WWW.TUNGZANGNEWS.COM

 
245883580-thupuak-volume-9-issue-23-09-november-2014.pdf
File Size: 740 kb
File Type: pdf
Download File


ZAM Thupuak
ZAM :: Zomi Association of Malaysia

United States Ngeina le Dan Thusinna Khutzat Laibu : ZOMI
Khen Thumna

Khenpi Nihna : America Gam ah Zinkhiatna

Nang a dingin adawldawl a sepding omkhempeuh hong kisepsak khit ciangin. IOM panin khualzin khiat niding nang tungah hong zasak ding hi. Atam zaw IOM laisuan na tungah kisuang hi.

Vanleng tawh khualzin thei dingin cidam na hihna a kitelcianna dingin khual zinkhiat ma-in a nunung pen cidamna lam sittelna na nei ding hi. IOM panin vanleng letmat a ding sum leitawi ngeina tawh kigeel ahih manin galtai khempeuh in America pai nading vanleng sap lohkik ding hi cih theih ding ahi hi. (Vanleng sap a piakhol galtai te longal.)

Na teenna mun pan America gam gamla mahmah hi. Khual zin ni tam abei bangin khual zin khiatna ding vanlengtual tun nang zong hun sawt thei hi. Na vanleng American leng suak pah lo ding hi. Vanleng khatvei bek tuang hilo in khekkul a, atamzaw Japan gam ahi hi. Japan ah vanleng laih a tuan nading hun pia a ngak kul hi. IOM nasemte in na vanleng tuankik nading hong vaihawmsak dinghi. Khualzin hun pen Asia gam nisuahna leh leitawlam kikal (Southeast Asia) pan Japan ciang nai guk sawtin tua pan America ciangnai 10-13 sawt ding hi.

America lutna vanleng tual na tun ciang na omna ding gamte ah na pai na ding vanleng khat veina tuan kik kul kha thei ding hi. America natun khit ciang vanleng khat vei/nih vei ki tuang lai cih nopna hi. Khualzin hun khempeuh nai 48 sawt thei hi.

Amun zui-in hun ki lamdang cih phawk in. Na tenna mun i hun leh na khualzin kipat khiatna vanlengtual ahun khawlmun vanlengtual ahun America gam i hun cih te kilamdang ding hi.

Van bawlkholna

America gam ah na puak ding van tawh kisai in ciangtan na om hi. Uliante leh naupang kum(12)leh a tungsiahte in van ip khat ciat pua thei hi. Tua van ip pen Kilogram 23 sang gik zawlo ding hi. Van ip i gol na pen a san na letmat 23 (50cm),a dung letmat 32(81cm)a vai letmat 6 (15cm) hi ding a tua sangin gol, sau zawlo ding hi. Tua van ip pen na tut na gei ah koih khalo in counter ah ki-ap hi a, America na tun dong na mu kha nawn kei ding hi. Vanleng tungah ip a neu khat kikeng thei hi. Tua khut khai ip pen neu in kilogram 5 sang gik zaw lo ding hi.

Na puak theih ding vante

Na van neihte atam zaw America ah kipua thei hi. Gentehna: Nikteen puansilh, kizepna tuamtuam laibute, kawllukhu, vanzatte, tumging vante, ngeina vante, zat ding akigelh zatui (Siavuante piak zatui lai tawh) cihte ahi hi. Van manpha ahi suang manpha, sumngo sum cihte zong America gamah kipua thei hi. Ahi zongin innkuan khat in American Dollar 10,000 val aman van apuak leh pulakin theisak ding hi.

Napuak theihloh ding vante

America gamah puak ding a kikham vante om ahih lam ciamteh in. Tua akikham nate in lungmuanna leh ganhing singkung pan a kilawh thei natnate pan kidalna ding ahi hi. Anuai a vante America gamah na puak leh sum tampi hong kigaamh ding hi. Tuate in: tanakha, ngapik, zatui a kizang thei akungte leh a kibawltawm zatuite, amin kipulaklo a vuite, anhing, tem, ganhing pan kibawl vante, sa, ngasa tuamtuam, vatawt, ak pan kingah sa tuamtuam, antang, vaimimtang, mimtang cihte, khaiciite, singgahte, mehteh mehgahte, khamtheih guihtheih nate, (Gentehna: kanza, bengh cihte) thau, galhiamte, thautang, ganhing pan a kibawl a lauhuai nate (Gentehna: Saiha) cihte ahi hi.

