WWW.TUNGZANGNEWS.COM

 
Picture

Washington D.C Area ah Khuado pawi nasia tak leh picing takin kibawl

Kum sim aa i kibawl den Zongeina "Khuado Pawi" pi pen Zomi Innkuan Washington D.C Area (Zomi D.C) ii makaihna tawh D.C Area ah September 27 ni in Savage, Maryland ah nasia tak leh picing takin kibawl aa, tualai ah D.C Area om Zomi taampi hong kihel thei uh hi. Tukum Khuado Pawi pen Zomi D.C makaihna tawh akibawl zawh 13 veina hi ta aa, Zomi D.C kipawlna phuhkhiat zawh kum 13 cinna, kum cin kikhop zong hi pah hi. Tualai ah Zin Mangpi dingin Kawlgam pan Pu Gin Kam Lian (General Secretary, ZCD/ZNC) leh a zi Nu Ciin Khawm Cing te hong kihel thei uh aa, Pu Lian ii thu genna zong zaknop kisa in tha kingah mahmah in, i minam itna hong khangsak tek tek hi. Tua bek thamlo in Special Guest dingin International Republican Institute (IRI; http://www.iri.org/) pan palai Mr. Sai, 8888 new generation group pan palaite leh VOA News pan palai te zong hong kihel thei uh hi. VOA pan Khuado Pawi vai interview bawlna zong hong nei thei uh aa, leitungbup ah "D.C Area Zomi Khuado Pawi" bawlna News zong asawt loin hong khahkhia ding uh hi.

Khuado hun sungin Zolam lahna, Zola sakna, Achievement Award piakna, Special Letsong hawmna, Zomibup aading, Siamsinte aading leh Zomi D.C makaite aading special thu ngetsakna, Lucky Draw sawkna leh gualnopna tuamtuam te kinei thei in, hong pai akuama ciat in nuam kisa mahmah hi. Tutung Khuado Pawi pen kum dang te sang mi kitam zaw aa, D.C Area Zomi te bawl Khuado Pawi laak pan mi atam pen hi dingin kiciamteh hi. Tukum Zomi D.C khuado pawi ah mipi nek ding Vok taalpi khat leh Bawngsa teng pen Khan International Intercession Ministries (KIIM) pan hong sik uh ahih manun amau tung nakpi takin ki lungdam mahmah hi. Tua bek thamlo in hih Khuado Pawi aading sum leh paai tawh ahi zongin, nek leh dawn tawh ahi zongin, thataang tawh ahi zongin, mun tuamtuam pan hong huh, hong panpihte khempeuh tung Zomi D.C pan lungdam kiciamteh hi.

Hih "Khuado Pawi" pi in "Zomi" i hihna hong kilangsak bek thamlo in, i minam itna hong khangsak tektek hi. Tua bek thamlo in, i "Zomi" hihna zong hong kipsak ahi hi. Tua ahih manin Zomi ten i tun tun na ah i ngeina kemcing in, Khuado pawi te zong i om om na ah, i bawl theih ciat ding thupi mahmah hi.

Zomi D.C News group
Information Department
Zomi D.C

View D.C Area Zomi Khuado Pawi Photos:
https://picasaweb.google.com/osmung/DCAreaZomiKhuado2014Photos
 


Comments

02/02/2017 06:33

What a fantastic publish! Other than the seriously helpful ideas, it really is just really ! Thanks a great deal in your strategies!!

Reply



Leave a Reply