko hi. John aw nang zong hong phawk mahmah ingh. Cress tawh Germany na omlai vua kong hawh laite mangngilh thei keng.

Maitai taka nong zindona uh hangin ka lungdam hi. RoRo zong ka phawk lai mahmah hi. A tapa Jack bangci ciang tung ta ahia? A gol khit leh a pa RoRo mah suun hamtang in teh maw!

Nuam mah si e maw no tawh ih kikholh lai hunte! Sanggampa Mark aw nang zong ka lungsim sungah na mang ngei kei hi.Na tenna nitumna gam vuuk omna lamah nuam takin na om ding lamen ingh. Nang tawh Boston khuapi sunga Comedy Club ah ih va lut lai khong leh ih pusuahkik cianga deih tak nong pomcip lai khong phawk mah sing e maw. Tua ih hun nuamte in tuni ciang dong lametna ka lungsim sungah hong nosuah sak zo lai hi.

Katie...nang hangin kei dinmun sang a tung zo ka hihi. Ei lakah nang pen ahoih pen leh a thahat pen na hihi. Kong paaktatna cikmah hun in bei thei ngei lo ding hi. A citak leh nasep a hanciam mahmah khat in kong ciamteh a, mi dangte itna tawh a kem a khoi den mi khat na hihi. Kei hong kimat madeuh in ei gel phone sungah SMS tawh ih kiho zal khak pen manpha ka sa mahmah hi. Na mopawi ciang kong kihel hamtang theihna dingin thu na ngengen ingh....ahihang hoih tak ngaihsun leng ih pi bangin ateek khin hileng kilawm kisa ta ingh!!

Pi aw... na zatang te hunman in na neek ding mangngilh ken maw. Nisim lamsiau den inla, na tha hatna dingin zong na laam zel in maw pi. Kong ciahkik ciangin na zawlnu Margarita kiang ah ong hawh pih ding hi'ng. Tua na ut leh cidam ding leh thahat ding na hanciam in, tua pen kei nuntaakna dingin zong thupi mahmah hi!

Jim

A let khia:Lam Thang (Zomi Quavadis)

 


Comments




Leave a Reply