WWW.TUNGZANGNEWS.COM

 
Tulaai Leitung Thuthang Tuamtuam Updates November 3,2014

·      Migilo khamul chiapchuap te aphulsiat zawh kum 13 aphakhin USA gam New York khuapi a om WTC munteek a kilam Innpi November 3, 2014 ni in kizosianta a honnapawipi nasiatak in kikham hi. Hih Innthak peen pi 1,775  saang in Dollar Awn 3,600 bei a kilam kik ahihman in USA gambup ah Inn saangpeen ahihi. Inn nupa kuipi nih etlawmtak a kilam hinapi 2001 kum in khamul te in phulzan uha, mi 2,700 vaal in sihlawh hi. Tu in US kumpi zum pawlkhat leh Conde Nest, China Center cihte omkhin zo a Company tuamtuam te kawmtheihding in zong kibawl ahihi.

·      Kawlgam gaalkaap Maangpi Min Aung Hlai gamsung daihna zong vaaihawm zonaailo pi in Belarus gam ah November 3, 2014 ni in gamsung nasep zo mahmah bankeek in vangaih hawh tadih hi. Tuabek hilo in USA tawh ui le ak abanglaaitak ahi Russia gam vanawk a, Moscow khuapi vanleengtual ah tawmvei atawlngak sung in Russia gam Gaalkaap zalian pawlkhat tawh kimukhawm uha, gamnih gaalsiamna lam ma pangkhawm ding in thukikupna nei mawk uhhi. US President Obama Kawlgam ongzinding tawh kinaaisim laailaai ahihman in Aung San ngian zatsawmzeel maw cin mipawlkhat in  a upmawhna uh gen uhhi.

·      Nigeria gam nisuahna lam a teeng minamtawm Shia Muslim biakna zuite teenna Potiskum khua sung a om Biak Inn khat ah bungbu seuseu a thungen a om mipi lak ah November 3, 2014 ni in migilo pawlkhat  bomb tawh puakkham khawm uha, mi 15 si in tampi tak liam uhhi.  Kua khutma kitheilo hinapi in Boko Haram migilo te hikhading in lam en uhhi. Bomb puahzawh asawtlo in paltan te ongtungpah uha, akiim a om migilo hiding a upmawh mi 5 kaplum uhhi.

·      Pakistan gam leh India gamgi Wagah kongkhak pi ah November 2,2014 ni in Dialkhaai khiatpawi bawl in Utongpa kitunuam bang in Paltan te khe saangkhai kawm in dianglenlen  in om uh ahihman in mipi ten muhnopsalua a et zihziah laaitak Pakistan gamlampang ah migilo singam pawlkhat in apumpi uhtawh bomb puakkham sak khawm uha, mi 55 si in 100 liam uhhi. Misite ahihleh November 3, 2014 ni in Punjab Province sung ah kivui a zato lum pawlkhat zong damlam manawhlo ci in zato ten gen uhhi. Hi thu hang in UN General Secretary Mr Ban Ki Moon alaaitang anat velval na leh misite adahpih laai November 3, 2014 ni in puak hi. India leh Pakistan gaalkaapten ahihleh pata lautuanlo ci in amau leitangtung tuak Wagah kongpi kiim ah awngziahziah laai veve uhhi.

·      Turkey gam Istanbul khuapi pan gamla lualo Bosphorus  acihna mun tuipi tung ah Refugee mi 40 kiim apua Tembaw khat November 3, 2014 ni in kibung a mi 24 asisa in tui sungpan Turkey mihonkhiate kaaikhia uha adangteng Black Sea tuipi sung ah azosaanlaaitak uh ahihi. Hih Refugee te peen Middle East pan EU khawk ahi Romania leh Bulgaria gam luutsimding a mipua puaisate tung sumtampi apia uh ci hi. Tembaw neu mahmah napin mitampi pua uh ahihman in kibung hi ci in mit a amuten gen uhhi. Turkey gam peen Middle East Refugee te kantandenna gamkhat zong ahihi. Kawlgam pan Malaysia pai bang ongphawk sak hanhan ei

·      Iraq gam sung a mingawngtan pawl ahi ISIS migilo te in tuniciang Iraq gamsung a minam neu khat ahi Suni te 322 kido cihbang hihetlo in agawh in golum ta uhhi ci in Iraq’s Ministry of Human Rights ten November 3, 2014 ni in taangkokhia uhhi. Tualo adang ISIS te milomgawhna anunung peen zong ahipah November 1 ni in Albu Nimr minamneu te 75 a innphualzang ciatpan un samkhia in golum uha hih 75 lak ah naupangno 9 leh numei 6 kihel ci in genbeh uhhi.

·      Syria gamsung a om IS migilo pawl in Homs khawk sung a om Meitui laakna phualpi Syria kumpi tetawh kaalkhat vilvel kakinuai khit uhciang ko khutsung ongtung peetpeet ta hi ci in November 3, 2014 ni in taangkokhia uhhi. Hi tawh kizawitawn mah in Suni Islamist Group ten Social Media ah IS ten Jahar meitui khuuk ah IS dialkhai akhaizihziahna uh maan 18 suahsak uhhi. November 2 ni zong Jahar khuakiim a om Mahr meitui khuk leh Syria gaalkaap te tungpan gaalvan hoih nono, mawtaw,tanks cihte pawlkhat IS migilo ten laaksak uhhi. US leh apawlten vanlampan beltung khiatkhiat himah leh koiteng khiat mawk uhhiam IS te peen haat tektek lam manawh uhhi.

·      Libya gam I khuapi nihna ahi Benghazi khuapi  Islamist Militias te khutsung pan laakkik zawhnading in Libya gaalkaap ten gaalsimna November 3, 2014 ni in khuapi sung ah nei uha, mipi te kiheemkhia ding thupia in khuapi sung ahihleh kanpuak kanbang in meikhu in tuamcip hi. Athupoi phadiak ah khua sungmi te mahmah in amau le amau thau bawltawm in Islamist militias te panpih kawmkawm uhhi.

·      Tulaaitak Leitung phial ten Online tungtawn in akilungluut mahmah leh nisim atulsawmlom vei akihawmsawn ziahziah thukhat peen “ Angle Of Kobane” cih hi a, hihpeen kuahiam cihleh Kurdish gaalkaap Lia Rehana ahihi. Lia Rehana peen numei san ahihhang gaalhaang gaalsiam mahmah a amahbek in IS ngawntan migilote 100 vaal thatlum ci hi. Alim pen anuai a ituansaknu ahihi. Amah peen IS ten ngawntan hi ci in October 5,2014 ni in thuhtang manlo kihawmkhia ziahziah a ahizong in October 13 ni in IS mi 100 that hi cihthu ging leuleu ahihmna in leitung in lungluutmahmah in si maw hing theinuam in khuaiphul kibang litlit hi.

Lungdam

Khialhna aom khaak aleh ngaihdam bawm ah maw

Thang Khawm Pauzomi

http://zomipausektak.blogspot.com/2014/11/tulaai-leitung-thuthang-tuamtuam.html

 


Comments




Leave a Reply