WWW.TUNGZANGNEWS.COM

 
 Zomi Times 2014 December Vol.8, No. 49 -52 Lomkhakna

         ZOMI TIMES WEEKLY NEWS

                    Vol. 8, No.49                                                        7 december 2014

 

minam kemcing upadi (law-ngeina) tawh kisai kumpi laihawm na hangin buddha biakna hilo adang biaknate patau linglawngsak

      Minam, Biakna, Ngeina Kemcing Pawl (Buddha biakna). Zumpi in Minam, Biakna, Ngeina kemcing upadi (Law-ngeina) tawh kisaiin kumpi in kha khat sungin bangmah vaihawmna aneih kei leh Kawlgambup ah buaina om ding hi ci-in tangkona aneih kha khat cinni lianin kumpi laihawm ah December 1 ni-in Upna Biakna khelna upadi (Law-ngeina) pen ettheih dingin nihveina kisuah a, Ta neihzah khiapna upadi, Kawl Buddha numeite tawh kisai kitenna upadi leh zikhat pasalkhat bek neihtheihna upadi tawh kisai kisuaksak lai ding hi ci-in kisuah hi. Hithu hangin Kawlte ahilo biakna leh minamte in Kawl leh Kawl ahilo khenna hi, Biakna buaisakna kipan ding hita hi ci-in lauthawng mahmah hi cih thu kiza hi. Buddha biakna zuite in Mandalay leh Yangon ah hih upadi kumpi in abawlna ding deihlahna nei ngei uhi. Minam, biakna, ngeina kemcing makaipi Siadaw Banantah Tilawka Bihwontah in kumpi in laihawm sung bek ah suaksak a, Kawlgam Innpi ah kikupna leh thukhensatna tawh kipsakna aneih masiah kitomkul ding hi ci-in khauhtakin pulak hi ci-in Democracy today ah kisuah hi. 3N makai Ma Nwe Zin Win (Human Rights and HIV/AIDS projects) in hih upadi pen asuah masak hun a kipan hoih ka sakloh hi. Hih upadi hangin biakna khatlekhat kitelkhialhna piangzaw ding hi ci-in gen hi cih Democracy today ah kisuah hi. Biakna khelna upadi khen 6 kisuah a, khen 2na ah Biakna Khelna thusitpawl ci-in Myone Biakna ulianpen chairman, lahwahkah ulianpen - Secy, member : Lahwahkah-1 , Sangsia-1, numei makai -1, Biakna makai-4 tawh committee member 9 in thusitna nei phot dinga, kum 18 cingkhinsate bek  in biakna khel thei ding hi ci-in kisuah hi. Khen 4na leh 5na ah biakna daisakna, vangkiamna leh sum, min, za zonna tawh biakna akhelte thong kum2 leh sumtang teng2; Biakna khelna dingin leiba leh sum tawh zol, khem, thagumhat tawh akhelsakte thong kum khat leh sumtang teng1;  Biakna khelnuamte khaktanna, buaisakna, dalna abawlte thong kha 6 leh sumtang tul 50 liau ding hi. Khen 6na - Myone biakna zum omlote lahwahkah in len ding a, gamdang omte in gamdang Palaizum, Counsilor zum ah laiphah dinga, Palaizum omlo gamte anaipen gamdangzum omna gam ah laiphah masa ding hi ci-in kisuah hi.

                Kawlpi Zomi biakna makai khat in Biakna leh Lahwahkah, Sangsia, Numei kipawlna, Myo-uk thuneite kisaina om kilkello a, anei veve ding ihih leh Myone biakna zum leh Myone sung biakna makaite tawh kisai ding hi ci-in gen hi. Hithu pen U Nu hunlai Kawlgambup Buddha biakna hisak ding cih tawh kibang hi ci-in Christian biakna makai khat in gen hi Hithu Kawlgam Innpi in akipsak leh Tualsuak minam leh Buddha biakna ahilote in U Nu hunlai bangin Gambup Buddha biakna hisak ding cihna hangin gambel hong pian kik ding lauhuai mahmah hi ci-in gen thuah lai hi. Thu dangdangte ah tudong akithuak zawh hangin biakna buaisakna in thusia thulianpi piang thei hi. Biakna ah suahtakna om a, kumpi ah theihpihna - Matpongtin kisamlo hi acihpen tun, biakna taina (khelna) lai kibawl leh kumpi in biakna theihpihna - Matpongtin kisam hi cihna hi-a, nidang ciangin Buddha biakna losiah lauhuai ding hi ci-in Christian Pastor khatin gen hi. Hih upadi leh Laiza KIA phualpi ah Kawl galkapte in gal kido hilopi, mi ommuang - thanu tawh kap uh a, galkapbu asin 23 si-in 20 val liam sung ah KIA phualpi ah tualsuak minamkim leh sangnaupang galkap ABSDF galkap kihel kaplupna tawh kizom ahih main gamsung in buailam  manawh hiding hi ci-in apatau alinglawng tampi om hi ci-in Christian biakna sung ah kigen hi.  Naw Hla Hla Soe (Susana) in Karen minam sungah Christian leh Buddha om a, minam khat nangawn kiteng theilo ding dinmun hi-a, 2015 kiteelna tawh kituaka hithu pulakna pen Buddha numeite aa ding bek genin adang biakna numeite aa ding zong athu kikim geelsak huai hi ci-in gen hi.December 3 niin Buddha numeite palsal neihna tawh kisai kisuah a, zilehta neihzia ding nangawn ngeina kibawl pen Kawlgam ah suahtakna beita hi cihna hi aci zong om hi.   qMF, MRTV, DT

zogam thuthang (Zogam news)

Chin State Innpi Khawmpi 1/2014 Kinei: Chin State Innpi in December 2, zingsang nai 10:00am hunin 2014 kum aa dingin akhatveina 1/2014 Innpi khawmpi bawl uhi. Chin State CM U Hung Ngai, Innpi ukpi Pu Hau Khen Kham leh State MP 18 kah uhi. Hih khawmpi ah U Ning Nai (Sipen Mangpi) in Innsiah, Leitangsiah, tuisiah, meisiah, mawtawsiah tawh kisai Siahliau lak dingzah pulakna bangin kipsak uhi. Paletwa kuangluimun-2 pan state MP U Nan Saih in thusun thupi khat neiin kikipsak hi cinapi athusun banghiam cih kitheilo hi. qMyanmar Forward 03 Dec

Kalaymyo Ah Galkapmangpipa Hong Zin:   Kalaymyo ah Kawlgam Galkapmangpipa Sr. Gen. Min Aung Hlaing hong zin hi cih thu kiza a., bangvai hiam cih kitheilo hi. Tuma zekin NW commanding officer zong hong zinkhin hi. Hih hong zinna pen Kachin KIA phualpi Laiza ah CNF galkap 2 leh adang 23 si-in 20 val aliamna thu tawh akimemat kha ding hiam ci-in Kawlpi khuasung mite agen om hi. Kalay Dahkahsah(Regional Commanding Office)leh Sahkahkhah (Operation Commanding Office) ah posting thak angah Computersiam galkap san3 ngahte 20 tuak hong tunga, Zomi sungah Sgt. Lian Suan Kim(s/o Nang Lam Mang Chairman, Co.op-Tedim) in Tedim ngah a, alawmpa in Battalion 87 ngah hi cih kiza hi. qZT

Kalaymyo Khuasung Kipuahpha:  Kalaymyo pen Sagaing Region (Upper) khuapi dingin kumpi in nasia takin puah a, tuin Bogyoke Aung San Lamlianpi pen pi100 lampi dingin lamkim lampam platform khempeuh phiatin kibehlap hi. Nursing School zong Leipi khang, Mawtaw gate-2 gei ngakhuk (1974-Galkapte laksak) mun ah kilam dinga, Company 5-Myo Myat Myanmar (M4), SuhSianTun, Kaung Si Hein, Kaung Thit Hein, Bung Myat Phiu in contract ngah hi. Suh Myat Tun company in Sanginnpi Dawl3 pen teng 695, M4 in Numei Hostel  Dawl 3 pen teng 366 tawh Tender ngah hi. Leitangeka 5 pha-a, Siate Inn, Anhuanbuk zong kilam ding hi. Kalaymyo ah Kalay Science & Arts University, Kalay Technology University, Kalay Computer Unirersity om khin a, Nursing University zong kibehlapin Khutsiamsinna sang zong kilam lai ding hi. Khuapithak zong kisat a, tua mun ah Apatment Building tampi lei theih dingin kilam ta hi cih thu kiza hi. qLKK

Sakhangyi Han ah Sang Kilam:  Sakhangyi khua ah Tan 4 sanginn ding, Hanmun ah kilam a, khuamite in khuamite neihsa hanmun hi ci-in nial uhi cih kiza hi. 2000 kumin khuami neih form-105 kingahsa hi-a, 1946-47 kum pekin Hanmun akizangsa hi-in, tuni dong kivui napi, Hausa pawlkhat in zuaksim uhi ci-in khuamite in gen hi. U Mya Tun in azuaksimte hong kansak un ci-in aki-awng hi ci hi. District Adm. Officer U Mg Htoo in khuami leh aleite lai tawh azum ah sam a, Hanmun hi acite thu dong nawnlo-in innlamsate phel un ci-in thupia hi ci-in Hausalui U Khin Mg Lwin in gen hi. Hih sangpen Myone Adm. Officer, TEO leh Leitangzum officer phalna tawh kilam hinapi District Adm. Officer in thei keng ci hi ci-in Kalaynews ah kisuh hi. U Aung Thua in U Sai Tin Mg Ni kiang ah tong 50 x 60 pen teng 3.5 tawh ka lei hi ci a, U Mg Htoo in sanginn lam nawn kei un ci-in thu pia hi ci hi. Kawlpi khuasung Han Mun 10 zong pawlpi neihsa - form 105 ngahkhin taleh DAO leh Sipenzum pan kumpi project hi ciin phiatsakin Santa Hanmun ah Tan IO sang 4na lam kipan hi. Tahan Tuiphumte Han pen apawlpi in 1960 kimin aneih aleisa, form-105 ngahsa hi-a, Santa Han zong 1992 kum pawlin Pinlong  Vengpi (tun Pinlong, Tat Oo, Tazin, Channih Aungsi veng 4 kisuah) leh Aungthitsa-Niangpinta Christiant kivuina ahi hi. Akim akiangte hampha hi. qKalaynews, ZT

 

