WWW.TUNGZANGNEWS.COM

 
Malaysia Zomi Khuado 2014 Ka Siimna - 1

 


Zomi Association of Malaysia (ZAM) makaipa Sia Hau Khai in tukum Zomi Nam Ni ka hawh lai pek pan 'Tukum Khuado zong hong siim phei kik un maw' ciin hong vaikhak khin ahih manin kumbul pek pan ka lungsim ah Malaysia ah Zomi Khuado siim ding cih ka koihsa khat ahi hi. Kumlui lamin Zomi lasiam Lengtong Go Lian leh Zomi engineer Pa Pau Khat Suan te in uap ngei uh a, Singapore pan Zomi Innkuan Singapore (ZIS) makaipi kum tampi a sem Pa Hang Khan Lian in zong va uap zel hi. Nuamlo hileh mi hihteng in va uap hetlo ding cih thei ka hih manin kei zong tukum va kihel limlim ding ciin ka lungsim ah khentatna khat ka neih kholhsa ahi hi. 

Zomi te kum hong paipai in tukum zong kumlang bang a pai khit ciangin upmawh leh lametsa mah bangin ZAM panin ZOMI KHUADO a bawl ding thu uh leh a siim thei peuhmah a siim dingin a sapna uh zong ka mu kha hi. Keimah mimal mahmah in zong hong deihsakna uh kamsiam ngah kha ka hih manin ka hih theih leh pai ding ciin ka hanciam tentan hi. Ahi zongin vaite hong lem thei ding maw lem theilo ding cih pen kei khut ah omlo mawk hi. October kha hong det ciangin kei zong ka zinkhiat theih ding leh theihloh ding ka seppihte kiangah ka gen leh a sawtna ciang hong lem bilbel a, lawmte tawh themkhat kibelhei in, ki-awnghu tuah in tua bangin a pai thei dingin ka kilemta hi. 

Paipih dingin Zinmang dinga kiseh Pa Hang Khan Lian tawh ka kithuzak uh hang amah sun lamin pai thei a, kei zan hun beka zinkhia thei ding kahih manin ka kiton thei kei uh hi. Ahi zongin Zomi lasiam khat ahi Eric Suan Za Tuang tawh a ton thei dingin hong lem liamliam a, Zomi Geologist tawh ka ton ding ka kisak pen Zomi Engineer khat tawh a ton thei ka suakzaw hi. Tua bek hilo in Eric Tuang te khuapih Zolia khat zong Malaysia ah zin dingin hong zui a, mi thum ka pha uh hi.  

1. Kithawi Kholhna leh Zinna: 
Ka vanteng bel zankhat giak, sun khat taam ding hilel ka hih manin leh Singapore pan Kuala Lumpur pen Bus tawh nai 6 sung bek kitai hilel ahih manin ka kithawi luat ding a om het kei hi. Zopuan khat leh Zopuan tawh kibawl ngawngawh, pheituam tual leh taih khedap, mainul leh lampi ah dawn ding tui thawl hipen hi. Ka pai ma un ka ciahkikna ding uh Bus ticket hong leikholsak ding leh ka tun uh ciangin a sum lehkik dingin Zomi makaite huhna ka ngen a, phunlo paulo in hong leisak uh a, ka va tun taktak uh ciang a sum ka leh kik sawm leh hong sang nuamlo ta sawnsawn uh a, ka kamsiam khempeuh tawh ka gen hangin ka lehkik zo kei hi. Zomi Khuado siim cih ciang Zomi te kiitna leh Zomite zia, kideihsakna te Zomi ngeina kiplai, bitlai hi cih mu pah ka hih manin ka lungdam a, ka angtang hi. 

Giahna ding zong kei  leh Eric Tuang bek zana  pai ding, zingsang khuavak ma deuh a tung ding, lup man, ihmut man in om mello ding ahih manin nidanga bangin Zomi Zum ah tungsuak dingin zingsang niangtui tawh khuavak suak ding, kuamah nawngkaisak lo ding ciin ka gel uh hi. Ahi zongin Zomi te paunak ah, "Hausa ziak in kuangzawn ban," a cih bangin Zinmangpa giahna dinga Zomi makaite in a sapsak uh Hotel nuam tak ah ama room sungah ko zong giahna ding hong vaihawmsak uh a, nuamtak in nai 3 sung bang ka ihmu hithiat thei kik uh hi. Giah man Hotel sap ka piak sawm uh leh Zomi makaite in hong sangnuamlo leuleu in Zomite kizindo, kizintun ngeina ahihna Zomi Ngeina zatna hun ah hong lakkhia leuleu uh ahih manin hampha kisa bek hilo in; milian, ulian nungzuih khak zong na nuam mawk ei, ciin ka ciamteh uh hi. Zingsang niangtui zong hong sik sawm leuleu uh a, tua zahzah bel hisam lo e, koh zong zinpaak hong puak hisak un ciin ka nget vanvan khit ciang hong sangzo sam uh a, maizum hong nuam tuam pah hi. 

