WWW.TUNGZANGNEWS.COM

 
Tulaai Leitung Thuthang Tuamtuam Updates Jan 15,2015

·      Kachin gam Moe Kawng-Kamai-Phakant kikaal Lamzikpi veelding a pai Kachin gam Lampi thuneipi  U Ka Man Du Naw leh acing Kawlgam Palik 3 te January 14,2015 ni in KIA gaalkaap ten naman uha, tu in KIA ten akhutsung vuah keemcing phot tadih uhhi. VOA

·      Chin Party makaai te sapna tawh Mizoram Chief Minister luui Pu Zoramthang a January 14,2014 ni in Kawlgam Yangon khuapi tungta a, Kawlgam kilemna zumpi nasem uliante tawh kimukhawm uhhi. Amah ngiat in Kawlgam kumpi te sapnatawh ongzin kahikei a kalawm Chin Party makaaite sapnatawh ongzin ka hi ci in genkhia hi.VOA

·      Nungkaal sung a Muslim migilo te kaap ahi Piantit gam Paris khuapi pan kihawm Charlie Hebdo  tawh kisai ko nasepna hi ci in Yemen gam pansan al-Qaeda migilo te taangkona amanmah ahihi ci in US kumpi thuneite in January 14,2015 ni in taangkokhia uhhi. Hih thuthang zum akisuam zawh akaalmasa laaihawm peen angeina ahawmzeel uh Bu 60,000 hinapi Bu Awn 5 ah khanto uha, Awn 5 nangawn mitphiatkaalsung in beimangpah ahihman in naseemte ihmulo liang in bawlbeh ziahziah uhhi. Laaibu Maai ah Muslim te Makaaipi Mohammed lim kapkawm neeinaai sa in tuangsak uha, anuai ah avek in kongmaaisakzo hi cih laaimal tuangsak uh ahihman in mipi lungluutmahmah sediak hi. CNN

·      Japan gamte in Leitung piankhiat zawh atampeen Japan gamdaal nading sumbul sehkholhna January 14 ni in taangkokhia uha, Gamdaal nading in $42billion hiding a, Galvan hoih nono behlap in gaalkaap te gaaldo ziading atumdang deuh akithawi na cihte kiseemding ci uhhi. Hihthu hang in Asia gamsung ah Ngalkhuahang akisaliang ahi Sen gamte adiip un pukpuk ci lingdamdam uhhi.VOA

·      Nungkaal sung Piantit gammi 17 Muslim miglo te in athahna hang in Piantit Thukhun zuun pawl in IS migilo te donalam ah azahtampi in khanding January 13 ni in thukimna aneihkhit ciang Gaalvanleeng te guak kuansak hinawnlo in Tembawpi ngiattawh vanleengtampi puasak in Middle East kuam ah  kipipat mahmahding ci in January 14 ni in  President Francois Hollande in taangkokhia hi. CNN

·      December 28,2014 ni a Java tuipi sung a akia Air Asia QZ8501 I apumpi January 13, 2015 ni in Singapore Navy te in mukhia in maanzaih thei uha, Indonesia Vanleengzong makaaite atawmding in January 15,2015 ni in tuisung ah luutsuk ciaiciai ta uhhi Vanleeng pumpipeen ameilam akimuhna pan meters 800 na ah kimukhia ahihi.Tuni ciang misi luang 50 kitawm khinta a, Vanleeng pumpi sung ah tamkhop omding in lam en uhhi.VOA

·      Malawi gam ah guahtamluatna hang in January 14 ni in tuikhang a, mihing 48 in anuntaakna uh beilawh uha, mipi 69,995 in inn le lo neilo in cimawhtak in khuasa uhhi ciin President Peter Mutharika in taangkokhia hi.BBC

·      Leitung bup RC makaaipi Pope Francis January 15,2015 ni in Philippine gam ni 5 sung taamding in tungta hi. Amah peen 1995 Pope John Paul apaikhit Philippine gam ah Pope azin masa peen zong ahihi. Mipi a million a simtawh Manila khuapi ah Hunbawl khopna bawlding uha,  2013 kum a huihpi gimna athuak mipawlkhat tawhzong kimuding hi. Mihau mipil tampi lungdam leh nuam mahmah in aomteeisam hang mizawngdaaipaam pawlkhat in aomna mun uhpan Pope aw ko mizawngte ong mangngilh cih laaitawikawm in ding ngiungeu uhhi. Zanni Colombo khuapi Sri Lanka gam ah mipi tetawh hunzangkhawm a, kithutuahding leh mawh kimaaisakding hanthawn hi. Ama omsung in Sri Lanka kumpi thunei te in mawhnaneu nei thongkia mi 600 khahkhia uhhi.VOA

·      Ongtungding January 18,2015 niciang kithutuak Mualtung party (UNA) leh NLD makaaipi Daw Aung San Suu Kyi te Nipydaw kimukhawm in gamvaaithuluanzia ding, Federal ongpiankhiat nading cihte kikumkhawmding ci in UNA te January 14 ni in genkhia uhhi. UNA sung ah Zomi,Kaya,Kachin,Shan,Mon,Karen,Rakhaing leh Kukant minamte kihel uhhi.RFA

Lungdam

Thang Khawm Pauzomi

http://zomipausektak.blogspot.com/2015/01/tulaai-leitung-thuthang-tuamtuam_14.html

 


Comments




Leave a Reply