Planetshaker Pawl Tedim Leh Kawlpi Ah Kilok Ziahziah:  Australia pan Planetshaker Music band leh Evan.Tim Hallte  Kawlpi ah Dec. 2 ni hong tunga, mi tampi in dawnin vanlengtual mai ah sa ngeingai hi. Dec. 3 ni-in Tedim ah Mawtaw 4 tawh paito ngengngang a, Leitawhtan ah Cycle 50 leh Mawtaw 10 in dawnin zolam tawh muak a, vaimuaknahanla sa-in zodial khattek ki-oksak hi. Siapi Nang Lian Kap -Timothy Sang (EBC) ah Australia zinte tungin CMBC-Cope Jubilee Hall ah kikhopna kinei a, Bethel AG ah Kawlpi zinteng tung hi. Mipi kikhawm 10,000 pha dingin ki-um hi. Dec. 5-7 Kalaymyo -Tahan tualpi leh Dec. 9 - 10 MCC Hall ah zai ziahziah lai ding uhi. qGo ZaNang, AMC

 

Kawlgam RC Tunzawh Kum 500 Cin Pawi Kibawl:  Yangon St. Mary RC biakinn leh Thuwanna Bawhlungtual ah R.C pawlpi Kawlgam tunzawh kum 500 cinna nasia takin kibawl hi. Protestant - Baptist Kawlgam atunzawh kum 200 hipan a, Baptist mimal teng4 val pha hi. RC pawlpi pen teng7 kim pha hi ci-in Father Go Lian in suah hi. qZominam

kawlgam thuthang (Myanmar news)

Ko Paa Gyi Sihna Thu Kigenkik: Galkapte kaplup Ko Paa Gyi sihna thu pen Myanmar Human Rights Commission in galkap leh mimal 47 thudotna nei a, misiluang  zong akisit ciangin lutang, dip, phei, khe ah thautangma tawh asi hi cih gen a, No. 210 Khahmahzah Commander nihna leh Section zalianpen in mimatna, vuina ginatak semlo-in limlak kician zong omlo hi ci-in Democracy today ah kisuah hi. Ko Pa Gyi pen akhualzin kha 1 sawt ciangin azin in athu avakan ciangin galkapte in KKO galkapbu bawk 3 kiman pen taisim sawmin kikaplum hi ciin pulak a, bawlsiatna bangmah omlo bangin MHRC in agen hangin siluang sitna lai ah nakguh kitan, anungguh kitanin singhual tawh akisat akihualna sidup liamma om hi ci-in Misi Sit Doctor Khin Mg Oo in gen hi. Ko Paa Gyi pen galkapte in khuanawl gungei a kiman hi ci-a, mitmuhte in khuapi sunga amat uh ci-in gen hi.   qVoice, Aya 3 D 14

 

Vanman Khang: Dollar mankhangin khasum khang ding cih thu hangin Kawlgam ah vanman khang hi. US Dollor pen November kha bei-in US $ 1-1080 kim tunga, tu-in 1040-1050 kikal ah om lai hi. US $ mankhang pen Export sangin Import tamzaw a, US sum leikulna hangin khang hi. Vanman khang khempeuh mihaute hang hikhinlo a, 1962 galkap kumpi hangin Kawlsum mankia hi. 1988 leh 2007 buaina hangin zong Kawlsum mankia hi. 2012-13 kumin summan kiamna 2.8% hi-a, 2013 - 14 budget kumin 5.8% tungsuk a, buhpiang kiamna hangin kumpi in sum leitawi piak atamna hangin zong Kawlsum mankiam hi. Khasum khang ding kigenpan vanman khang ta ahih manin India kumpi in lothang leh simai mankhan ciangin 1955 The Essential Commodities Act tawh vanman abawlsakna mah bangin kumpi in tavuan nei hi ci-in Aya ah kisuah hi. qZT

 

Kiteelna PR System Kizang Leh By-Election Om Theilo Ding:  Azen zenin 2015 kiteelna ah PR system - Vote ngahzah zui thuneihna kizang hileh President leh MP khatpeuh asi, atawp om leh By-Election om theilo ding a, buaina om ding hi ci-in U Aung Kyi Nyunt in gen hi. Minam Innpi in PR kiteelna zat ding thukimna nei napi buaina om thei ding galmuh uh a, Mipi Innpi in PR kiteelna leh 2008 Danbupi thukhun tawh kituaklo hi ci-in zatloh ding thukim hi. Hih Innpi2 deihna kibanglo ahih manin December 14 ni Gambup Innpi khawmpi ah gen khawm ding uhi.qDVB

Kawlgam Ah PR-Permanent Residence Kipia Ta Ding: Kawlgam ah gamdangte sauveipi om theihna (PR-Permanent Residence) pen December kha panin kipia ding hi ci-in Lahwahkah Director U Mg Mg Than in gen hi. PR ngahlo dingte - UNHCR in UN gambel apiak mite, gamdang ah politics gambel mite leh blacklist ah kihelte, Natna gil neite, Kawlgam buaisakte kipialo ding hi. PR tawh omtheihna angahte kum 5 hidinga, kum 1-US$ 1000 pia dinga, innlehlo nasep nei thei ding hi. Vote pia theilo ding, kumpi nasep, party leh kuanglui theilo ding hi. Kawlgammi ahisate UN Refugee hinawnlote PR kipia thei hi. qMAL

 

Golhguknepen Gam3 Ah Kawlgam Kihel: Leitung ah golhguk nekna ansiapen gam 3 - Kawlgam, N.Korea leh Afganistan hi ci-in German Transperency International in Dec. 3 ni-in tangko hi. 2014 golhgukne tehna ah Kawlgam -156, Afgan-172 leh N.Korea 174 ah om hi. Gam 175 lak ah asiangthopen gam - 1na Denmark, 2na New Zealand, 3na Finland gam hi-a, gam 10 lak ah Singapore kihel hi. Golhgukne suksiapen Somalia, N.Korea leh Sudan gam hi. 2012 kumin Kawlgam pen 172 na - asuksiapen gam 5 lak ah kihel a, 2013 kumin 157, 2014 kumin 156na ah kahto hi. qDVB

Makai 6 Kimuhna Ding Kician Nawnlo: Gambup Innpi in Makai 6 kimuh ding khensatna pen President lehGalkapmangpi in sang zolo a, Innpi leh kumpi kikal kitelkhialhna lianpi om hi cih kimu hi. Presidentzum speaker (thusapi) U Ye Htut in Innpi thukhensatna in mimal bulphuh a, kumpizum in party, minam leh kipawlna bulphuhin muhna kibanglo hi ci-in hoih asaklohna leh anialna gen a, makai 6 kimuh ding hun 2015 May kha akigeel hangin pianglo thei a, 2008 Danbupi puahna gambup lungsim etna zongh hithei nawnlo thei ding hi ci-in kilungkham hi.  qAYa.

leitung thuthang (world news)

Taiwan Kumington Party Chairman Tawp:  November 29 kiteelna ah tulaitak kumpi (President) asem Kumington Party in kiteelna ah mun 22 lak ah mun 9 bek ngah a, alang DPP party in mun 13 ngah ahih manin kiteelna ah guallelhna hangin Kumington Party Chairman pan tawpin President hihna lenlai hi. President Ma Ying Jeou in Taiwon mipite lunggulhna bang kisem zolo ahih manin mipi muanna leh deihna kiam hi ci-in kipulak hi. PM Jiang Yi-huah pen kiteel ni-in tawp hi. January kha sungin Party chairman thak kiteel ding hi. Kumington Party pen China tawh kizop ding unggulhte hi-a, Taiwan mipi in Democracy kumpi deih hi cih kilang hi ci-in DVB in gen hi.  qBBC

Editorial ...............?

ciimnuai project

(Zomi Heritage & Environment Trust - Zomite Tangthu, Munlehmual Kepna)

                        2009 Saizang crusade hun sungin hausa upa khuamite deihna leh Zomi makai pawlkhatte veina tawh Saizang khuasat Pu MangSum Naipi committee in Naipi abawl kawmkawmin Saizang gamsung Ciimnuai khuamun leh Zomite tangthu tawh kisai Saizang gamsung ah tam mahmah ahih manin Zomite tangthu leh munlehmual kepna leh puahna kinei zo leh ciin masuanin kinei a, Naipi committee in Ciimnuai Project ciin minvawhin Saizang ukpi Pu Tual Kho Mang (Mangtal) thudotpi tawh Committee thukikupna ah Ciimnuai khuamun ah ZO INN lam ding leh Ciimnuai khuamun puahlehzun ding lunggulhna hangin Cope Centinnial Jubillee muakna kawmin Pu MangSum Naipi mansiang nai takei leh apna hunpi kibawl a, Rev.Dr. Do Sian Thang in Ciimnuai khuamun mualsuang phuhna gei, Ciimnuai ZO INN lamna ding mun ciaptehna suangphuhna kinei hi. Pu Tual Kho Mang in ka pu ka pa ukpi sepna khua ah Naipi kibawl a, ka pu ka pa gamsung, Ciimnuai khuamun ka losung ah Zomite kipatna tangthunei mun ah ZO INN kilam ding ahih leh lungdam mahmah hing, hibang hun dingkal ka ngaklah mahmah tun hong tungta ahih manin  Ciimnuai khuamun ka  lomunteng Ciimnuai project sepna dingin kong pia hi ciin khitui luangkawmin Naipi Apna hun athugenna leh thungetna tawh piakkhiatna hong nei a, apai khempeuh lungdam lua kisa-in khitui mualtuangin ki-om a, Saizang Hausa Pu Suang Zam Thang in vok tul 5 go-in pawi kibawl hi.

                Tu-in hih Saizang khuamun ah innlam ding kigeel a, 2015 kumin lam zawh ding lunggulhna aki pulak ciangin India Zomite in ko zong hong kihel ding hi ung ciin kamciam hong pia uh a, tuin amun leh innlim, sum beizah ding kigeel ta hi.  2015 sungin Ciimnuai khuamun ah ZO INN kilamzo ta dinga, Zomite pianna kipatna mun a'en avel nuamte khawlna ding Innlimnuam leh tangthu kantheihna ding ngimna tawh kisem ding hita hi. Tua  hi a,  Kawlgam leh gamdang omte in zong ihihtheihna leh imapan theihzah sum leh van tawh ma ipan ciat dingin hong kicial hi. Ciimnuai ZO INN ah Zomite tangthu atomkim simtheih dingin kikoih dinga, Zomite tawh kisai mun minthangte zong mailam ah kisem toto ding hi. Akhuakhua leh amimal zuiin Ciimnuai project aa ding mapang nuamte in Sia Lang Khan Khai(Kalay), Sia Song Za Tuang(Kalay), Hausa Suang Zam Thang(Saizang) tung ah kipia thei hi.