2. Zomi Makaite Hanciam:
Vai thupi a om simin makaite a gim mahmah leh a vaihawm dinga kiseh teng pen zan zong a kul leh a ihmu manlo zaha buai uh ahi hi. Khuado ding zan in zong 'meilah sat khol' cih ding hilo diam, vai kisam ding khempeuh leh lai bawl ding khempeuh a masanga kibawl theilo khempeuh bawl in zanhak uh a, mit bing thiutheu in sem uh hi. Mipi in nuamtak Khuado a zat theihna ding un makaite Nipipaak Tang ka puak nangawn uh ne manlo liangin buai uh a, ka huh theih pak uh lah omlo ahih manin a gim a tawlna ngah uh khum mahmah ding hi cih ka mukhol khin hi. 

Zingsang thawh phet niangtui leh moh, aktui cihte ne khawm in ka kimu uh a, "Khuado Thupha" ci a khut kilen in tomvei kiho pak saisai in Chinwoo Stadium sunga sunthapai Khuado zang dingin ka kikhen kik pah uh hi. 

3. Zomi Khuado Nopci Ziahziah: 
October 15, 2014 zingsang khuavak silsial nuai ah khanglo in thoto in, zingsang niangtui dawn dingin Zinmangpa leh ZAM Makaipipa nung ka zui uh hi. Niangtui dawn khin phet pen ka van teng uh Hotel pan pua khia pah ka hih man un Khuado ah a paisuak thei ka hi uh hi. Zomi makaite in hong vaan uh a, ka tuanna ding uh Car hoih mahmah hong sap sak uh a, khe tawh pai le ung zong a kingap tingteng pen mawtaw hoih mahmah tawh hong pua in khe a lei sikkha vetlo in ZAM zum pan Chinwoo Stadium, mihing 3500 tut theihna ding innpi sung ka tung thei uh hi. (Zomi Zum pan Khuado zatna mun bel khe tawh pai taktak leng sawtpi mah a kipai ding hisam in, ko khe tawh ka pai dinguh ka ngapna pen Singapore ah Ninoni sim tukpeng suiin kingap mahmah hi ung, maikum Zomi Cup ciang zong kuan kik ding hi ung cih ka ciamnuih nopna bek uh hisam!). 

Khuado zatna ding mun ka tun ma un lampi ah Zopuan silh a kizui ngelhngelh Zolia leh Zotaang te ka mu pheiphei uh a, innkuan a Zopuan silh a kikai naunau zong ka mu pheiphei uh hi. Tuni in Malaysia khuapi 'palh' hilo maw ka ci hi. Zomi te Zopuan leh kizepna in khuapi sung kilawmsak mahmah a, a mu kha peuh in etlawm sa in nunghei diamdiam liang tazen uh hi. A sawtlo in kikhopna ding innpi ka tung uh a, Zogam mah bangin mualdawn ah tua innpi na om hi. 

Zomite adingin kilawm kasa a, inn lamte in zong - Zomi te in ni khat ni ciang Zomi Khuado khawng zang nuam ding cih muhkholhna nei a Zogam tawh a kibang mualdawn ah na lamto uh ahi tam ka ci hi. Zogam mah bangin tua mualdawn innpi tual pan khuadak leng a sak a khang kisuk muh dimdem a, Zomi te in kuamah i neu et ngeiloh hangin a tunglam vive pan ki ensuk hi cih ka phawk kik velval hi. Zomi te vai ding peuhmah a sangna mun ah kihawm a, a sangna mun pan kisem in a sangna mun pan kizeek hi. Tuni Khuado ah zong Zomi ngeina leh Zomi hihna hong lak tampi ka mu khinta hi. 

