WWW.TUNGZANGNEWS.COM

 
ZIUSA pan Dahna Pulakna: Mangpha Lia Cin Sian Kim, Nashville, TN

Zomi Innkuan USA

Executive Committee

Dahna Pulakna: Mangpha Lia Cin Sian Kim

Tennessee Gamke, Nashville khuapi a teng, Zogam pan Gawngmual khuami, Naulak beh, Pa Kai Pau leh Nu Ngai Lun Cing-te tanu, Lia Cin Sian Kim in Jan. 12, 2015 ni in, damlohna hang tawh a leitung nuntakna hong nusia hi. Lia Cin Sian Kim pen leitung ah mihing in ahong piankhiat zawh kaal khatbek acing pan hi a, asuaktuung a kipan damlohpah ahih manin hehpih huai kisa mahmah hi. Pa Kai Pau-te innkuan pen US leitang ah peemta in a khuasak zawh uh kum thum valbang cingta a, ta pasal nih leh numei khat nei in, Lia Cin Sian Kim pen a lina ahi hi.

Lia Cin Sian Kim hong nusiat manin adah akap a om, Pa Kai Pau -te innkuan a kipan, meeltheih tanaute, khuapih tuipihte, pawlpi mipihte leh Zomi Community Tennessee kipawlna tawh akibang in Zomi Innkuan USA Executive Committee pawlzong ka dah mahmah uhhi.

Dahna kahna sung panin hanmual a khakna ding vaite Nashville khuapi a om Social Service lampan hong panpih ding cih thu leh, Pawlpi panin ahi zong, Zomi Community Tennessee kipawlna panin ahi zong, picing takin vuibawlna kinei ding cihthu kiza a, kikhalum tuam hi. Zomi Innkuan USA kipawlna in ngeina bangin dahna lahna/gaalna kibawl ding hi.

Lia Cin Sian Kim hun nunung pen Jan. 13, 2015 ni, zingsang lam nai 10:00AM hun in, Zomi Pentecostal Church (ZPC) pawlpi innteekna tawh kibawl ding a, hanmual ah kikha ding hi.

Lia Cin Sian Kim hong nusiatna hangin adah akap, lungleng khuangai a om laizom u leh nau, nu leh pa, lawm leh gual khempeuh anungta Pasian in hong hehnem henla, adamlai teng cidam takin nisim mabante ah thupha leh thathak tawh a kalsuankik zo dingin hong siamhen ci-in thu ka ngen uhhi.

Dahna tawh;

Executive Committee

Zomi Innkuan USA, Inc.

Tulsa, OK

January 13, 2015

 


Comments




Leave a Reply