……………………………………………………………………………………………………………………

            ZOMI TIMES WEEKLY NEWS

                         Vol. 8, No.50                                                   14 december 2014

 

makai 6 bek hilo, tualsuak minam mak hi te zawh kimu ding tualsuak minam mawgpite in ngetna nei

      2014 December 9 niin Yangon Region Innpi kikhopna ah  Tualsuak minam Committee Chairman - Karen Minam Mangpi U Saw Tun Aung Myint in Nipidaw Innpi ah makai 6- President U Thein Sein, Mipi Innpi Ukpi U Shwe Mann, Minam Innpi Ukpi U Khin Aung Myint, Galkap Manglianpi Sr. Gen. Min aung Hlaing, Daw Aung San Suu Kyi leh Tualsuak minam makai khat  Dr. Aye Mg kimuhna ding Nipidaw Innpi in ageelna ah Tualsuak minam 8 pan makai khatciat kihel ding kilawm hi ci-in thusunna nei hi. Tualsuak minam makai khatbek kihel leh ama minam ahilote i majority interest (kisapnate) genkha lo ding ahih nanin Tualsuak minam 8 pan makai khatciat kihel ding hoih hi ci-in khauhtakin gen hi. Sagaing Innpi ah zong Chin Mangpi  Pu No Than Kap in Tualsuak makaite kihello-in Kawlgam ah kilemna igen hangin amawkna hiding a, Tualsuak minam 8 - Kachin, Kaya, Kayin, Chin, Mon, Rakhine, Shan pan khatciat kihel ding kilawm hi. Tualsung Innpi (State/Region) makai leh Tualsuak minam Mangpite kihel lehbek thukikupna hoih ding hi ci-in thusunna neia, Sagaing Innpi in December 9 ni-in sang hi.

                Yangon Innpi in December 10 ni-in hithu kikum ding uh a, MP khat ciangin minute 15 vallo genthei dingin Innpi ukpi in phalna pia hi. Hih makai 6 kimuhna ding geelna pen Nipidaw Innpi in November 25 ni-in kipsak hi. Kalaymyo khuami khat in hibang kimuhna a'om hangin Tualsuak minamte kumpite in itna deihsakna leh lam honsakna aneih masiah, Tualsuak minamte gamhawmna akitangkim masiah, kilemna leh khantohna om ngeilo ding hi ci-in gen hi. Adiakin Kawlte in minkhel baihlamsak napi Tualsuak minamte min adik a khel ding haksa sa uhi. Makai 12 tawh kilemna apiangzo tuan ding hiam ci-in alung patauhna uh gen hi. qDT,MAL zogam thuthang (Zogam news)

Campaing & local govermance worshop Om: Dec 4-10 sung Sun Insitute, Yangon panin Theingara Hall, Kalaymyo ah thusinna om hi. Party tuamtuam leh CSO panin mi 70val kah uhi. Tua lai ah kiteel cianga candidate dingte kiginkholhna ding volunteerte sepzia ding mipite in amite  nuntakzia, mipi aa ding asepkhiat thute om maw, Omlo cih tel masak kisam hi ci-in thusinna leh mimal kisinna hun, Singunau ah (field work) nei hi. Ann vakin, laibu bu 3 tek (Ks.10000 man),Ks.5000 man puan-ak (T.Shirt) khattek hpia hi. Zomite in Mipi phattuamna ding alunggulh antangman kiam, lampi hoih, mei (electric Power) hipen a, Laisim (Journal/ News) thadah icihtei hangin Lai Siangtho simmun mahmah cih Kawlte in hong theihpih ahih manin thupi hi. Party vai thei vetlo, mi minthang khat amin gen ding theilo kitam lai mahmahin ithanemna ahi hi. Mi khat vote tawh iteel cing ciangin Mipi, Minam leh Tualsung mangpi hi cihbek  hitheilo ding a, amaute in mipite aa ding asepsak theih aki batlohna itel mahmah kisam cih hong phawk sak hi.. qZomi Times Reposter)

 

Munlai vokgu thang:  October, 2014 pen tuni dong amel ami kua hiam cih akitheician zo nailo vokgu pawlkhat om den hi. Hausa Upate buaiin nitaksim pang den uhi. Eima venglam zong tung ken teh kici theilo a hih manin kiginkholh ding kisam hi. Zannin  neihsate hoihtak kem in. Zan nai 9:00 khit, khat bek ahi a, nungak leh tangval ahi zongin Munlai lam vavak kei un, hong kivua thei, hong ki-encik thei hi. q KLT(Tahan)

tongphila vveng 4na ah kidawm In: Hih veng pen nidangin Tahan kici a, SHS No.2 sangsak a Tongphila Sang leh Tahan ZBC, Sihzang Biakinn kikal - Nipidaw tawh kikal hi. Zukham kitawng vanmang ngeilo, veng siangtho a kingaihsun hi. Zannai 9:00  khitin na tate, na zinte tungsak, tangval zukham agamlum a'omlohna dingom hilh in. Nazaret vengmakai khangnote in manin, palikzum hong ap kei leh palik zum (office) phone tawh hopihin venglepam buaisak zukhamte mansak uhi.                  qKLT(Tahan)

manipur  singpua mawtaw kiman: December kha sungin Luang-el khua Hausa makai-in  singzuakte Manipur Lamka pan mawtawpi tawh singpua mi 4, Cikha palikte in manin Tonzang Palikzum ah kikoih lai hi. Zomi vive hi. ZRDP in akizoppihte uh lau a, aminampihte (Zomi) ahih manin Police Offecerte leh mundang hopihna thugenna  Ks.90000 val bei ing, igam ilei a singzuak hiin hoihlo hi ci hi. District Administrative officer sangin Hakha  zum nasemte thuneihna sang zaw ci-in ni 11.12, 2014 in Zomi Times Reporter kiang gen hi.    qKLT(Tahan)

kawlgam thuthang (Myanmar news)

Lokho-Nasem Party Kiphuan: Pathein, Ayawaddy phualsatin Kawlgam Lokho-Nasem Mipi Party pen 2014  December 9 niin Kawlgam kiteelna Commission in ciaptehna nambat 79 tawh sang uh a, Kawlgam ah party 79 om ta hi Kawlgam ah lokho nasem pen Kawlgam mipi 60% om a, tuate vote lam-etna tawh akiphut ahih hangin Ayawaddy gamsung teng ah lalzo bekin ki-um hi. Mon numei party zong kiphuan a, Kawlgam numei khempeuh huamnuam ta leh, Mon minamte makaihna ci-in kithusim lua thanto hi.   qMAL10

 

Kawlgam Mei Ngah/Ngahlo Lahna (MAL 10)

No.       State/Region                Myone          Meingah            MeiNgahlo

1.        Kachin                                   29                    10                       19

2.        Kaya                                        8                      5                         3

3.        Kayin                                    18                      4                       14

4.        Chin                                      13                      4                       13

5.        Mon                                      13                      9                         4

6.        Rakhine                                 20                      8                       12

7.        Shan                                      84                    41                       43

8.        Sagaing                                 46                    27                       15

9.        Mandalay                              28                    27                         1

10.      Pagu                                      33                    33                         0

11.      Magwe                                  27                    22                         5

12.      Tanintayi                               16                       -                       16

13.      Nipidaw                                  8                      8                          -

14.      Ayawadiy                              34                    28                         6

15.      Yangon                                 21                    20                         1

                                                       398                  243                     155

2015 Tan 10 Laivuanna Hungeelna (900-1200):  11.3.2015 -Myanmasa, 12.3.2015 - English, 13.3.2015 - Maths, 14.3.2015 - Myanmasa (Optional), 16.3.2015 - Chemistry, 17.3.2015 - Physics, 18.3.2015 -Biology/Economics, 19.3.2015 - Geography, 20.3.2015 - History kivuan ding hi. Tan 4(District sit) leh Tan 8 (State/Region sit) pen 2015 February kha beikuan hidinga, tualote February khabul lamin kivuansak ding hi. Kumpi laivuan nawkmunte mah mipil milian suaka, gamdang sangkahna ah minuai ah omlo hi.   qMAL

 

Naga Minam Ni Zumkhak Ni Dingin Ngen: Naga Minam khawmpi pen December 9 ni-in nei uh a, thu 27 tankona sung ah Naga Minam ni - Zumkhak ni dingin ciaptehna piak dingin Naga Minam khawmpi makaite in tanglo hi. Naga Minam khawmpi pen November 27-1 December sungin khamti ah nei uh a, December 9 ni-in Yangon Yuzana Press Conference ah tangko u hi. Naga minan pen chinsung ah kihel a, 2014 Census ciangin 914-Naga ah gelhin Cersus ma-in Nipidaw innpi ah Nagate chin ahih lehna thu hangsan takin genngam uh a, Zomi makaite tawh kilam dang mahmah hi c-in zomi - 914 a gelh khat in Zomi MP te amawhsakna thu gen hi. Chin minawmpi sungah on sangin Naga minam neu, amau hihna teekzaw uhi. Hih Khawmpi ah Nagate neih ngeisa gam khempeuh Naga gam (Territory) dingin cingtehsakna ding, Sagaing kumpi ukna nuai ah omlo-in Nipidaw tawh di rest kizopna ding, kumpi in lampi - lei hoih tak a bawlsakna ding leh Naga pawlpi pen kumpi ukgawpna abeina ding ch thute kihel hi. Kumsimin January 15 ni pen Naga Minam Pawi ci-in U Khin Nyunt hunlai pekin lumpi in bawlsak a, Naga mite in kumpi bawlsak lung dam lo-in amau makai a a bawl ding uh ngen zaw sop u hi.   qHotnews DT10

 

Pi Suh Kyi Kumpi Seploh Ding BBC In Genkhol: NLD president  Pi Suh Kyi in kumpi septheihna ding Danbupi (thukhunpi - 2008) pen Galkapte in laih nuamlo a, 2015 Kiteelna ah kumpi dingin kitel theilo ding hi ci-in BBC in Dec. 10, 2014 in Radio ah gen hi. Amah gamdang pasal nei hiin, atate England mi hiin Kawlgam mi hihna galkap kumpi hunlaiin phiatsak khin hi. Kumpinu tapate gamdangmi hiding cih na ngaihsun thei hiam?q

 

Kalaymyo  Lokhomite in Nursing School Munteval ngenkik:  Kalaymyo Mawtawneu khawlna gei, Ngasa khawina huangsung ah tulai takin Nursing & Midwife  Trainning School kilam hi. Tua mun pen Eka 20 val hiin leitang (Lo)  nei mi 50val in Nurseing School lamna ding Eka 6 val bek hi. 1975  Socialist Lansin  party in alaksak ahi hi. Leitang avalte piakkik dingin leitang neite in Eka 700 val 1915  kum mah akilaksak Kyaukme myone  leitang aneite  kipia kik ci-in  May 14,  2014 New Light  of Mynanmar News ah Suak hi, Hih thu siksanin Kalaymyo  leitang neite - Pu Lang Suan Thang, Pi Mapuite in mundang kipia kik ahih leh aleitang valte bek midang tung ah summeeta kizang ding veve hong pia kik uh hen ci-in ngen uhi. Hih leitangte hun sawtpi kikhal lo ding hi ci-in  District General Administrateive  Mg Htoo in gencian hi. Tua leitang Dec. 4, 2014 niin ngahkikna ding lokho mite in  Kalay 88 - Peace  pawl  office ah gen uh hi.q(Reff: Hot news Dec. 12-18, P. 9).

