WWW.TUNGZANGNEWS.COM

 

Zomi Innkuan USA
Executive Committee
 
KHUADO THUPHAPUAK
 
Laizom U leh Nau, Nu leh Pa, Lawm leh Gualte aw;
 
Zomi ih minam min leh Zomi Innkuan USA kipawlna min tawh “Zomi Khuado Thupa” ci-in Executive Committee pawlin hong muak ungh.
 
Zomi-te Khuado hun sungin US gam sung hi taleh, leitung muntuam gamtuam a om Zomi khempeuh in Khuado Thupha tawh kidim in cidam lungnuam takin zingvai nitak vaite ahawm zo dingin hong lam-en ung.
 
Zomi Innkuan USA kipawlna in October kha kaal nihna Saturday ni pen United States gam sung a om Zomi taangpi taangta buppi “Khuado Ni” dingin 2015 Kumcin Khawmpi hun sung ah Khawmpi akah mipi kipsak hi. Tu kum, 2015 kum in October kha ni 10 ni pen Khuado Ni ahi hi.
 
Tu Khuado hun, tu ni tu hun laitak in US gam mun tuamtuam a om Zomi-te in khua leh tui buppi tawh lungdam maitai kipak takin kikhawl a Khua a Do dingin kithawi ngeingai ding hihang cih ih thei hi. Tuabek hilo, anungta Pasian hong piaksa thuphate simin lungdamkoh biakpiakna alui dingin kigingsa in om ding ihhih manin nakpi takin lawp huai hi. Mun khatkhat ah a mun a  mual, kiim leh paam thu hangin Khua Dokhin ding uh a, mun khatkhat ah Do thei nailo ding uhhi. Ahih hangin Khuado hun sung ah, koi gam, koi mun ih tungzong, minam khat, si khat, sa khat, sanggam unau laizom khat, khua khat tui khat hihna tawh kikhawlkhawm a Khua a Dokhawm thei minam ihhih manin lungkim huai mahmah hi.
 
Leitung thu ah ngeina kician anei minamte minam picing in kiciamteh hi. Zomi-te in minam picing khat hihna tawh Khuado pawi a kikham ahi hi. Biakna thu ahzong upna tawh akituak ngeina kizuiciat a, biakna ngeina kician aneite pen thu-um nungzui kician in kiciamteh hi.
 
Zomi-te in Khuado hun sungin abeisa hun sung a thusia lasia khempeuh kihemkhia a, kumthak dawnin thupha kisam hi. A beisa kum sung a khawhsa lawhsah thuphate kisim in lungdampawi kikham hi. Hibang ngeina hoih anei Zomi-te in anungta Pasian hong thei in, ama biakna ngeinakipte bangin ahong kalsuan ciangin a picing thu-um nungzuite hong suakta hi. Anungta Pasian in ahong piaksa thuphate simin, ama tung ah lungdamkoh biakpiakna kilui theita hi.
 
Tua ahih manin Khuado pen leitung vantung thu ah anungta Pasian teltuam minam khat hihna tawh lungdam kipak takin dawn tawntung ding, muak tawntung ding, kham tawntung ding ngeinakip khat ahi hi.
 
Hizah takin amanpha Khuado hun sung ah minam sung ki-it kikhualna thute suut a, ki-itna ankuang umkhawm in lungdamkoh biakpiakna ih lui khitciang, ahong tung ding kumthak hun sung ah minam picing khat hihna tawh ih neihsa gam leh leitangte, a bukim minam thuneihnate ih ngahkikna ding leh ih kepbit zawhna ding, anungta Pasian maipha mu in thupha ngah minam picing semsem ih suahna dingin hunpha zangsiam ni ci in Executive Committee pawlin ka hong hanthawn uhhi.
 
Khuado pawikham a om laizom Zomi khempeuh anungta Pasian in vantung thupha, leitung thupha, Khuado thupha akicing in hong guan tahen ci in Executive Committee pawlin kithutuak takin thu ka ngen uhhi.
 
Executive Committee
Zomi Innkuan USA
 
 
Tang’in;
 
GSKhup
General Secretary
 
Tulsa, OK, USA
October 9, 2015
 


Comments

03/15/2017 00:29

In this article, you try to give the information about the executive order of the Donald trump. This order is extremely in the base of the racist. I did not believe that how he can do such type of the non-sense? I am against this executive order.

Reply



Leave a Reply