WWW.TUNGZANGNEWS.COM

 
 

ZIUSA pan Zomi Nam Ni Lungdamna Thupuak

Zomi Nam Ni Lungdamna Thupuak

Zomi Laizom U leh Nau, Nu leh Pa, Pi leh Pum Lawm leh Gualte aw,

Zomi Innkuan USA kipawlna Executive Committee pawlin “Zomi” ih Minam Min tawh “Dam maw!” ci in Zomi Nam Ni Thupha hong puak ungh.

Hibang nilian ni, ni thupi ni a hong tun’ hun sungin, muntuam gamtuam a om Zomi khempeuh cidam lungnuam takin zing vai nitak vai ahawm zo dingin ka hong lam-en uh a, lungdam kipak takin Zomi Nam Ni a dawn zo dingin Anungta Pasian tung ah thu ka ngen uhhi. Zomi Nam Ni muakna, pahtawina hun thupite azang dingin ka hong zawn uhhi.

Tu kum, 2015 kum ciangin, Zomi Nam Ni thu ahong piankhiat zawh kum (67) cingta hi. Kumsim kumsim in, Zomi-te in minam khat, si khat sa khat hihna tawh, Zomi ih minam min khat pomkhawm in ih kalsuan hi. A beisa kum khat sung bekbek in, Minam khat ih hihna ih kipsak theihna ding, Minam Min khat tawh kilo a, leitung minam tuamtuamte lak-ah Minam picing khatin ahong kitheihna dingin Kawl gam sung ah Gambup Kisimna kibawl a, Zomi-te kipumkhat in Minam khat ih hihna ih kipsak zo hi. Tua Minam khat ih hihna ih kipsakna ahi, ih Minam Min in “Zomi” hi ci-a ih pulakna, ih kilawhna hangin Minam Maban lianpi khat a kikalsuan zo, maban mualpi khat a kikhum zo, mualsuang khat a kiphut zo hita ahih manin, tu tung a ih dawn Zomi Nam Ni pen namtui phadiak, limci phadiak, kilawm phadiak hi.

Tu kum Zomi Nam Ni pen Zogam sung a om Zomi-te bek hilo, tuipi galkaai Zomi-te a’dingin Minam khat hihna tawh Minam Maban ah ih pankhopna lawhcin’na akingah kum ahih manin, kipak huai, angtan huai, lungkim huai mahmah hi. Lungdam pawikhamna bawl ni ahi hi. Hiciang ahong kha, hih dinmun ah hong lamto Anungta Pasian’ Min, Zomi Nam Ni in ih phatkhawm ding hi. Lungdamna ih kokhawm ding hi.

Tuaban ah, tu kum Zomi Nam Ni in, US gam sung a om Zomi taangpi taangtate’ khua leh tui kipawlna ahi, Zomi Innkuan USA kipawlna dinmun hong thaksuaksak a, ih maban lawhcinnate hong kipsak hi. Leitung gam khempeuh kipawlna, United Nations Organization sung ah minam dangte tawh liangko kikim in vai din’khop theihnate hong ciaptehsak hi. Mualsuang hong phuhsak hi. Zomi-te khua leh tui kipawlna hihna tawh UN Economic and Social Council nuai ah Special Consultative Status ih ngahna hong cingtaaksak hi.

Tua hi a, tu kum Zomi Nam Ni pen Zomi khempeuh in Minampi khat hihna tawh thathak san’in in, Minam Maban lianpite ah vai ahawmkhawm, ma apangkhawm, kal asuankhawm dingin thuciamna bawl ni in ih zang ding hi. Minam khat hihna tawh khat leh khat ki-itna, kikhualna, kithusimna, kizahtakna mualsuang ih phuh ni in ih zang ding hi.

Minam khat, si khat sa khat hi napi, abeisa hun a ki-ukna nuai a khat leh khat kigalbawl khakna, mun leh mual pau leh ham zui a kituambawl khakna, beh leh phung suan leh khak zui a kituhbawl khakma, thuneihna za leh ngal deihna tawh khat leh khat kidembawl khaknate hangin a kikhahsuak dektak Minam khat hihna pen tu tung Zomi Nam Ni in ih phuahpha ding a, kipumkhat ni, kilemna ni, kipawlkhop ni, kigup ni in ih ciamteh ding hi.

Dinmun tuamtuam siksan in kikhenna a om hangin sisan in hong gawmtuah zokhin a, ih sisan in Minam khat ih hihna ahong kipsak khitciang, taangpi taangta mipi atamzaw thukimna tawh Minam Min khat ih kipsak zo hi. Kawl gambup kisimna, Vai gam kivaipuakna sung ah, leitung gam khempeuh kipawlna ah ih Minam min ih thangsak khinta hi. Minam dangte in Minam khatin hong ciamteh khinta uh a, Minam picing khatin hong thusim, hong zahtakta uhhi.

Tua ahih manin, tu kum Zomi Nam Ni pen kumdang tawh kibanglo a, Zomi kici Minam picing khat in minam gualzawhna tawh lungdamna pawi ih kham ni ahi hi. Anungta Pasian tung ah abawlsa leitung minam tuamtuamte lak-a Minam picing khat hihna tawh lungdam kohna ih puak ni ahi hi.

Zomi Nam Ni Lungdamna Thupha hong tungkimciat tahen!

Executive Committee

Zomi Innkuan USA, Inc.

Tulsa, Oklahoma, USA.

February 19, 2015

 


Comments

07/28/2017 00:33

I really like this article because it has lots of information which I have never been through in my life. I have read lots of articles and essay writing but this is so fabulous for me for all aspects of knowledge. I often go through such knowledge in my life and want to new things about the world and other people.

Reply



Leave a Reply