Nektheih a tamzaw America gamah a kipuak theihloh hangin, lamkal a nek dingin vanleng tung kipua thei cih ciamteh in, leitung bup khualzinna vanleng tungah manpiak kulo in nek leh dawn hong kivaihawm sak hangin moh (adiakdiakin naupangte ading) na puak beh ding kisam hi.

Van guandan

Na puak ding van a tamzaw pen 23 kilograms kita ip sungah guan ding ahi hi. Akitam thei baih vante na guan ciang kidawm in. Van pawlkhatte khut khai-ip sung bekah guan ding hi a, van pawlkhatte ahihleh khut-khai-ip sungah kipua theilo ahihlam ciamteh in.

Na khut-khai-ip sunga guan ding a kilawm vante Puanlum, puantungsilh, mawza, lukhu (Vanleng sung vot thei hi), sim ding laibu (nai tampi vanleng tuang ding hileh) naupangte ading agamlum huai saklo naupang kimawlnate, naungek nawine laite ading nau tawdap, nawibung leh mohte (America ah ann le tui, moh cihte kipua theilo hi. Tua ahih manin nekloh a omlai nektheih kici peuhmah na tun phetin iplahpipi in na paih kul ding hi).

Na khut-khai-ip sunga guanloh ding vante

Tem (ahkl) a zum/ahiam van khat peuhpeuh (hih in lungmuanna ding ahi hi.) Atui nam khempeuh, samza gels, sam sawpnate, ci le sa hoih zate, haza, kizepna vante, khualzin gamvakna lam lungmuan ding kipawlna (TSA) pan khualzinte in mit zatui (atui) ci le sa hoihza a nuh 3 ouncer (89mm) ata bung tawh vanleng tung puak ding phal a, tua sang aneu zawk leh saphuklai siangtho sung thunin khut-khai-ip sung puak ding phal hi. Ahi zongin na puak nading bung 3ouncer sang agol zawk leh van sittelna munah na vante hong kepsak ding uh hi. Meisah le meigit, puakkham thei vante kipua theilohi. Akitel zawin na telnop leh www.tsa.gov/traeler.com tawh internet ah ki en thei hi.
Zopzop lai ding…
Zomi Social Welfare of Malaysia (ZSM) or Zomi Genvai Kipawlna Kum 5 cinna nopci takin kibawl thei

Malaysia gam Zomi Genvai (Gentheih haksat) panpih kipawlna kum 5 cin khawmpi 03 Nov 2014 ZAM hall ah thupi takin ki bawl hi. Hih hun sungin Laphuak, Lasa , Lasiam minthang masa Zogam Lalpu leh T.S Khai te zong hong kihel thei hi. Hunpi sungah Sia Thaa Mung (ZSM Assistant Secretary) hunuk semin mipi lasakna, “Pasian Minthangta Hen” cih tawh hunpi kipan hi.

Hunap thungetna Rev. Thang Do Khen (ZCF Canaan) aneih khit ciangin Lengtong Pauno in “Khan Khat Nuntak Sung” cih la tawh mipi te thapiakna nei hi. Tua khit ciangin Zum nasep zia vai tuam-tuam Sia Hau Suan Khai (ZAM President) in pulakna phincil kician sinsen takin genkhiatna hong nei hi. Tua zomah Sia Tuangpu (ZSM Treasurer) in thugenna Zomi Gen vai-in dongtuak hamsatna namkim te ah masuan nawk zia hong nei leuleu hi.

Tua zomah Zogam Lalpu in lasakna “Tunsung Khat Piang Ciimnuai Tate” cih la hong sakmadeuh in Malaysia ah Global Zomi Idol vai tuamtuam nasep zia ding te leh ZSM munlakna thupi a sakna te hong gen khiatkhit ciangin lungsim lawng mahmah takin la hong sa in khitui mal taksak keuhkeuh zo in lamal in apai kikhawm khempeuh duangzen mahmah hi. Tua zomah ZSM vai thugenna Sia Kam Lian Mung (ZSM President) in hong nei hi.

