WWW.TUNGZANGNEWS.COM

 
Picture
Tulaai Leitung Thuthang Tuamtuam Updates March 4, 2015

·      Leitung ah kumtam adam peen Japan gammi Pi/Nu Misao Okawa  in kum 117 acinna suahpawi March 5 (Asia nisimna natawh) 2015 ni in atenna Osaka khuapi ah a innkuanpih te tawh nuamtak zangkhawm uhhi.Amah peen 1898 kum March 5 ni in Osaka khuapi pan piang a tu in ahihleh guai lua mahmahta ahihman in Osaka khuapi Uhaam kikepna mun ah om hi. BBC

·      Kum 70 asawtkhin Leitung Gaalpi nihna laai  a US leh Australia ten Bomb khiat in tuipi sung ah atumcip Musashi kici Japan te Gaal Tembawpi kimukhia ta hi ci in US Mihau Paul Ellen March 4, 2015 ni in taangkokhia hi. Paul in agenna ah ka tangvaal laai in Gaalpi nihna thu kasimkha a lungluut lua mahmah kahihman in tuma kum 8 pan kipan kazonsak tun amupan hing ci hi. Tembawpi peen Philippine gam Sibuyan tuipi sung Pi 3,280 na pan kimukhia ci hi.BBC

·      Sen gam pan Cuba gam puakding gaalvan lomtang apua Tembawpi khat March 4, 2015 ni in Colombia thuneite in tuipi tungpan man uha, avanteng amat ban uh-ah Captain ahi Wu Hong peen gaalvan puasim cihtawh mawhmat uhhi. Chinese Foreign Minister zumte thusungnu Pi/Nu Hua Chungying inbel hih Tembaw in leitungbup thukhun palsat peuhmah lo hi ci in gen hi.BBC

·      Sen gam te in 2015 sung ading Gaalkaap, Gaalvan tawh kisai sumzatna 10% ah kikhanto ding a,  2015 aiding in $145billion kiseh khinta hi ci in March 4, 2015 ni in taangkokhia uhhi. Japan ten $40billion pan $48billion ah khanto in mau geel kingim pian pian kilawm sa ingh. VOA

·      US gam Department of Homeland Security-DHS te sumzatding Nungkaal Friday ni Feb 27 nizan in beisiang ahihman in khakcip ding maw kicihding cih March 3 ni in Congress ah nasiatak khensatna bawl uha, sum kisamteng piakhia a honsuakding in Mee tang 257 thukim, 167 thukimlo tawh honsuakding in khentat uhhi. Azenzen in khakcip ding khawng ongthukim uh hileh Zomi gaaltaai te ading thupoi pawlkhat omding himawk ahihman in Topa hoihhi cihding kisam hi.VOA

·      US Kumpipa zi The First Lady Michelle Obama Asia gam sung ah Numei te pilna lam ah thahaat theihnading ngimna tawh khualzinding a, March 18-20 Japan gam Tokyo khuapi ah taam in, March 21-22 Cambodia gam Siem Reap  khuapi  ah taamding ci in White House ten March 3 ni in taangkokhia uhhi. VOA

·      Israel Prime Minister Benjamin Netanyahu in US Congress te maai ah thusun na limci mahmah khat March 3,2015 ni in neithei a, Iran gam te Nuclear vaai genpi in nei hi. Hih Iran Nuclear vaai peen US Secretary of State John Kerry leh Iran thunei te akiho laaitak uh zong ahihi. PM Netanyahu peen  Obama kumpi sapna hilo ahihman in Obama leh Democratic party pan Ulian pawlkhat nuak beeibaai uh in PM pa thugen ngainuamlo uhhi. Iran ten a nuclear uh peen thuhoih ah kazangding uh acih hang Israel leh Leitung apuakkham saknuam uh ahihman kiho cihniangnuang ciangpeen lauhuai mahmahzaw ci in PM Netanyahu in Congress te maai ah gengiap hi. Tuaban ah tu a Obama kumpi leh Iran thunei te kihona peen Iran gam in Nuclear aneihnading ageel uh hizaw cigiap hi. Ama deih dan peen khawlding maw khawllo ding akhawl kei leh kaappah ding cih hituak hi. Ahizong in John Kerry leh Iran makaai ten athukikupna uh ani thum na zomto veve uhhi. Iran ten a Nuclear bawl uh khiamding US ten agawtna uh khiamding cihciang kikangkang uh ahihi. VOA

·      Ukraine gam nisuakna lam Tapong te ukcipna sung ahi Donetsk khuapi kiang a om Zasyadko sung meihol khuk March 4, 2015 ni in kua khutma cih kitello khat in puakkham a nasem 33 si in 30 dum in vuknelh a adang pawlkhat liam uhhi. Nasem vek pi 200 pha uh a, Tapong te khutsung ahihman in kumpi lam mihonte paisak lo sawnsawn uhhi.BBC

·      Kawlgam sangnau pang gaaldo pawl Letpantan  khua sungpan March 3 ni in Palik ten khaktan in paisak nawnlo uh ahihman in kingim citcit uha, Lutol pawlkhat I huhna tawh March 3 ni tuilo siah neekthei kheempeuh tang uhhi. March 4, 2015 ni zingsang zong ki ngim citcit leuleu uh ahihman buaituak laai mahmah uhhi.VOA Burmese

Lungdam mahmah

Thang Khawm Pauzomi

http://zomipausektak.blogspot.com/2015/03/tulaai-leitung-thuthang-tuamtuam_4.html

 


Comments

I think she is one of the oldest lady and we can see she is not healthy because of that age. But we know a very few people in this world lived their for more than 125 years especially in this age when mostly people die at 60 at mostly places.

Reply



Leave a Reply