 

Leitung Golhguk Sum Nesim Gam Myanmar No. 175: 2013 in Myanmar, North Korea leh Afghanistan te bangin Sum ne sim in min thangin No. 157 ah a om hang tu kum in leitung a golhgukna sim gam zo ah ki hel lai hi. 2014 kum in Germany gam Transparency Internaltional pawl in Sumnesin gam Myanmar  No. 156, Afghanistan No. 172, North Korea No. 174 in om hi. lei utnah gamtat hoih pen genbanglo Denmark, Newzeland leh Finland khat, nih, thumna ah gan 175 lakah ki hel hi.qReff: Hot News Dec. 12-18, 2014 (P.11)

 

Kawlgamsung Galkap Kumpi Bukna Leihawm Video on: Hih  VCD/EVD  pen Yagana Ciamnuih siampa  lakna om hi. Asung ah U Than Shwe  in North Korea leh Russia tawh galvan kileina thu alim  athu tawh om hi. Neiclear bomb bawlin North Korea bangin om ding ut, USA lau veve uhin Kawlgam sunga leihawm atawhna uh Unity Journal leh DVB TV asuak ngei thu hi. Na deih leh Ph. 0933567674 ah Ks. 500 tawh hong pai in.  KLT(Tahan)

leitung thuthang (world news)

us nasep 321000 pai zo:  Leitungbup Economic a kiam hnagin US in agam mite NOvember khasung bekbekin nasep 321000 pai zo a, Economic lam khong mahmah hi ci-in Nasaem Mangpizum in gen hi. 1995 kum panin US nasep neilo mi 5.8% ah khawl in kiam nawn lo a, khamtoh lam manawh hi. US kumpi in nasep piak dingageelna sangin 44000 a valin nasep piazo uhi. Germany, China leh Japaw Export tunga kingakna kiam hi. 2015 kiteelna ah Democrati party pan Hilang Clinton in President kuang l ui dingin kilam en hi. Republican party kuang lui ding kithei nai lo hi.  qBBC

Israel Parliament Kiphiat Ta: 2015 March khasungin Israel kiteelna ding hangin Nasset innpi ukpi Julic Addistein in March 17 ni kiteel ding gen a, PM Netanyahu  in Nasset Parliament phiat ding pulak hi. Israel mite gam tuamtuam pan apai ahihna hangin Party khat in atamzaw tawh zo cih om ngei lo a, party kipawlpih tawh kumpi phut uhi. Netan yahu in 2009 - 2014 sung term 3 sem khin a, ngahlai leh term 4 asem ding ahi hi cih akigen hangin mipi deihna kiam hi ci-in CNN, AFP in gen hi.  qBBC

Pilna/ Nasem (Education/ Job)

Kawlgam Techno Uni Sang Ah 1200 kila ding: Kawlgam sung Technology University Sang - 17 ah Sangnaupang 1200 (2014-2015 Sangkum sung) kila ding hi ci-in kumpi in gen hi. Myitkyina 40, Bamaw 50,Loikaw 50, Pha-An 40, Kalay 100, Tavoy 120, Meik 130, Pakokkcu 70, Yametin 70, Sittwe 30, Lashoi 70, Kengtung 60,  Pinlong 80,  Taunggyi 70, Henzda 80, Pathein 50,  MaUpin 80 kila ding hi. Engineer sangkum kum 6 hi ta a, Mark 380 tungsiah angahte kah thei a, BE kipia ding hi.  Tan 9, Tan 10 Techno. High School zong kikah thei a, qualify tawh azote in BTech zom theiin azolote certificate tawh nasep ngah thei hi.qMAL 9

Piangsiah Zum Ah Asst.Grade 40 kidieh:   Kumpi Piangsiah (Tax)  zum ah Asst.Grade (99000-1000-104000) khasum mun 40 awng hi. BCom/CBA-16, BEco-8, LLB-8, BA (Eng) -4, BCSc/BC Tech-4, kum 30 vallo, 2015 January 9 ma-in Piangsiah zumpi No.46, Nipidaw, Ph:067-430021 ah form ki-ap thei hi. qMAL 9

Sumkhekna (11 Dec 2014) 

US $     1 -        1044/1048         Bath             1 -        30/30.2

EU $     1 -        1265/1280         India Rs        1 -        16/16.5

S $        1 -           782/786         Sen Yuan      1 -       165/170

Malay Rm 1 -        320/322

ZOMI TIMES TATNA THUZAKSAKNA

(1)  Zomi Times tatna sum apiate tung ah kilungdam mahmah hi. TatnA sum tawh akihawm toto hi-a, apia nailote leh 2015 alalai dingte in min pia-in sum piapahte kipia suak dinga, sum piazo nailote in 2015 February kha beiin piak ding akamciam ngam leh kipia bek ding hi. Apialote hangin sum leiba tampi kinei hi. Sum pialote laibu sungah kiciamteh a, khantawn leiba nei ding i-ut kei leh pia ciat ni.

(2)  2015 vanman khanga, Democracy Today zong 2500 pan 4000 khangsak uhi. Ei zong A3 size tawh lim (photo) thuah khawmin kum1-4000 hisak ding maw, aluicia kha 1 - 2vei hawm ding cih ala mimal in Agent tung ah hoihsakpen na gen un. Amau ciamtehin hong puak ding uh a, atamzaw deihna bangin kihawm ding hi. Hithei hileh mailam ah offset ah color tawh kibawl nuam hi. 2015 kum kiteelna hun sungin atjheihnop huai thu tampi om ding a, Zomi Times in Kiteelna, gamvai leh mipi theihtuakte akicianin ahun zuiin kisuah ding hi.  Abeisa hunin zong Zomite in Kawlgam leh Leitung gamvai, kumpi kiuknavai l eh tualsuak tualsung mite supna leh meetna ding thute kician takin kisuah a, thumaan thudik ahih leh hangsan takin kisuah hi.  Zolai tawh kisuah ahih manin Zomite mah kithupisak a, ahi zongin ahuamkim thei dingin adang thute zong kisuah hi. Zomi Times asim, sum apia leh Agent semte khempeuh tungah lungdamna lianpi om hi.

(3)   2015 January khabei kuanin Zomi Times Conference kibawl ding hi. Kawlpi, Tedim, Tamu, Tonzang leh Cikha ah atuam ciatin kibawl ding a, Agentte tawh tuamin Kawlpi ah kimuhkhopna zong khatvei kinei ding hi. Ahun ding hong kizasak kik dinghi. Tua hun ciang in zomi Times Agent leh ala a lei a simte kimtakin i pai kha um ciat dingin hong kizasak khot hi.

Editorial ...............?

CIIMNUAI PROJECT - 2

            Minam khempeuh in khangluivan, Mun lehgamte kemin tangthu kanin puah uhi. Chin State Kumpi inzong Myanmar kumpi in mun thupi leh munlui aciaptehsak ding hanciam uhi. Tua mah bangin Kawlgam khuapilui Visanu, Hanlin, Takong Innluite leh  tangvan pupagam khatin UNESCO in ciaptehsak ding hanciam uhi. Laimite (Hakha, Falam) Lailun khualui pan piangin, Laimi kiciin  Lailun khua puah uhi. Ciimnuai pan  pusuak Thado, Zo, Vaiphei, Sihzang, Ngawnte leh adangte in Ciimuai khualui ipuah ding ahi hi. Hun khat ciangin ithupisak kei zongin itang thu, ipusuahna Ciimnuai mah pan kipan ding hi. Akisam thute Ministry of Culture Dept.  ah ipulak ding ahi hi. Ciimnuai ah Innpi ilam khit ciangin Khangluivan Zongeina galvan, Puansilh, vanzat, innsung vanzatte kikoih ding hi. Hih vante nang mimal, innkuan minin na piaknop leh khangthak Zomi tangthu ah kiciamteh dinga, tuni a kipan kipia thei hi. Ciimnuai innpi sung ah beh tuamtuam tangthu atomkimin kigelhkhia ding a, Ciinmuai -Saizang Mang (Ukpite) thu, Ciimnuai khuamun pan lalkhia beh masate thu gelhin laibu ah kikoih dinga, Manglai, Kawllai, Zolai tawh kigelh ding hi. Tualgal kidona, Mang/Ukpite siahkaihdan video kilain lenglate (Inland, Foreign Tourist) khempeuh et theih dingin kilak ding hi.

      Zogam pan Kawlgam zanggam gamdang tung Zogam zin dingte Ciimnuai khuagei, Saizang vanlengtual  (Air port) tung masain, LianDo leh ThangHo Hotel, Lengtonghoih Park ah nuamtak tawlnga masa ding uhi.  Pastorte thungetna tawh vaidawnin kikha ding hi. Ciimnuai History Committee in tulaiin tangthu akaihkhop laitak hi a, ibeh tangthute deihkaih lua a, Ciimnuai ah ibehpite hausa (UKpi) sem ngeite  uplohteng kikipsaklo dinga, Khangsimna saulua leh tomluate enpha kik ding hi. Tuni a kipan Ciimnuai project committee tung ah beh laibu khattek ap leng,  Ciimnuai library ah hong kikoih sak ding hi.      Committee

 

 

……………………………………………………………………………………………………………………

 

              ZOMI TIMES WEEKLY NEWS

                             Vol. 8, No.51                                               21 december 2014

 

Kawlgam president U thein sein leh mangpite zogam ah zin

      Kawlgam President U Thein Sein pen December 17 ni ziangsang lamin Kumpi vanleng khat leh Hysky Helicopter 2 tawh Kalaymyo vantengtual hong tunga ulian makai tampi in vaidawn hi cih thu kiza hi. Nidangin kumpi uliante zintung ding hileh innsim mi khat vaidawn ding thagum hatna tawh kisawl a, tutungin mipi tampi kollawhlo, buaisakloin kumpi hong zintung hi cih akizak ciangin mipi in lamdang kisa hi. President U Thein Sein pen Kawlgam Mangpite - U Soe Thein, UTin Naing Thein, Lt.Gen Thet Naing Win, Lt. Gen Myint Soe (Kahthalhsah), NW Commander Brig. Min Naung leh Sagaing CM U Tha Aye, Magwe CM U Bung Maw Swe in vaidawn hi.  Kalay Khuasung leh Bunglung (Yazacho) Dam project, Manipur Myittha Dam Project enin pai hi.  Kalaymyo University 3 - Kalay University (9 mile),m Kalay Computer University leh Kalay Technology University pai a, Kalay khuasung khanthohna nasepte en hi ci-in thu kiza hi.