ZSM President Sia Mung thugenna tomkimcing

ZSM vai dinna tawh kipawlna kipatpan kipan kum nga cin tuni dong nasepna tuamtuam te abanban in hong gen to deudeu hi. ZSM kipawlna pawllutna kumkhat in piakpah mikhat ai RM10 bekbek tawh Zomi luang kipham zo athupitna nasia takin genna hong nei hi. Zomi te Malaysia ah kum 2000-2009 ZSM din masiah Malaysia gam Zomi sungah nuntakna abei a kithei khia ZSM in akan khiat theih teng akan khiat uh Zomi sitset misi 43 om a, ZSM makai masa te’n kankhia zo ahi hi. Tuaban ah hi bangin ZSM nasep anuai a bangin pulakna hong neito sawnlai in cimul tho in ki dai khipkhep hi.

ZSM 2009 adin khitzawh October pan December 2009 sungin Zomi 3 in Malaysia ah hong nusia a, ZSM in aluang napham uh hi.

2010 sungin Zomi misi luang 20, 2011 sungin Zomi misi 20, 2012 sungin Zomi misi 27, 2013 sungin Zomi misi 28, tukum 2014 kumsung Kum 5 ci’n bawlni ciang Zomi misi s40 in Malaysia leitang tungah hong nusia khin hi a tuateng ZAM-ZSM makai in luang phamna nei uh ahi hi. ZSM Kum 5 cin khit deuh zong nih kibeh lailai hi. Tukum sungbekbek ZSM in Zomi luang kiphamna RM tulzakhat kim zeekkhia khin uh hi a, ZSM te zat hilo in hong nusia i mipih misi teng adingin zum tuam-tuam vai vaanna leh leitang leina kuang leina cihbang te ah zekkhiat uh ahi hi. ZSM nasem te ahih leh Zomi adingin galhangsan mahmah thau tawilo nasem kipumpiak vilvel te uh ahi hi.

Tua hi-in Zomi khempeuh in kumkhat in RM10 tawh Zomi hizah luang ki pham hi a, mikhat in RM10 a khiat pen tukum aa te bang hawmsak leh Pya 00. 20 kim tawh Zomi khat luang kipham ahih manin RM10 in manpha mahmah hi cih mipi tungah Sia Mung in thupi takin gen khiatna hong nei hi. ZSM cih pen (Zomi Social Welfare of Malaysia) hi a, Zopau in Zomi Genhvai ci in kilo hi. (gentheih haksatna vai) Sia Mung thugen khit ciangin Zomi Khuado ah Zomi Idol 2014 ngah Ki Thang leh Zolia 2014 Malaysia 2014 San San in la hong sakhawm uh a, mipi lungsim lawng mahmah in zong hoih mahmah hi. Amau te nih khit ciangin Siama Niang Suum in hongsa leuleu a nungak kum 15 te aw sangin siangzaw siamzaw lailai hi.

Ahuam thungetna Rev. Gin Khan En (MZCC Pastor) in hong makaih in mipi te tawh thupi takin Zomi ading thulupi nam sangih tawh abanban in sagih vei vilvel thu ngetna kinei hi.

Ahuam thunget khit ciangin T.S Khai lasa dingin hunuk Sia Thaa Mung in asap leh T.S Khai zong ZSM thu azakna thupi sakna hoih takin hong gen hi. Tua khit ciangin ZAM leh ZSM te Zomi adingin TUUNNU leh ZUAPA hi cih lathak sitset phuah leh sak hong thuah in hongsa a, lamal leh la aw in, mipi khempeuh i lungsim lawnglua ahih manin T.S Khai lathak ZAM leh ZSM Zomi adingin leitungah ettehtak TUUNNU leh ZUAPA lamal in lungdamna khitui malbangzah hiam khattek luangsak detdet hi.

T.S Khai lasak mankhit ciang in Rev. Thawng Ngaih Khup (Zion UPC Pastor) in Mate 25:35-45 sung tawh mipi te thapiakna nei in ZSM nasem te enhuai lo hina pi’n minam adingin leitung bupah thupi penpen hi cih tawh hanthohna kiciantak hong nei hi.

