WWW.TUNGZANGNEWS.COM

 
Kong it Zomi khangno khanghaam a kua maciat:

Ih Zomi tanu tapa (Zota) te sung ah ZoTA a kici Zomi Tennis Association or ZTC a kici Zomi Tennis Club a cih a om lam na za kha na thei kha ngei maw? Na zak ngei kei leh za ngei kei kha mah niteh. Ken zongh za ngei kei ingh. Om naai lo hi ding hi. A om khit zenzen leh bel hong maaisak un.


Sanggampa Thomas Tuangpu in Zomi North Cup (Soccer or Football) tawh kisai lai hong khah khiat ciang iin ka lungsim sung ah Soccer or Football te ban ah Zomi sung ah Tennis zongh Zomi makai te in hong lamsaang (promote) le ucin ka deih mahmah denna hong pulaak nuam ingh.  


US Open Tennis peen August 25 ni pan September 8, 2014 kikaal sung teng hi aa ih zo pah kei ahih zongh iin US Open Tennis ah Wildcard beek tawh a kihel zo Zomi nungak tangvaal (lia leh taang) khat leh nih beek hong om leh kipakk zen si ning ee cici kha ingh. Bangh hang hiam cih leh CiCi Bellis a kici Catherine Bellis peen kum 15 a pha US nungakno khat hi aa leitung aa numei tennis siamte lakh aa top 12na nungak khangcingsa khat Dominika Cibulkova, peen, 6-1, 4-6, 6-4, best of 3 ah 2-1 iin zo hiau mawk hi. A thu a sim beh nuam te in a nuai aa link pan na sim beh un. 
http://www.nytimes.com/2014/08/27/sports/tennis/us-open-ana-ivanovic-samantha-stosur-john-isner-eugenie-bouchard-petra-kvitova.html?_r=0 


Ka sunmang (daydream) ah tu laai Zomi lia leh taang te peen pil thei, siam thei, hat thei, tei thei mahmah ihihmanin ih tanu ih tapa te sport a kin a om khak zenzen leh tennis ah pantah lengg leitung bup aa a minthang, Zomi lia leh taang,tennis superstar a sawt lo iin (kum 5 pan kum 10 sung iin) nei thei ding hihangh. Banghang hiam cih leh Tennis ih cih peen soccer/football pai zia tawh kilamdang mahmah hi. 


Football or Soccer ah regional level, national level, etc. ah Zomi khat ih kihel theih nading iin team member mi 11, leh reserve tawh 14 or 15 sung ah hong kiteel kul aa a siam tampi te lak ah ih siam mahmah veve ahizongh'n hong huhding mi (background) ih neih kei leh soccer/football tawh Zomi lia leh taang te khat peuh a hong kiteel ding peen lamet huai het lo iin a minthan theih nading 0.001% zongh om lo hi. Piiang ngei vet lo ding hi a ci nuam phial hi'ng. 


Tennis peen tua bang hi peuhmah lo hi. Uuk takpi peuh le cin kisin, kisin, kisin, kisin, le cin siamsem, siamsem,siamsem,siamsem sem iin single or double ahizongh'n na hanciam nak leh tennis player minthang na suah theih nading lampi hoih mahmah hi. Hong deihsak, background, meel theih cih kisam vet lo hi. Tennis court ah na kimawlna ah, Tennis Club ah na kimawlna ah zo toto peuh le cin politics (nainganyay) om peuhmah lo iin nang leh nang kilamm to iin kuamah in hong nencip theih zongh hi peuhmah lo hi. Na hanciam nak leh leitung bup ah mi minthang leh mihau khat a suak thei ding hi teh. "Seen leh kik theih lengh maw" ci iin kei bang khangno kik nuam phial ingh. Naaupang kik iin khangno kik lengh tennis hoih tak kisin nuam lua ingh peuh ci thei ingh.  


Zo lia leh taang khat peuh in tu kum US Open tennis ah Champion a ngah ding iin sehpong hiau lengg kaal 2 sung iin a nuai aa zah sum ngah thei ding hi. Single hi taleh double hi taleh numei leh pasal a sum ngah zah uh kibang hi. Pasal te best of 5 kimawl aa numei te best of 3 bek kimawl sak hi. Ki zomh lo pi iin genpak lengg numei pasal equality ci napi prize money bek ki equal sak in a kimawl tanvei uh a ki equal sak loh uh peen makai te in equality cih a ngaihsut dan uh tuamdang sa sim pian ingh. Bangbang ahizongh'n a letsong (prize money) ngah ding uh peen:


1. Single champion $3,000,000.00; runner up $1,450,000.00 
2. Double champion per team $520,000.00; runner up $250,000.00
3. Mixed double champion per team $150,000.00; runner up $70,000.00
4. US Open Tennis ah kimawl di iin luut thei himhim aa first round ciang bek ah zongh a lelh pah mah leh zongh $4,551.00 ngah laai veve hi. 


Ka khialh khak leh a kicing zaw aa a sum ngah zah ding uh a dangdang te zongh a thei nuam te ading iin a nuai aa link pan na en un. 
http://www.usopen.org/en_US/about/history/prizemoney.html?promo=sitemap


Tua ahihmanin Zomi u leh naau, lia leh taang, suan leh muan makaite aw, ih Zomi khangno te mi minthang mi hau hong suak iin Zomi a hong laptoh theih nading uh sport lam ah Tennis peen a hoih peenpeen khat iin mu kahihmanin Tennis zongh hong lamsaang unla, ZoTA or ZTC cih bang dan kipawlna hong sawm khia iin hong geel unla kum sim iin kidemna pawipi hong geel le ucin Zomi laptohna khat a hong piiang thei ding iin lamen ingh. Hih Zo lia or taang khat in a sawm aa khat peen ama it pawlpi ah hong khia leh $300,000 hi ding aa second tithe, a sawm aa khat a nihna peen Zogam ading iin hong khia leh; tua ban ah hi bang Zomi lia paal taang paal tampi pantah iin nei zo lengg, ih Zogam hong paallun dinghi. 


Hih peen sport lam pan ih Zomi lia leh taang te ading ka deihsakna tungtawn aa ka sunmang (day dream) hi. Genkhialh a om leh hong maaisak ciat un.


Deihsakna tawh laigelh,



Mungno (Gin Sian Mung Gualnam)
Riverside, California
Phone (Cell) 951-403-8319
Phone (Office) 951-509-2370
 


Comments

04/27/2017 03:08

It is good to know that you make the vocation days so perfect and for this purpose, you make the bath, especially for the women. Your vacation tips are very handy and very different. It seems that you have done study of the tourism.

Reply



Leave a Reply