WWW.TUNGZANGNEWS.COM

 
Zomi leh Refugee nuntaakna


Refugee nuntaakna ih cih pen a guallel mahmah nuntaakna a hihi. Zomite bang hangin Refugee nuntaakna sung tung ih hiam cih thu gen masa phot dih ni. Hih dotna mi tampi in a dawnkikna ah “Ka zawn man hi” ci tek uh hi. Himah hi. Bang hangin Zomite zawng ih hiam? Cih thu kidong kik leuleu lehang a dawnna nam nih om thei hi.

1.   Pasian zia panin en lehang Zomite’n a nungta Pasian ih biak zawh kum 100 val khin napi gina biak lo hi hang. Citak lo thumaan lo ih hihman in Pasian hong thuhilhna a thuak ih hihi. Pasian gina biak lo ih hihmanin Kawl kumpite’n ei Christian te hong gawt bawl pah a, Pasian in Training hong pia hi cileng maan pen ding hi.

2.   Leitung lam pa’n en leuleu lehang hong uk Kumpite gitnat loh hangin gammite zawng hi hang. Nuntaak theihna ding zongin Refugee nuntaakna sungah Zomite a tung ih hihi cih ding hong hi leuleu hi.

Leitung gam ki uknate en kawikawi lehang a duhhop lo a huaiham lo, thumaan thutak  leh Itna tawh kimakaihna gamte bekah gammite’n nopsakna ngah uh a, kilemna om hi. Etteh ding ih muh gam pawlkhat om a, tua gamte pen a nungta Pasian biakna gamte mah hi pha deuh hi. Leitungbup ah thumaan Pasian a tenna mun USA gam ahihmanin Refugee te aa ding thu vaihawmna phualpi suak pah hi.

Gam khempeuh lakah Singapore gam a neu pen pawl hi napi hau penpen hi. A gam leitangah bangmah piang lo hi. Asia gam ah Kawlgam leisung sum piang tam pen napi a zawng penpen gam suak hi. Bang hangin Singapore gam hizah in hau thei hiam cih thu ka siapipa Rev. Tow ka dot ciangin “Singapore kumpi thumaan in pil hi” hong ci hi. Shwepidaw ciliang napi Kawlgam pen bang hangin hizah in zawng hiam cih kidong lehang a dawnna pen hih a hihi, “Gam uk kumpite gitnat loh thumaan loh man hi. Gam uk ding kituh in kisuam kithat uh a, gam mite tungah itna leh hehpihna nei lo uh hi”.

A guallel Refugee nuntaakna  sungah pawlkhatte khuangaih vei-in gui awk in a sih lawh tampi om uh hi. Innkuan sung kitam zaan in kikhen thaang ahihman in meigong tagah tam semsem hi. Pilna lamah hitaleh na khempeuh ah hamsatna namkim tawh migam milei ah simmawh bawlsiatna kithuak hi. Thuum theih hilo in haksa pipi mahin thuak keeikaai a, khitui naptui tawh anelehtui kine in a kidawn ahihi. Tua ahihleh Zomite aa ding lametna om nawn lo maw? Om lai hi. Khat bek om lai hi. Tua pen “Pasian zia” ahihi. Ih tu ih tate’n gam thumna ah pilna siamna va sin ding uh a, Pasian in hun asak ciangin Zomite hong don kik veve ding hi cih lametna khat bek om lai hi. (Jer. 29/10,11)

Refugee a suak khin Zomite’n Pasian tungah ih thumaan lohna leh ih gitnat lohna teng kisikkikna tawh thuum kik ni. Pasian maiah ih picin ciangin Pasian in hong kankik ding cih um in Zomite hanciam in thungetna tawh ngaksiam ni.

By Rev. Go Za Suum.

(Ph. 010 2733 438) Email:amosgo10@gmail.com 

 


Comments




Leave a Reply