WWW.TUNGZANGNEWS.COM

 
Zomi Cup Diary (31/01/2014) Malaysia ah zingsang ak khuang zaak ding om takei leh hunlap lo leh aziakai cih bangte om ngei lo a, Zomi khempeuh a hunhun in kitho a na kisem ciatciat hi. Tua mah bangin ZOMI CUP kisuihna ding mun Klang tualpi (Cingkhup leh Ngambawm Tualpi) ah ZAM palai teng leh Volunteers te zong zingsang nai 6:30AM hong sat lian ciangin Zozumpi panin Car(Motaw neu) thum dim in zingsang nai 8:30AM alap dingin a kisam van teng tawh ka tai phei pah uh hi. Amun ka tun uciangin a paikhawm tektek Car Engine kibat loh man hiding hiam kei leh ka tuanpih teng aphual ka tung masapen uh a, ahizongin ko nunga hong tung Sya Hau Khai te zong a ziakai cihna hituan peuhmah lo hi. A phualah bawlung sui ding Zomi tangval tampi leh tha aguan ding nungak honkhat ko sangin na tung masa zawlai uh hi. Lungdam huai ka sa mahmah hi.

Tawmvei sung van teng lemtuah in ka buai khit uciangin Refree dingte zong hun ciangtan lianin hong tung uh a, nuam takin kimawl hunte ka kipan thei pah uh hi. Haksatna leh nawngkaina cihbangte om het lo a, Pasian hehpihna tawh guahzu meeikai cihte zong om het lo takpi hi. Ni bilbel ciangin satpi mah in hong sa hi. Ko nisa sesa nuaia ngawng-awh hawm teng bekin nisa alel ding ka kisak uleh tualpi nawla inn kilamte’ sunga tuivot sitset dawndawnte naleng inzong nisa in a kap khak lian loh hangin Kawllukhu mah na kaak veve uh hi. Bawlung suite siam man hiding hiam tuazah takin khualum in nisa mahmah taleh, puansilh sun teng khua-ul in kawtkim sakzo phial mah taleh mipi mit khempeuh in tualpi sunga bawlungsiam kipei thiangthiangte lam bek mah en uh a, aphun aciak kuamah om ngiat lo hi. Tua zah taka mite lunglutzia ka muh ciangin ka ngaihsutna khat hong vaakthap pak dihdih laizang a, hibangin ka ngaihsun hi “...hih tualpi sunga bawlung suih en teng khempeuh pen zingsang nai 2 :00AM huna Champion League kisuite en ding kicileh a ut vet lo tam mahmah ding uh hi. Ahizongin Zomi Cup sese ciangin hizah taka nisa nuaiah phun lo ciak lo a Zomite bawlung suih a et zawh uh pen Zomi a it man uleh a vei takpi man uh hi hamtang ding hi”. Tua ka ngaihsutna pen a kigenkhia lo mipite’ lungsim sungtawng a om thute hitakpi ahihman in ka lung hong nuamsak mahmah hi.

Hun man kuan nitaak nai 5:00PM pawl ciangin tualpi sunga bawlung suite sanga asiamzaw deuh tengin tualpi nawlah bawlung thum bang ka lek zialzial uh hi. Ko zong ZOMI CUP honpawi cianga Singapore Zomi Innkuante tawh a kidem dingte ka hi uh hi. Kamphatna tawh ci zaw ding hiam kheguh hek lianga tualpi nawlah bawlung tawh ka kipei zialzial keei sam uh hangin ko bawlungsuih hong en man kuamah om lo bilbel uh hi. Kei ka khawl khit ciangin Sya Hau Khai, Sya Joseph Mangsen leh Sya Mangpu in lungkia lo takin suisui lai teitei uh hi.

Francis Lamthang

 


Comments




Leave a Reply