WWW.TUNGZANGNEWS.COM

 
Zomi Innkuan USA
Executive Committee

Dahna Pulakna: Nu Ciin Hau Nuam

Washington State, Seattle khuapi a teng, Zogam pan Ngennung khuami, Pa Zam Khup’ zi, Nu Ciin Hau Nuam in lam-et hetlohpi in, Dec. 03, 2014 ni in, a ten’na uh inn phualzang pan, a leitung nuntakna hong nusia hi. Nu Ciin Hau Nuam pen kha guk a phapan naungek apai laitak hi a, bang hangin hong nusiavat cih thu kithei nailo hi. Nu Ciin Hau Nuam leh Pa Zam Khup-te nupa in, tanu thum leh tapa thum atawikhin uh hi a, a innkuan un lungdam takin tanu lina ahong suah ding angak laitak uh himah leh, naupai sa-in Nu Ciin Hau Nuam hong nusiatvat pen, nakpi takin khasiat huai mahmah a, lamdang kisa in, kidah mahmah hi.

Nu Ciin Hau Nuam in hong beisan khinta cih thu a kitheiphet in, zato (EMS) lamte in a gil sung a om naungek cidam takin lakhia thei uhhi cih thu kiza hi. Amah pen thuneite in bang hangin hong nusiavat cih thu a sittel laitak uh hi a, hanmual a khak ding hun kithei nailo hi. 

Nu Ciin Hau Nuam hong nusiatvatna hangin dah in kap in a om, a it a pasal, Pa Zam Khup a kipan, a tate teng leh, meeltheih tanaute, a pawlpi mipihte, a khua a tui leh Zomi Innkuan Washington State kipawlna tawh a kibangin, Zomi Innkuan USA Executive Committee pawlzong nakpi takin kidah a, na kisa mahmah hi. Naupai sa a hong nusia ahih ban-ah, tate teng akem akhawi ding kimlai a hong nusia ahih manin, leitung lunglen khuangaihna in a kiban zolo zahdong in kidah hi. 

Nu Ciin Hau Nuam hammual ah lungkim huai takin a kikhak theihna ding, a tanungek cidam in hong khangin, a sanggam teng tawh khangual pha a, thupha sang unau asuahna ding, a damlai a innkuapih tengin cidam in nisim maban azop zawhna dingin itna leh kithutuahna tawh, ZIUSA EC pawlin thu ka ngen uh a, hih thu a za, laizom u leh nau akua mahpeuh inzong thungetna neihsakciat dingin hong kizawn hi.

Nu Ciin Hua Nuam hong nusiatna hangin adah akap lungleng khuangai a om laizom u leh nau, nu leh pa, lawm leh gual khempeuh anungta Pasian in hong hehnem henla, adamlai teng cidam takin nisim mabante ah thupha leh thathak tawh a kalsuankik zo dingin ahong siamna dingin thu ka ngen uhhi.

Dahna tawh;

Executive Committee
Zomi Innkuan USA, Inc.

Tulsa, OK
December 5, 2014

 


Comments




Leave a Reply