        Zogam Rural Development Program (ZRDP) Pu Vum Za Nang in President U Thein Sein vaidawnna Kalay vanlengtual ah khut kilenin "Kimuhloh sawt ta ei" ciin hong hopih hi.  Lt .Gen Myint Soe in zong limtak hong hopih hi" ci in Zomi Times tung ah gen hi. President U Thein Sein pen Prime Minister ahih laiin hong zin ngei a, President asuah zawh tutung hong zin hipan hi. Amah pen Battalion 87 ah 1988 buaihun sungin Kalay ah om a, buaina ah galkapte paisaklo hi. NW Commander tawh sauveipi Sagaing ah om a, Kalaymyo ah innteek mahmah hi. Pawlkhat in U Thein Sein pen Kalaymyo pen aneu laiin akhankhiatna hi a, Zomi hiding hi aci om ngei a, amah pen Ayawaddy gamsung ah piang hi ci-in Journal tuamtuam ah kisuah a, Ayawaddy tualsuak hi ci-in kigen hi.

                December 16 ni-in Tamu ah U Soe Thein, U Tin Naing Thein, Lt. Gen. Tin Naing Win, U Khin Mg Soe leh U Khin Yi Kawlgam mangpite zin uh a, India-Myanmar gamgite enin pai uhi. Tamu Townhall ah mipi tawh kimuhna om a, U Soe Thein in Tamu District sung makaite dotnate dawngin Kawlgam kikhelnate cingtakin gen hi. Amauteng mah kumpi U Thein Sein tawh kithuahin Tamu, Kalay, Kalaywa, Gangaw kimteng enin pai uhi cih thu kiza hi. Kawlgam galkap mangpi zong Kalaymyo hong pai ding pen hong pai nailo hi ci-in kigen a, tuteng Zomite tampi atenna Kalay leh Tamu gam ah kumpi uliante hong zinna in hamphatna tampi om ding hi aci zong om a, ei theihloh thulian vailian om hiding hi aci zong om hi. Bangthu bangla ahi zongin kumpite Zogam zinna hangin Zomite noptuamna tampi piang ding hi ci-in kilam-en hi. Chin Special Division hunlaiin Chin state in Kalay leh Tamu kuamten ghuam hi ciin kigen ngei hi.  qVoice zogam thuthang (Zogam news)

Pinlong Crusade, Seminar leh Silver Jubilee Nuamtak Kizo: Kalaymyo Seikkanta leigei Pinlong Tuiphum pawlpi (Biakinnsan) in pawlpi phuhzawh kum 25 cinna Silver Jubilee pawipi (1989-2014) thupitakin bawl uh a, Crusade leh seminar tawh thuah uh cih thu kiza hi. Frontier Harvest (USA) Founder Chuck (Charles Lenhart) leh atapa Jared Dan Lenhart, Thailand Missionary Dan Edger Ecker, Singapore Education Specialist Dr Chen Ya Chin, Vietnam Church Planter Doung Ngoc Hoa An, Chinese Missionary (Lashio) Luke leh azi Jenevy in Dec. 10-14 nitaksim thugenna leh Dec. 11-13 sunsung thusinna neihpih a, 2015 Myanmar Mission Trip - ni 7 apai dingin khangno tampi ki-ap hi. Hih ni 7 Myanmar Mission trip ah khangno 100 kideih a, mun 20 ah team 20, team 1 - mi 5 kisawl dinga, akisam sumlehpaite Frontier Harvest USA in hong sik ding hi cih thu kiza hi. Silver Jubilee sungin KZBA GS Rev. Thang Tung Nung, ZBCM - AGS Rev. Lang Za Kap, Frontier Harvest Founder Bro. Chuck leh Pinlong pawlpisia masa Rev. Kham Suan Mung in thugenna nei a, Rev. Dr. Lang Khan Khai in Jubilee Mualsuang leh Rev. Dr. Lang Khan Thang in zum honna nei hi. Lengtong Kam Khen zong Jubilee pawisim hong pai a, mipi lungtaisak mahmah hi cih kiza hi. qPinlong Media

KZBA-MC Pension Scheme Committee Kiphuan:   Silver Jubilee tawh kithuahin Pinlong pawlpi in KZBA-MC Meeting leh Retreat zindo uh a, KZBA-MC in Pasian nasemte in Pension neih/ngah ding kilawm a, Pasian nasep ciaptehna zong hiding hi ci-in Minister 55 in Pension Scheme neih ding khensat uhi. Hih Pension Scheme pen 2015 January pan siate in kum 1-10000/-, kum 10 sungbek khol dinga, kum 65 acin ciangin Pension ngah ding hi. Association, pawlpi leh mimal piak sum panin Pension Scheme sumbul kipat sawm hi. MC-Retreat ah Bro. Chuck leh alawmte 6 in thusinna neihpihin Rev. V. Cin Ngaih Thang in Kamphen a, tha kingah mahmah hi. Hih Pension Scheme pen KVBC in kum sauveipi laiin aneihsa asepna uh ettehin akibawl hi-a, KVBC tung ah zong lungdamna lian hi ci-in KZBA-MC Secy in gen hi. Pawlpi tuamtuam siate Pension nei nailote in neih huai hi ci-in tutung siate lungkimna kimu hi. q KZBA-MC Pension Scheme Committee

ZBCA-USA Pawlpi 11 Pha Ta:  ZBCA - Zomi Baptist Churches of America pen 2012 kumin pawlpi 4 tawh kipan a, 2014 December ciang pawlpi 11 pha ta uh. 1) ZBCM of Tulsa-Rev. Kap Khan Mang,   2) Agape Mission Church-Rev. Pau Khan Lian (Nashrille),    3) Zomi American Community Church -Rev. Dr. Tun Cin Kap (Pensacola)   4) Zomi Community Church-Rev. Tual Khaw mang (Denver),   5) Zomi Christian Church-Rev. Kai Sian Mang (Houston), 7) Agape Church (Fortworth) - Sia nei nailo, 8) Zomi Baptist Church (Seattle-Portland) - Sia nei nailo, 9) Grace Zomi Baptist Church -Rev. Hang Go Thang (indianapolis),  10) Zomi Christian Church-Rev. Muana Khup Thong (Portland) ahi uhi. USA gam sung ah Zomi pawlpi 50 val bang om ding a, Rev. Cin Khaw Kham-Tulsa AG pawlpi mi 500 val atampen hi-in anihna - Rev. Tl Mungbawi (Mauvom) pawlpi mi 300 (Atlanta) hi-in pawlpimi 200 leh 100 gual tampi om ta hi. USA Zomi Tuiphumte atamzaw SBC tawh kizom uh a, AG leh adangte abulpi tawh kizom uhi. Zomi mimal 10,000 val USA ah om ding a, Malaysia ah 20000, val, Europe ah 2000 val, Singapore ah 1000 val leh New Zealand-Australia kigawm 1000 val, Kawlgam Zomite om ding hi ci-in ki-um hi. Kawlgam Zomi 250,000 (Chin State -120,000 +  Kalay Kabaw Yangon -130,000) leh India Tonsim leh Lamka kuam ah 300,000 val om ding hi ci-in kigen hi.  qViber

kawlgam thuthang (Myanmar news)

Kawlgam Nagate in Nagamese Zang Ding: Kawlgam Nagate in India Nagate zat Nagamese pen a,b,c zangin Kawlgam ah zat ding khensatna nei ta uhi. Hih Nagamese - pau leh lai pen India Linguistic Scholar leh International Linguistic Scholar kipawlin India - Kawlgam Nagate zat dingin geelna nei uhi. India Nagate in Mangpau siamin zang uh a, Nagamese zong thei kim uhi. Tu-in Kawlgam Nagate in  Nagamese zatna dingin Naga khawmpi ah thusunna kinei ding hi ci-in Naga National Council / Naga Culture Committee makai U Suh Mg in gen hi. Kawlgam ah Naga 350, 000 val om a, Sagaing Region ah tengin Naga Ukpigam nei u hi.   qDT18Dec

 

2015 kiteelna ah vote zonhun ni 60 pia ding:  2015 kiteel hun ciangin ni 60 sung vote zonhun kipia ding hi ci-in December 15 ni, Yangon Panda Hotel ah kiteelna Commission leh party 62 makaite kimuhna ah Chairman U Tin Aye in gen hi. Leitungbup ah vote zonhun ni 30 bek kipia hita leh, Kawlgam lampi laksa hangin ni 60 hileh ci-in party makai pawlkhat ngetna hangin vote zonna azah nih sum bei ding hiphial lehzong, ni 60 sung vote zonhun ding kipia ding hi ci-in gen hi. Hih kimuhna ah Party bulphuh committee khat koihin kiteel hunsung party khempeuh zuih ding ngeinate kumpi in bawlloin pary khempeuh thukimna tawh kibawl zat ding ngeina bawl dingin kithukim uh a, numei kuanglui atam theithei lut ding zong kikum uhi ci in Decomcray Today Dec 16 ah kisuah hi. ZRDP Pu Vum Za Nang in Kawlgam politics pen eite telzawh ding ahilo ahun tun  ciangin kumpi lamte in amau deihbangin  heitheih dingin ahunma ahikhollo dingte pulaklakzaw zong hithei a, kidop huai hi ci in gen hi. qLKK