Zomi te pen a suk tuaktuak te hilo in a to kah vive i hihna a kilatna khat pen Khuado zatna ding innpi lam zuatna pen a to vingveng a kahtoh kul khat na hi a, a tek a khang, a neu a lian, a lia a taang na kizui ditdet in khut na kilen tiuteu uh hi. Zomi te nidangin lia leh taang bang mipi lak ah khut kilen a vakkhop cih khawng kizang khollo hiam ka cih leh tuhun ciang nuam kisa lua lel in kizang ziahziahta in a kikaikai vive hita hang; ahih hang a to lam a kikai hi in a sangna lam kahtohna lampi totna hi. Kuamah kisukkaih omlo in a sangna lam ah a kitawsawnto, a kikaito vive hi a, maban limci  semsem hi. 

Innpi tual ka tun uh ciang makaite leh Zolia Zotaang na vak maimai a, miksi bu holh bang in na phe naunau uh hi. Zomi hizah omlai maw ciin ka ngaihsun liang hi. Zomi Nam Ni a ka pai laiin zong hizah phial mah na om a, ahi zongin tampi lengkhia khinta ahih ciang na tawmdeuhta vak cih upna neu khat ka nei hi. Na tawm deksuailo in na kibehlap zaw uh a, tu in ZAM member bekbek zong 27,000 val hi a, kumlui sangin mihing 9,000 bangin tamzawta hi ci zawsop uh hi. 'Zawsop' cih pen Ngabeng te ciamnuih bek na hilo dan hi. Zomi na kibehlap zawsop uh ahih manin Khuado zong na nopci zawsop hi. 

Innpi tuala lia leh taang te kihei diamdiam a maan kila a nuihmai siuseute, bil ah la ngaihna thuah kawma vak hialhialte, vai a huna kipatloh ding laua kipei saisai makai leh vaihawmte, nupi naupang, papi putek nangawn a kuamah kinusia hetlo a Khuado innpi sungah lut dinga kigual dimdemte ka muh ciang innpi sungah mihing bangzah a tu khinta tam ciin ka thei nuam pong hi. Lutpah ding ka cih leh ka min tuanna ding uh leh ZOMI KHUADO ciamtehna a bem kiukiau batch a kibawl ka puan angtungah zolia a namtui veuveu a melhoih mahmah khat in hong thuahsak a, Pu Lengtong Kam Khen kammal kawmpak leng, "Muinam no khat hi," hong nam veuveu hi! A sung lutsuak lo a kongkhak gei ah themvei vaithaam lai ka ut phial mawk hi. Ahi zongin makaite in na tutna ding mun lamah i paiphei ta diam hong cih uh ciangin kei zong makaite leh Zinmangte nung zuiin ka lutphei hiathiat hi. 

Innpi sungah mi  na tam seem uh a, na ging sesu hi. A aw ging tuam cih zak ding a omloh hangin a kihona hu uh aisa tuun mahmah bangin ging sesu a, mipi tawmlo hi cih a kilatna hi. Ka tutna ding mun uh ka tun ciangin tutphah nungah DR. HAU ZA CIN cih na kigelh a, tua tutna ah ka tupah hi. A maigual ah tutna nuamtak hong ngahsak uh a, Zolia kitel ciangin zong a phei ngongo kinai muh diak ve maw ciin sunthapai hita leh kicimlo ding cih ka umkhol pah hi... he he...

Ka vei ka tak a tu ulian, makaite, Zomi pih u leh naute khut let kawikawi in a sawtlo akipan pah ding Zomi Khuado ngak kawmin 'dam maw, hih bang hunpha i zatkhop theih lungdam hang ei,' ciin maitai takin ka bansah kawikawi uh hi. Ka gei ah India pana hong pai Zomi lasiam Mungbawi Neihguk leh a u Kim zong na tu uh a, maitang kituaha khatvei kimuhna a hih manin lungsim hong lawng in Khuado ka siim ka kisik kei a, hih bang hunpha ka zatkhak tha ka ngah semsem hi. 

A sawtlo in hunzeek siam a ka theihsa, Zomi Nam Ni lai pek pan, Pa Francis Khampi leh Lia Deih Mang te aw hong kiza tuaituai a, a mi ka muh pah loh hangin, "ZOMI KHUADO kipanta ding hi," cih pulakna ahih manin mipi khutbeng ging ziahziah kawm ah kei zong a gen kik ding uh kammal ngak gige in ka bil ka palhsak seisai hi...

(zop lai ding)


 
Hau Za Cin
Phuitong Liim
www.hauzacin.blogspot.com
 


Comments




Leave a Reply