Tuakhit ciangin mipi lasakna “Hon Dom Sang” cih kisa in Rev. Dr. Cin Sian Pau (ZAC Pastor) in thupha piakna tawh ZSM kum 5 cin hunpi makizial bawl hi.

Apai khempeuh ZAM leh ZSM innteekna tawh buhsih leh aksa tawh hongvak uh a, Zolia teng thum in ankuang hong lui uh a nidang sangin aksa leh buhsih alimzaw tawh kibang kici tekin kinui hiuhiau hi. An kham khin masasa muknul hong hawm sawnsawn uh a, khua makai papi te bangin nih vei ngenkik uh hi ki ci hi.

Sia Hau Thang (Zomi Daily reporter)

Tukal Palaai te buaipih diak teng

Kap Deih Piang (Lailo) November 4 ni-in Bukit Jalil Camp ah kiveh.
Gin Do Kham (Lailo) November 5 ni-in Bukit Jalil Camp ah kiveh.
Pa Khai Israel leh Nu Nan Htake te tapa aa ding Birth Certificate pen JPN Wangsa Maju ah November 4 ni-in ki lakpih.
Dal Muan (Kawlpi) ACTS ki buaipih in Batu Arang ah ki koih hi.
Thang Muang (Pyidawtha) UKM zatopi ah ki buaipih.
Nang Lam Khup (Zozaang) University zatopi ah Memo ki lakpih in, IAD ah ki report sak thei.
Nang Sian Tuang (Pyidawtha) zong Sunway palikte khut sungpan in ki tankhia thei.
Dal Thian Sang (Limkhai) November 3 ni-in UKM ah buaipih khit ciangin UNHCR-IAD ah ki buaipih leuleu.
Kham Za Khai (Saizang) November 4 ni-in UKM ah ki buaipih.
Cing Sian Hau (Heilei) UKM zato ah ki buaipih.
Cing Huai Lian (Lailo), November 6 ni-in Klang zato ah ki buaipih.
Dal Suan Thailand puaisa te khut sungpan kiman ki buaipih laitak.
Do Sawm Khai (Buan) Putrajaya ah ki buaipih laitak.
Cin Lam Khai (Singunau) kiman in a ki buaipih laitak.
Ciin Lun Dim (Tuangzang) November 7 ni-in UNHCR-IAD ah ki buaipih.
Nu Sian Hoih (Tungzang) Ampang zatopi ah ki buai pih.
Nu Neempi (Kawlpi) GHKL ah kibuai pih.
Tg. Thang Sawm Langh (Mualbeem) GHKL ah kibuai pih.
Tg. Thang Sawm Tuang (Phaiza) GHKL ah kibuai pih.

UNHCR Volunteer Section pan ZAM Hall ah tentan nei

Malaysia gamsung gambel sang tuamtuam a laihilh gamdang mite leh inntek siate UNHCR Volunteer Section pan tentan piakna November 5 ni-in nei uh a, mi 27 phathei uh hi. November 14 ni neihkik ding geelna neilai uh hi.

Zomi Cup 2015 kihel ding khuate sazian kipiapia ta

Zomi Nam Ni pahtawina kumsim i neihden Zomi Cup kibawl hun ding hong tungto ding hi leuleu. 2010 in Team (8), 2011 in Khua (19), 2012 in Khua (26), 2013 in Khua (40) Team (41), 2014 Khua (43) in Zomi khangno sungah ki lawmtatna picing takin i neikhinzo hi.

Zomi Cup 2015 a (6) veina ading pen kum dang te sangin kipat baih zawk ding geelna kinei hi. Bang hang hiam cih leh 2015 Sen kum thak pen Zomi Nam Ni tawh kituak ahih manin tua ni ma in zawh siang teitei kul ahih manin akihel nuam khua kipawlna khempeuh in ZAM zumpi ah sazian nong piak na dingun kong zasak uh hi. Khua min tawh a lutnuam khua kipawlna khempeuh kisang ding a, sazian pen November 30 nitak nai 5pm ciang kisang ding hi.