kawlgam van leng  galkapte' ni kibawl: Meikthila Galvanleng Sinna phualpi ah December 15 ni-in Kawlgam vanleng Galkap Ni  thupi takin kibawl a, Kawlgam galkap manglianpen Sr.Gen. Min Aung Hlaing in uap thei a, thugenna nei hi. Tua mun ah Tuigalkap mangpi Gen.Thura Thet Swe, Vanleng galkap mangpi Gen. Khin Aung Myint kihel hi. Vanleng lensiam lahna ah Army (leigalkap) phelak (flag-alan) pua vanleng masa-in anung ah Navy (Tuigalkap) leh Airforce (vanleng galkap) phelek pua vanleng in zui a, Meikthila leh Magwe galvanleng in Arrow Head lim tawh lengin Galkap manglianpen zahtakna pia hi. Vanleng lensiam lahna hi a, thangah huai mahmah ta hi. Galkap vanleng ahawl omlote 50 val Kawlgam in nei ta hi ciin galkap uliante in gen hi. qDT, MAL

myanmar public forum kibawl: December 11-14 sungin Yangon University Diamond Jubilee hall ah Myanmar Public Forum 2014 kilbawl a, kumpi in mipi aw - mipi kikona angai asem dingin thu 63 ngetna tangkona nei uhi. Hih Forum ah thubulphuh 4 - Peace (Kilemna) thu 10, Development (Khantohna) thu 30, Human Rights (Mihing khatciat hamphatna - mimal thuneihna) thu 18 leh Equality and Democracry (Liangko kikimna leh Democracry) thu 5 tungtawnin kamkupna om hi. State / Region kimpan CSO  leh party kihel kipawlna 126 pan mimal 554 kah hi. 2013 kumin Amasapen Myanmar Public Forum om a, ngetna leh tangkona thu 55 - kumpi tungah laiphah uhi. Workshop nam 15 ah kilemna leh mipi kihelna, lo leitang buaina, Meitui leh gas, Transperency (thumaanna), Tavuan lakna, Damlote Etna, Khamtheih buaina tawh kisai thute holimna nei uhi. qDT 16

 

lokho party kiphuan: 2015 kiteelna ah mualtung simloh zanggam khempeuh - Ayawady, Pagu, Sagaing, Yangon, Magwe, Mandalay, Tanintayi sung mun 150 ah Lokhio party in kuanglui ding uhi. Kawlgam lokhomi 78% pen khuano ah teengin lokho uh a, tuate khantohna ding deihna tawh lokho party kiphuan hi ci-in Chairman U Kyaw Swa Soe in gen hi. 2015 kiteelna ah Mipi lunglutna leh deihna dingin otna kammal - "Anne khempeuh in lokho  mite huh ciat ni, Anne khempeuh in lokho mite lungdam ko ni" cih kizang ding a, lokho party member 4 million om hi ci-in chairman in gen hi.qDT 16

bamar people's party (BPP) kiphuan: Yangon, No.10, Gawthnak st, Thayagone Ward, Mingala Taungnyunt Township ah zumpi neiin 2014 November 27 ni in Bamar People's Party (BPP) kiphuan a, Myanmar Election Commission ah laiphah uhi. Kawlmi party hi in limlah dingin kawldialkhip lukhu zong uhi. qGNLM 11 Dec

leitung thuthang (world news)

Japan kiteelna ah ldp in zokik:  December 12 ni in Japan gambup kiteelna om a, Prime Minister asemlai Shinzo Abe - LDP (Liberal Democratic Pary) in zo a, Shinzo Abe in 2015-2018 sung sem zomto ding hi. MP 475 lak ah LDP in 325 ngah hi. LDP pen Buddha Komito Party in huh hi. 2012 kum kiteelna ah Shinzo Abe in PM ngah a, kum 3 cinna in Economic tawh kisai ama policy apian theihna dingin kiteelna bawlbaih hi. NHK tangko ah LDP - MP 290, Komito - MP 35 kigawm MP 325 hi a, adem party pen Japan Democratic party in MP 73 ngah hi. 2025 kiteelna ah angah ciangin kumpi budget khangsakin sumlaidal akhet ciangin Japan sumbawlna kiamna hangin saletax (vanzuaksiah) pen 5% pan 8% khangsakna hangin vanzuak mihuate lungkim lo hi.  qBBC/ DT

Belgium Gambup Buaina Om:  Belgium kumpi thak in sumcil policy hangin Belgium gambup ah buaina om a, meileng leh vanleng line khempeuh zong khawlcip hi. Nai 24 sungin vanleng 600 val khawl a, vanleng - meileng nasemte zong, buaina lak ah kumpi policy deihlo pawl ah kihelin gambup deihngetna nei uhi ci in AFP in gen hi. Abeisa kha sungin mipi leh palik buaina om a, palik 112 liamin mipi 100,000 buaina sungah kihel hi. Buaina kipatna in kumpi in vanman khansakna, kumpi huhna phiatna leh Pension lakkum khansakna hanga buaina apiang ahi hi. qAFP

2016 USA kiteelna Om ding:  USA ah 2016 December kha sungin kiteelna om dinga, President kuanglui dingin George H.W Bush tapa George W.Bush naupa Jake Bush in President katuh ding hi ci-in Florida State Governor ebook leh email pan kithei hi. Kiteelna ah kuanglui ding khensatna thu email 250, 000 ah khaksawm hi ci-in ABC TV ah gen hi. Kuanglui ding hileh azi Columbus Bush leh atapa George P. Bush in lungkimpih hi. Amah pen Republican Presidency Candidate khat hiding a, Democratic Presidency candidate dingin Hilary Clinton min ngah mahmah hi. USA ah Party lian 2 - Republican leh Democratic bek om a, President tuh nuamte amau party sungah kidem masa uh hi. qAFP

Editorial ...............?

zogam, zomi, zolai, zo ngeina -4

(Zomite Pasian Anei Athei Minam leh Ngeina Kician Neite Ihi Hi)

            Leitung ah Ngeina kician anei tawm mahmah hi.  Adiakin leitung khualzinna leh nekzonna hangin leitung ah minamkim kitengkhawm gawp ta a, ngeina tampi kigawmin ngeina pawlkhat kinusia a, ei ngeina ahilo pawlkhat zong ila izang hi.  Gamdang tung Zomite in zong apu apa zat ngeina pawlkhat kimangngilhin pawlkhat mundang ah kizang thei nawnlo a, pawlkhat leuleu ei ngeina hita kei leh minam dangte tawh kikholhna ah izatpih om hi.  Midang tawh ikipawlnop leh ei ngeina pawlkhat nusiat kulin minamdangte ngeina pawlkhat zong izatpih kul thei hi.

1. Zomite Pasian Anei Athei Minamte Ihi Hi.

            Christian biakna hong tunma hunin Zomite in Ahing Pasian theiin anei minamte ihi hi.  Zeisuh min izakma thamin Ahing Pasian khat om hi, Amah in lungsim hoih lua ahih manin ei Zomite aa ding siatna hong bawl ngeilo hi.  Dawi leh Kau in hong bawlsia hong susia a, tua te lungkimna dingin biakkul paaikul hi ciin Dawi leh Kaute duh leh deih ding zu, sa, an, vante tawh ibia hi.  Dawi leh Kau ibiak hangin thupisa leh um hilo-in kihtakna leh sihna natna zawnna pan isuahtak theihna ding lel a abia ihi hi.  Damna Hauhna leh nuntakna Pasian piak ahihlam kithei napi, asusia thei Dawi leh Kau bia kei leng hong sisak nasak zawngsak hausak thei hi ciin ikihtak ilau main ibia a, nuntakna hauhna damna leh cihtheihna pen Ahing Pasian kiang panin hong pai a, amah bek biak leh paai ding hi cih itelloh man ahi hi.  Ahi zongin tu-in Christian biakna - Zeisuh Khazih nungzuihna thu itheih itel ciangin iminam bupin ibia izui ta hi.

2. Zomite leh Israel Mite Bek In Ahing Pasian Thei masa uh a, Pasian Piak Ngeina Kician ineihna Kibang Hi.

            Thuhilhkikna 4:7-8 sung ah Moses in Israel mite tung ah thu ahilhna ah " I kisap hun simin kiko leng ahong dawng eite Pasian bang anei minam lian kua om ahi hiam?  Eite bangin thukham leh ngeina kician anei minam lian kua om ahi hiam?" ciin Israel mite tung ah gen hi.  Israel mite in Pasian neiin Pasian piak ngeina leh thukham kician mahmah nei uh a, Lai Siangtho sung ah Israel mite in thukham 613 aneihna thu imu hi.  Zomite in zong Zomite zuih ding ngeina leh thukham kician inei hi.  Zomite Pawi leh sagawh, nopna leh dahna ah zuhawm sahawm ngeina kician inei a, tua ingeina koi ah kimu hiam icih leh nopna dahna a kigo ding vok, bawng luang khat tung ah tanu tapa, behlehphung,ulehnau, lawmlehgual ngah leh tan ding sahawmzia sehsa ahi hi.  UK leh USA in leitung kiukna thukhun Danbupi kician aneih hangin ulehnau behlehphung lawmlehgual tawh kizopna zuhawm sahawm ngeina kician neiloin amau utbangin deihsak leh tampi pia, deihsak kei leh tawmcik neucik pia hilel a, Zomite in panmun zuiin zuhawm sahawm akikhiam akikhan mawkmawk thei hetlo ngeina kician inei hi.  Leitung ah Zomite ngeina banga akician ngeina anei kuamah omlo a, Zomite minam lian ihi hi cih kilang hi.

