WWW.TUNGZANGNEWS.COM

 


Mihingsa a kine takpi mah hiam?
August 19,2014 in website sung khat ah News Reporter khat in mihing sa pen China leh Taiwan gamah aksa zuak bangin kizuak hi ci in gelh hi. Mipite'n a up loh khak ding uh lauhna tawh alim naleng in zong suak sak hi. Tua milim kipost a mu khate genna ah "Tiongkok khuapi sunga sasai khat ah mihing phei, a liang, a banbul, a lu, a ngawng cih bangin kikhen tuam a,mipi lei theih ding in kikhai zihziah hi" ci uh hi. Mihing sa tektek ah numeite sa mah pasalte sa sangin lim zaw a, a man zong kikhai mahmah hi. Numeite nawibu lim pen a hihman in manpha sak mahmah uh hi ci lai uh hi.

Ahizongin tua Article manglai tawh a kigelh a sim khate genna ah "Hih article pen mi mawkmawk khat in a upmawh thu a gelh hi ding hi. Bang hang hiam cileh a Mangkam laimal zat leh a Grammar zat dan zong maan het lo hi" ci ta leuleu uh hi. Mipi lausakna dinga kigelh mawkmawk hi lel in mi tampi in ummawh uh hi. Hih lai asim mipil khat Alex Delarge in bang gen hiam cih leh "Mihaite lo buangin hih thu um lo ding hi" cihsan ziau a, Nica Alday in hibang in behlap hi, "Tua mihingsa kikhai te ka en pha pha a, a lu leh amaitang zong ka et niloh hangin Chinese mel suun khat zong om lo hi. China leh Taiwan khuapite sunga mihing sa kizuak pen amau minam mah hiding a, midang hi lo ding hi" ci hi. A kibawltawm hilel inteh, mihing sa taktak zong hi ken teh aci nuam ahi tam maw!

Tua thu tawh akibuai mahmah laitak in website dang khat ah Article dang khat alim mah tawh na ki post leuleu hi. Tua Article sungah bang kigelh hiam tawmcik sim zual dih ni. "Naungeksi te sa, a diak in a nu gilsung pan a akitolhsak naungek khangcing nailo te sa manpha mahmah hi. Bang hang hiam cileh tua naungekte pen Soup in bawl in dawn den zo lehang kithahaat mahmah hi. Pasal Sex lam thaneemte in dawn leh kilamdang zo lian uh hi" ci-in kigelh ta leuleu hi. Mipi up theihna dingin pasal khat in naungek Soup a dawn laitak lim zong kidawk sak uh hi.Naungek khat ciangin $50 pan $70 tawh kilei ngam hi ci sawnsawn lai uh hi. Alim ngiat tawh a kipost ahihman in Scotland Yard thukante leh FBI te'n limtak sawtpi sung a sulzuih khit uh ciangin tua Article gelhpa mukhia uh hi. Amah pen Chinese minam hi in, amin Zhu Yu ahihi.

Tua leh ZHU Yu icih kua hi mawk hiam? Zhu Yu pen limsuaih siam mi minthang khat ahihi. "Mihingsa ne mihing"cih thulu tawh lim a suaih pen Shanghai khuapi sunga kibawl Arts Festival pawipi sungah 2000 kumin nasia takin lak khia hi. Tua ni a kipan tua tawh kisai ama limsuaihte mun tuamtuam ah kipuak hi. Tua tawh kisai Documentary a kibawl khat pen 2003 kumin UK ah kilak khia hi. Nang zong Utube panin na muh nop leh "Zhu Yu - Eating people " cih na mek lecin na mu ding hi.

A tunga ih gen nihte a kiphuaktawm ahiphial zong in, thumaan khat om hi. Tua thumaan pen mihing pumpi sunga omte (Kal, Lung, Mit cihte) pen a kisam khat ii zat dingin ei thukimna tawh kipia khia thei hi. Ahizongin tuate pen a kizang sawn ding bek a kipia hi in midang khat peuh in sathau tawh kanggam in a neek ding hi peuhmah lo hi. A tuimawl hawp dinga kipia khia zong hi lo hi. Hih thu tawh kisaiin China Times tadensa sungah July kha sungin mi 12 kiman in, Gingshashu leh Nanchang khuapi sunga thukhenzum kitun a thong sung kidenna pah cih thu kigelh hi. Hih mi 12 te makaipa min pen Chen Fung ahihi. Amau pen hibanga sumbawl akipat uh sawt nai lo hi, ahizongin October 2011 pan February 2012 sung a sep pak uh pen $ 253,500 ngah man ziau uh hi. Chen Fung in China gam sunga Siavuante tampi tak kizoppih nei khin hi. (International Business Times)

Francis Lamthang (Zomi Quavadis)


 
--Patriotism means to stand by the Country. It does not mean to stand by the president or any other public official. - Theodore Roosevelt.


__._,_.___
 


Comments




Leave a Reply