ZAM pan dahpihna

Tg. Tuan Tuang (Kum 19)

Tualzang khuami, Pa Nang Tuan Pau leh Nu Lian Khan Niang te tapaTg. Tuan Tuang ZAM-20672, ZSM-15852, UN 354-14C01333pen damlohna tuamtuam hangin 02/11/2014 ni takin GHKL panin leitung nuntakna hong beisan ahih manin adah akap nu leh pa sanggam te, pawlpi leh khua kipawl nate tawh ki bangin Zomi zumpi panin ih dahkhawm hi. Sanggam pa luanghawm vui nang vai tawh kisai in zumvai leh leitang vai tawh kisai ZSM palaai ten avan laitak hi a, ahunzui in hong ki zasakkik ding hi.

Pa Khup Tum Sawm Tuang (Kum 40)

Laitui khua miPa Khup Tum Sawm Tuang-18044 pen Kuantan nasepna mun panin 31/10/2014 ni-in it leh ngaih zi leh ta te nusia in leitung nuntakna hong beisan hi. Sihna vai akizak ciangin Zumpi panin kidelh aa zumvai khempeuh akisepkhit ciangin 05/11/2014 ni-in sanggam pa luanghawm kivui thei hi. Sanggam pa luang tungtang ah adah akap a it zi leh ta te leh sanggam te tawh kibangin Zomi zumpi panin ih dah khawm hi. Topa hehnepna thupha adah akap khempeuh tungah hong tungta hen.

ZAM zumah leitheih tuamtuam

(1) English to Zomi Dictionary RM50
Zolai Siangtho RM40
Kawllai Siangtho RM30
Galhiam Labu RM30
Namsiaza RM20

ZAM-ECM Meeting sapna

Malaysia gamsung a om Zomi khempeuh adingin i ngakngak i zum vai lai a suahsak theihloh thuthak tuamtuam leh Zomi te kalsuan zia ding holimna kinei ding ahih manin kipawlna makai te, pawlpi sia te, makai te leh Zomi a lunglut khempeuh nong kihelna dingun kong zawn uh hi.

Hih hun sungah Pa Pau Khat Suan (Singapore) pan hong kihel ding hi.

Ani : Nov. 10, 2014 (Monday)
Lunch : 11am (Brayani-Danpauh)
Kipat hun ding : 12pm
Amun : ZAM Hall

Myanmar Believers Fellowship (MBF)biakinn mun kilaih

November 16 ni a kipan hih anuai munah biak piakna kinei ta ding hi.
Unit B-2-5,
No. 1 Jalan PJS 8/15
Dataran Mentari 46150,
Petaling Jaya, Selangor
Kizopna ding 016 334 7900

ZAM member te ading kimat kihen leh thongvai

Kimat kihen pen nisim in omom lai ahih manin kidawpsiam lai ni. Kiman ngei khempeuh in suakta khin maw suakta nailo ZAM ah hong zasak kik hamtang un. A suakta nailo te hong report sak kik nuam hi zaw hi. Navak teh a tawmpen RM100 pua hamtang in.

Kimat kihenvai & Thongvai

Sia Tuangpu : 016 254 4093
Sia Thaa Mung : 016 646 5375
Sia Kimpu : 016 993 3759

UNHCR-EDU te ZEC-Maharajalela ah hong hawh

November 7 ni-in Zomi naupangte siamsinna khat ahi ZEC-Maharajalela ah UNHCR-EDU pan sang en in hong pai-in nasepnate thupisa mahmah uh hi.

Lungdam kohna

Pa Thang Sian Muang (Vangteh) in tukal Thupuak ading RM50 hongpia ahih manin ki lungdam mahmah hi.
Nu Ma Man (Sawbuayeshin) tukal Thupuak ading RM100 hongpia ahih manin lungdam ihko hi.
Myanmar Believers Fellowship (MBF) pawlpi in tukal Thupuak ading RM50 hong pia khia leuleu ahih manin amau tungah lungdam ihko hi.
Gamsung gampua leitung muntuamtuam pan ZAM nasepna te tha napiak nopleh lungdamtak in hongkisang ding hi.

Address:155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email:  zomiassociationmls@gmail.com

 


Comments




Leave a Reply