3. Zomite Pasian Anei Athei Minam Lian ihih leh I Ngeina Kician Neihna in Zeisuh Upna Hisak NI

            Kumsimin angeina bangin lungdampawi ibawl hi.  December 25 ni Gumpa Zeisuh Khazih hong suak hi ciin biakinn ah lungdamna ko-in asuak Zeisuh Khazih biakna inei hi.  Ahi zongin Zeisuh nei taktaklopi angeina bang ahih leh leitung ah mihamsia pen ihi dinga, Zeisuh Khazih anei ihih leh ineih Zeisuh Khazih in Zomite minam lian a hong bawlna thu itelna hangin leitung ah mihampha pen ihi ding hi.  Zomite ihihmanin hampha kisak bekloin Ahing Pasian anei Zomite ihihna hangin mihampha hing acithei dingin Zomite iki deihsak hi.  Zomite minam lian a hong bawl ibiak Pasian pahtawina sangpen pia-in Topa sung ah nuam asa mahmah minamte ihih leh Pasian thupha ingah paisuak bek ding hi.  Zulehsa khamtheih leh sumlehpai bek ngaihsut a ineih leh leitung a mihamsia pen ihi ding hi.  Zomite in Pasian hong piak ingeina hoih ahi zuhawm sahawm zia mangngilhlo-in tanau meltheih naihuai leh lawmlehgual akilawm mun ah akoih thei dingte ihihna dingin Pasian in thupha hong pia ciat ta hen.  2014 Lungdampawi thupha in innsung bangkua leh mimal tung ah hong tung ta hen.

                     q Lang Khan Khai                         

 

 

           ZOMI TIMES WEEKLY NEWS

                             Vol. 8, No.52                                               28 december 2014

 

2015 kiteelna 2015 november khabul ah kinei ding hi ci-in kiteeina commission in gen

      2015 kiteelna pen 2015 October khabei, November khabul lam ah kinei ding hi ci-in Kawlgam Kiteelna Commission in January 1 ni-in tangko hi. Kiteelna ah vote pia dingte min akician kisam ahih manin 2014 November kha panin 2015 July khabei dong minlakna minkhumna kinei ding hi ci-in kumpi in gen hi. Vote neite minkhumna pen dawl 3 kikhen a, Yangon gamsung khuapiuk 10 leh Mandalay gamsung khuapiukte ah kila ta hi.  Tu laitak Kawlgam khuahun tawh aki-et ciangin kumpi galkapte in Minam galkapte dona nasia semsemin KIA Phualpi Laiza ah Minam galkapmang sinte Kawl kumpi galkapte in akapna hangin Minam galkapte tawh NCA - National Ceasefire Agreement (Gal Kilemna) bawl ding hun kisot toto hi. 2014 December kha sungin kilemna lai bawl ding kici pen 2015 February 12 - Kawlgambup Kigawm Ni ciangin akinei zo ding hiam ci-in NCCT(Minam galkap) leh UPWC (Kumpi Lemgen pawl) makai kihona ah gen uhi. Hibang thute ban ah Rakhine buaina zong vengzo taktak nai loin UNO in Rohinja minamte Kawlgammi hihna piak ding hanthawn a, Rakhine leh Kawlgam mite in asan theihloh hangin tu-in 1982 Upadi bangin Kawlgammi hihna lasak thei dingin phalna kipia ta hi. Mandalay buaina leh tu-in Letpadaung Sumsankhuk Project ah Sente(China) Wonpong Company leh Galkap Company -  Myanmar Economic Oo Paing kipawlin Letpadaung gamneite lo leh leitangte thagum hat tawh alaksakna hangin lungkimlohna tawh Buldozer mai ah lumin luangkhamte thudonloin Sente leh galkapte Company summeet deihna hang bekbekin Kawlgam tualsuak leitang nei mite aki thudonlohna bek hiloin thautang tawh mipi kapna hangin Daw Khin Win sihna hang tawh mipi kisosuah hi. Media nasem Ko Pa Kyi - Galkapte kaplupna thu zong tudong athu ala kigen nawn lo a, akap athatte hici bang thu kibawl hi cihna omlo hi.  Tu lai tak Kawlgam ah kiteelna kinei ding hi akicih hangin ahizo ngap ding hiam ci-in apatau tamzaw hi ci in Kalaymyo biakna makai khat in gen  hi. Party makai pawlkhat - U Thein Aye (Democracy Today) in 2015 kum pen Kawlgam Suahtakna Pu - U Aung San kum 100cin pawi bawlna leh kiteelna om ding hi. 2015 kiteelna pen mipi Deihteelna ineih theih kumhoih hi ci-in amuhna gen hi.

        2015 kiteelna ah 2008 Danbupi zuiin Vice President 3 - Galkap, Mipi leh Minam palaite teelte sung pan khatpen President hiding a, adangte nih Vice President hisuak hi. 2008 Danbupi akikheel kei leh Galkap palai Vice President ding leh President ngah thei dingin Sr. Gen. Min Aung Hlaing kilam-en a, President U Thein Sein pen Christian Siampi khat in President kuanglui lai dingin pulak hi cih kisuah a, Mipi Innpi Ukpi U Shwe Mann zong President utin kuamah in dong takei leh khatvei beek sem nuam ing ci -in pulak hi. 2008 Danbupi akikheel leh NLD makai Daw Aung San Suh Kyi adeih tampen a, nihna ah U Thein Sein kizomsakin U Shwe Mann, Sr. Gen. Min Aung Hlaing, Ko Ko Gyi, KIO galkapmang Brig. Gen. Gum Maw leh Shanmi panin khatpeuh kilimgen hi.

                President U Thein Sein in 2015 kumthak athugenna ah Tualsuak minamte tawh Galkilemna neihtheihna dingin 2008 Danbupi khenpi 15, thukhun 457 lak ah thukhun 210 puahkik ding  athupipenin gen a, anihna ah Kawlgam mimal suakta khangtosak dingin Democracy Standard & Value ah politics semte khempeuh lungsim picing ahihna ding leh athumna - Kawlgam makai kumpi dingin Kawlgam minam tualsuakmi khatpeuh in septheihna ding khaktanna omlo ding athupit bangin Kawlgam ahu akemzo Danbupi ineih ding kisam hi ci-in gen hi. Tu laitak mipi lam-etna lianpen in 2015 January 19 ni kipankik ding Kawlgam innpi Khawmpi ah Danbupi puahphatna neizo ding cih thubek Kawlgam mipi in ngak dimdem hi ci-in U Thein Sein in Kawlgam makai kumpi ding khaktanna leh dalna omlo-Kawlgam mi khatpeuh kumpi septheihna ding adeih thu gen hi. qDT, MRTV zogam thuthang (Zogam news)

India-Myanmar Gamgivai Innpi Ah Thusunna Om Ding:  India-Myanmar gamgisuang 7 pen India in akekna hangin khauktak vaihawmna dingin 2015 January Innpi khawmpi ah Myanmar Army in thusunna nei ding hi cih kiza hi. Hih gamgi tawh kisaiin Myanmar Army in India kumpi tung ah agen hangin thudinlo ahih manin Innpi ah gen dingin kivaihawm hi ci-in Myanmar Army ulian khat in gen hi.q7 Daynews

 

Kawlzang Ah Ni 2 Guahciin:  Alamdang takin Kawlzang ah ni 2-kumthak sung guahciin a, khuadam lua-bukkhuh vei mi tampi omin ateekte leh naupangte in thusaklah uhi. Natna gil neite in lel phadiak a, misi tam mahmah hi. Pinlong pawlpi in December 20-31 sung misi 3 nei a, adang pawlpite zong asi tampi om hi.qZT

 

Cikha ZBCM Upa khat Galkap Mawtaw In Phu:  Cikha ZBCM-CTBA President Upa Thawng Khen Mung (Sia Kap Khan Mang upipa) pen kum khen ni-in Kawlpi Muitawng Giha gei ah galkap mawtaw in phu a, anakguh 4 leh akhe kitanin Kawlpi galkap zato ah ki-at hi. Nakliamsim ahih manin avek kitawlngalo hi. qZT

Tonzang Gamsung Ah Benglei Eka 500 val Kiphiat:  Kumpi laihawmna ah Tonzang myone sung ah Benglei Eka 500 val  kiphiat a, 2013 sangin tawmzawlai hi ciin kisuah hi. Tonzang USDP Minam Palai Pu Neng Khen Pau in zong Tonzang gam Benglei phiatna ding thu Innpi ah pulak ngei a, Zomi Times in zong tamveipi kisuah hi. Kumpilam pawlkhat leh Zomi sumbawl hoihlo semte hangin Tonzang gam ah Benglei kilim zuat mahmah a, khangno tampi leh papilate Bengteep, bangmah a kizang thei nawnlo ding tampi omin asi zong tampi om ta hi.  Aciing masa pen khua hausate makaih hizaw hi cih agen om a, Mal|Suangzang khua ah Bengciinna hangin khangno asi 3, Bengteep tangval leh papila khempeuh - hih Beng ciinna hangin pawlpi upate nangawn in zangin zu pen niangtui dangin tuatin zukholh nangawnin pawlpi upa pipi Zusan kikholh zen uh hi cih kiza a, Bengciingte aa dingin zu pen niangtui zatin zang uh a, ahau om zolo-in zawn leh guktak thadah tawh kizom hi ciin Bengzang papi khat zi in akhasiat mahmahna thu gen ngeungeu hi. Pawlpi khat in biakinn lamna ding Benglei ah pawlpibup sum thalawh kuan uhi  cih kigen ngei a, Zomi leh Zogam hiken teh akicih hangin  na himawk hi ciin lamdangsakna thu Pastor khat in gen hi.  qZT

kawlgam thuthang (Myanmar news)

2015 Jan. 4 Suahtak Ni Kilimbawl Sawm:  2015 kum 67 cinna Suahtak ni thupi takin kumpi in bawlsawm hi. Galkap (Lei, Tui, Vanlang), Palik, Meiphelh, Lahwahkah, Custom, RedCross, Women, Nipidaw Council leh State/Region pan galkapte kigawn 7128 in kumpi zahtakpiakna lamzuihna thupitak nei ding hi.  qMAL

 

Daw Suh Kyi Interview: December 30 ni-in NLD zumpi, Yangon ahDaw Aung San Suh Kyi Interview om a, Education Digest, Pyitahkhi, Popular News, Mizzima, Sandawcheng, 7Day Daily, The Voice, MITV, Yomiyun, 5Plus, AP, AFP, Kumura, Nipon TV, The Farmer Mediate kihel hi. Letpadaung vai kidotna ah Report bangin semlo hi. Company khatpeuh in ameet adeih bangin agamnei aleineite zong et ding kisam hi ci-in dawng hi. 2015 kiteelna ah kuanglui ding vai kidong a, kiteel hun ding akiciat ciangin kithei ding hi ci-in dawng hi. Khasum khanvai kidong a, khasum khang dingpen kumpi nasep ngeina hi-in mipi dot kullo a, tua sangin Danbupi puah ding vai mipi dot huaizaw hi ci-in dawng hi. U Thein Sein sangin Shwe Man tawh kinaina nei hi kici hi cih thu ah U Thein Sein in hong sam ngeilo, hong sam leh amah tawh zong kinai ning ci-in dawng hi. Galkapte in company nei hi - koici muh na hiam akicih ciangin galkap pen gambup mipivak hi, Company neihkullo a, hunbit gamkem dingin kikoih hizaw hi ci-in dawng hi.  qDT 31Dec14

 

USDP In Lo Leitang Buaina Tavuan La Ni Ci-in U Shwe Man In Gen:  December 31 ni-in Yangon District 4 pan USDP lokho mite tawh kimuhna Mawbi Bawhlungtual ah om a, USDP Chairman U Shwe Mann in, "Kumpi, Innpi leh Vaihawmna ah USDP party member uliante in lokho mite buaina leitangvai tavuan la-in manlang takin sephuai hi ci-in gen a, USDP party galkaplui uliante in amau hunlai a alaksak, lokho mite buaina tu-in thei panpan uhi. Kawlgam ah lokho mi 70% akhantoh ciangin Kawlgam khangto hipan ding hi. Lokho mite leitang buaina ah USDP party ulian makaite kihel ta ni ci-in gen hi.  qDT1Jan15

