WWW.TUNGZANGNEWS.COM

 
Sanggamte,

Zaanni suun 12 kiim-in Melbourne Khuapi huam, Sunshine khuatual-a ateeng Zotungte kum 30 pasal khat-in ama' teenna inn mahmah-ah kisuklupna nei-a, palikte-in aluang tungtaang aveelcian, akancian laaitak ahihi.

Athu kizaakna ciang-ah, amah-pen lungkham kisa-a zudawn theizeel hi-in, zaanhal nitaak-in tam dawn mahmah cihthu alawmte' kiang pan-in kiza ci-in Pa NaaMung' tungpan-in thu kiza-hi.

Behlapna:

Zu-pen -ol tawh akhawl, akuangthei daat namkigawm (compound ၿဒပ်ပေါင်း) hi-a, ataangpi formula-pen CnH2n+1OH ahihi. Mihing pumpi sung-ah akisam zahvaal daat aluut ciang-in adiak-in akhu nam leh akuangthei acid nam kithuahte aluut ciang-in adiak-in khuak sung-a naseem ahi mit-tawh muhzawhloh neuron billion 100 kiim agamtaang ziahziahte' sung pan-in honpi khat si sak, that ahihkeileh ihmu sak ahihman-in ngaihsutna damdam-in kiam, lungduaina, thukhualna, khingkhaina, cihte theihloh kaal-in kiamkiam-a, aveite-in akiamlam theilo uhhi. Tangkaap (direct)-a asukkhaak-pen tua akuangthei daat-in pumpi sung-ah tui aniim kelhkelh bek-tawh acidamthei sinn (liver), tuap (lung) cihte' tung-a tuipaai kilhkelhteng huupkang ahihman-in sawtlo-in tuap leh sinn-in apaai/aneih ding zah tui nei nawnlo ahihman-in anasep athasaan zahding azah nih/thum/lii cihbang-in thasaan ahihman-in tuap leh sinn dammawhna lianpi lawh-a, atawpna-ah sinn bawk, meima, damdam-in beibei (banghanghiam cihleh tui-tawh akilamh-hi), tuap-zong tuabangmah-in pumpi kisiatna lianpi lawh-hi.

Khua lamsang-ah, zu atam ziak-in neuron te-in anasep zahding aseploh man-in adiak lungkiatna, lungkhamna, sinkhamna, sintawlna ziak-a zu adawn mi-in lungsim noptuamna ngah-tuam peuhmah lo-a, zu sung-a daatkhu ziak-in bangmah theilo milmel-a a-omsung alungnuam kisa-kha hizaw uhhi. Tua thamlo-in, zu-in lungnopna apiakloh baan-ah, neuron te hemhem/beibei ahihman-in sintawlna tung-a dozawhna leh thuaksiamna bei seemseem-in atawpna-ah kisuklupna (suicide) ciangdong hongtun thei-hi.

Zomi khangnote-in naakpi-in I-ciin siam ding-a ka' lunggulh mahmah thu-in;

Zu-pen lungnopna hong guanthei sil hilo-a, tua zu sung-a akuangthei gas leh acid khute' ziak-in khuak hong hul/kaangdeeu ahihman bek-a aki-am milmel hi-a, tua I' ap milmel hunsung neuron bangzah sia/si cihte naakpi-a theihhuai leh phawk-huai, kidop-huai ahihlam phawkding naakpi-in ka' lunggulh-hi. Wine hitaleh beer hitaleh alcohol akici akuangthei daat leh gas akihel vive hi-a, khuak azo mahmah guu vive ahihi. Tua hi-a, zu-in adiak-in Zomi khangno khanghaam kuamah deidan lo-in hong suksiatna tampi takmah tuakkha khinzo I-hihman-in kidop-huai mahmah-hi.

I' suutzeel mahbang-in Zomi sung-ah unau, lawmta, beh-khat phung-khat nangawn kithahna dong-a khutkhialhna hong lawhtaaksak-pen atamzaw zu ahihi. Zu-in nulehpa' maai-ah hong kitom ngam sak-a, gen ngamlohding thute, sep ngamlohding nate hong gensak, hong seemsak tawntung-hi. Alungdamhuai thu khat-ah, Melbourne-a Zomite' lak-ah zu-tawh abuai kuamah kiza khalo ahihman-in angtang hang!

Bangbang ahizong-in zu-in I' tu I' tate hong guuksak loh nading naakpi-in mapang ciatni!

Thupuaksawn,

Zokhai

 
***********************************************                                  
T. Zokhai          ITNA-IN GUABANG HINNA-HI        
60 Narr-Maen Drive                                                            
Croydon Hills VIC 3136         
Melbourne, AU                   
Tel: +61 39723 0460                                      
Mob: +61 420 800 560                          
***********************************************
 


Comments




Leave a Reply