 

Yangon Municipal Ulian Kiteelna Om:  Yangon City, District leh Township Municipal ulian kiteelna December 27 ni om a, December 29 ni-in kiteelna ah angahte kitangko hi.  City level Yangon : North - U Khin Mg Tin, East - U Htay Aung, West -U Khin Hlaing, South - Dr. Aye Win in ngah hi. District level ah Yangon North - U Min Han (public), U Zaw Myint (Tech), Daw Tin Tin Khine (Social), East - U Myint Thein, Dr. Soe Tun, Daw Thida Oo, West - Dr. Tin Tun, Daw Leh Leh Win, U Tin Sein leh South - U Zaw Win, Dr. Win Naing, U Khin Mg Win in ngah hi. Township level ah North Township 7 pan mi 21, East-Tsp. 7 pan mi 21, West - Tsp. 10 pan mi 30 leh South-Tsp. 9 pan mi 27, Tsp. kigawm 33 pan ulian mi 99 in ngah hi. Yangon khuasung ah inn 401634 om a, mimal 7 million val om hi. Yangon Municipal kiteelna ah Kawlgam President in City Mayor ama deih koih a, Yangon CM in Secy, Joint Sey, Member 2 ama deih koih theiin akiteel mi 4 tawh City level ah ulian 9 om ding hi. Yangon Municipal kiteelna ah party member lutsate hithei lo ding kici napi President leh CM deihteelte USDP party pan vive ahih manin alungkimlo om hi. qDT 30 Dee14

 

1982 Upadi Tawh Bengali Minamte Kawlgammi Suak  Ta:   Rakhine State Bengali minamte Kawlgam mi dingin U Khin Yi sawlna tawh kisang ta hi. Rakhine gam ah mimal million 3 lak ah Bengali (Rohinja) million 1 om hi ci-in 2014 June kha sungin state misimna pan kithei hi. Mipong Myone ah 2014 June kha pan Kawlgammi suahna kisanga, tu-in Mangpi U Khin Yi thupiakna tawh 2015 January 1 ni panin Rakhine gambup Bengali mite Kawlgammi suahna ngen thei ta uhi. UNO in zong hanthawn hi. qDT,VOA,BBC

 

Sangpilna Ah GDP 10% Piak Ding Kingen:  Kawlgambup Sangsia Kipawlna - International Relations tavuannei Dr. Sai Khine Myo Tun in Kawlgam Sangpilna khantohna dingin sangpilna budget pen Gambup GDP 10%  sang atawmzawlo piak ding kisam ci-in gen hi. 2014 budget ah sangpilna ah 4%  bek kizang hi. December 30-31 sung Yangon University Diamond Jubilee Hall ah Sangsap Piakloh Sangpilna vai kikupna om a, sangkah pelmawh ding icih leh Innkuan sumngahna ding pattah masak kul hi ci-in gen uhi. College siate mun kisuanna vai zong lungkimlohna pulak uhi. qDT

 

Kawlgam 2013 Academy Award Ngahte:  Best Film Actor Award - Pay Tay Oo (Nensiyin), Best film Nungak (Actness) Award - Wat Mong Shwe Yi (Nensiyin), Best support (male)-Min Oo (Ninsiyin), Best Support (female)-Khine Thint Kyi (Sungpiu), Director Award-Wai (Satan Yeh Kachide), Background music Award-Keyboard Tin Win Hlaing (Cesinmawkun) kipia hi. Khine Tint Kyi leh Min Oo in lemcing  asepzawh kum 20 ciangin Academy ngah pan hi. Director Wai in kum 11 ciangin ngah pan hi. q7Daynews

 

leitung thuthang (world news)

Palestine Gam UN Secirityb Council in Sanglo:  USA in nakpitak anialna hangin Palestine gam neihna tawh kisai December 30 ni-in UN Security Council ah vote lakna om a, member 8 -China, French leh Russia kihel Arab gamte in thukimpih a, Australia leh USA in nialin Uk kihel gam 5 in vote pialo uhi. 2015 kum sungin Israel in Palestine gam alakte pan paikhia in kha 12 sung in Palestine gam kician ciaptehna UN in aneih ding Palestine deih bangin akigeel t ahihna hangin USA in khauhtakin anial uhi. qRef. AFP

N.Korea Kumpi kim Jung An Thahna Film Minthang:  "The Interview" kici film thak khat, tu laitak minthang mahmah a, online ah azuakna sum US $ 15 million leh Cinema Hall Ticket zuakna US $ 28 million king ah hi ci-in Sony Company in tangko hi. Hih film pen N.Korea kumpi Kim Jung An- kiguk thahna ding upmawh thu kibawl film hiin leitungbup kizelin ki en a, Kim Jung An heh lua kisa-in N.Korea gamsung ah aki lahlohna ding khauhtak kham hi. Obama in hih film - USA ah lahtheih dingin phalna piakna hangin Kim Jung An in Obama pen Zawnkuh tawh kibang hi ci-in ko hi.  qYoyalay

 

Korea Gam 2 Kiho Ding Gen:  S. Korea in N.Korea tawh kiho ding tangko a, N.Korea in zong alunggulhna thu - Kim Jung An in kumthak thugenna ah pulak hi. Abeisa hunin kiho ding ut taleh USA - S.Korea galkhem bawlna hangin N.Korea in geelnasate phiat kiuhkeuh hi. Tuin N.Korea kumpi inzong lamlawpna thu gen hi. qDVB

 

Air Asia Vanlang Kia:  December 28 ni-in Air Asia pen Indonesia gam Surabaya khuapi pan Singapore lenglai, zingsang nai 7:24 hunin kizopna om nawnlo hi ci-in vanleng thuneite in gen hi. Vanleng tung ah mi 162 tuang hi. Air Asia vanleng pen Indonesia vanleng hi a, 2008 kumin kizangin vial 13600 leng khin hi. Indonesia Tembaw 12, Helicopter 3, Galkap vanleng 5 tawh zong uh a, vanleng kisia them mu-in misiluang zong mu ta uhi. December 30 niin Air Asia vanleng dang khat zong philipine Kalibo vanlengtual ah lampial a, asi aliam omlo, Mi 159 tuang a, Manila pan alengkhia ahi hi. qAya, MAL

 

Editorial ...............?

kumlui mangpha, kumthak thupha

            Zomi Times (Zo Times) pen 2007 May kalnunung kipan a, tun kum 7 acinna hita-in kum 8 sung ilut ta hi. Kum 7 sung hong tonpih ibiak Pasian in minthanna leh Pahtawinate tang ta hen. Zomi leh Christian kikhen theilo a, ipupi Pu Zo hun a kipan atu ata Zomite in Pasian om hi ciin Ahing Pasian athei anei mi nam ihi hi. Leitungbup Nisimna Jan - Dec Khasimna izongsatna hangin Zomite Nisimna leh khasimnate sangin leitungbup kumsimna kizang hi. 2007 kumin Lom 1na Hawm 32 bek kisuah a, 2008 kum panin lom 2 - 8 ciang dong nipikal 52 acingin kihawm hi. Tuin 2015 lom 9, kipan ding hita hi.

            2014 kumin Kawlpi khuasung pawlpi 30val ah St. Peter & Paul RC - copy 56, Agape AG - 47, Leipui SBC - 44 tawh atamlapen hi uh a, Lungdamna kiciamteh hi.  Kawlpi khuasung sumpia 466, apialo 100 omlai hi. Kawl gam sung Zomite tamna mun khua 30 val ah kikhak a, copy 657 lak ah sumpia 561, apialo 96 om hi. Ala asim adeih leh muante hong kipia ahih manin apia nailote in hong kipia leh leiba 400000 val, Zolun leiba kiloh khinzo ding hi. Kawlpi khuasung Sum piakhin pawlpi 16 - KBC 3, St.Mary 20, BereanEBC 20, LeipuiSBC 44, Zo Bapt. 5, SDA (Pinlong) 15, MyothitBC 2, Myothit SDA 14, Phualp9 UPC 6, Phualpi AG 32, BethsaidaAG 26, Chingate (Tahan)16, TABC 19, MercyBC 30, Dowinchaung 18 sung ah ala asim sumpiate leh Agentte tung ah lungdamna lian mahmah hi.

            Sum piakhin nailo pawlpi 15 - Rheman AG 2, Leipi BC 9, Agape AG 3, PLBC 20, Emanauel Bc 5, Galilee AG 1, St.Peter + Paul Rc 21, FGA 2, ZBC Tahan 12, Munlai RC 5, Munlai Bc 4, Munlai UPC 3, Munlai AG 7, Munlai ZBCM 1, Mimal ala 5 kigawm 100 omlai a, January kha sungin hong pia kum dingin hong lam in ung. Kawlgamsung Zomite omna khua 30 val Agent 14 - Pidawta 53, Tamu 35, Lawibual 90, Sozang 16, Kapteel 60, Tuithang 73, Lunmual  23, Haiciin 24 in piasiang ta a, apiakim nailo  96 omlai hi. Ala asim sumpiate leh agentte tungah lungdamna lian mahmah a, apia nailote in January  kha sungin Agentte tung ah piakim ciat dingin hong kilam en hi.

            2015 January kalmasa panin A3 size (Zo Aw laidalcia) tawh copy 1200 bek kihawm dinga, Photo(lim) tawh kithuahin Zolun offset tawh kibawl ding hi. Abeisa a kibawlte Riso Rerox hi a, isim ciangin imitna a, offset tawh kikhen leh mit thadam mahmah hi.  Kumkhat lakman Kawlpi 2500, gamsung 3000 hiphot dinga, akicin kei leh hong kizasak kik ding  hi.Kum beisate sangin ahoihzaw dingin hong kibawl a, asemte zong hong kizenzaw semsem ding hi.   Alasate kipuaksuak ding hi, ala lai ding leh ala nawnlo dingte in agentte kiang ah na gen unla 2015 tatna sum pen February 30 ma apiasate bek kipia ta ding hi.  Tatna sum pialote hangin leiba tam lua ahih manin apia kimciat dingin muanna lianpi tawh kong thum uhi. Akigelhkhialte hong zasak kik un.Endikpawl

 

 

 

 

        

 


Comments

11/25/2016 04:48

This is very well and it its giving the news about china. This post is best for reading it has complete details about the government.This one is best source for read any news. Thanks for sharing the best topic.

Reply



Leave a Reply