WWW.TUNGZANGNEWS.COM

 
Picture
ZOMI CUP 2014

Zomi te omna ahih nakleh, amaute-in kua hi aa, koipan hong pai, bang thute vaihawm khawmzo ci-in hong ki-en leh, Zomi khangno/khanglai 1000 kimbang tukpeng kimawlna tawh kilawmtatna ni (9) sung buppi zangkhawmzo uhhi, cihpen tangthu khat ih gelhzo leuleu hi. A (5) Veina Zomi Nam Ni Pahtawina-in aki bawl Zomi Cup tukpeng kidemna pen January 31 pan February 11, ni 9 sung buppi ki vaihawm khawm thei aa, mipi 800 pan 1000 kikal ki kaikhawm aa pawi nuam khat bawlkhawm cih hiziau lo-in thatang khempeuh san aa khat leh khat kidem ciatciatna leh khuahun hoihloh patauh sim kawmkal pan, Zomi Cup 2014 etlawm takin ih zothei hi. A kimawlte leh a thapia khempeuh lungsim picing thei mahmah hi.

Tangthu gelhkhawm Ei Zomi sung aa kampau kitel sitset Khua (43) kidemna pen, Match (101) pha-in, Zomi Tangthu sungah (theihkhialh kei leh) tukpeng kidemna Team tam kihel pen hiding hi.

Banghang Zomi Cup vaihawm

A vaihawm kha ding aa om ka hihna tawh kei mimal muhna leh san'dan ong gen le'ng; Bangin hih Zomi Cup vaihawm ding hong tawsawn hiam, hong tha khauhsak hiam cih hipi pen ding hi.

Ko Zomi hi ungh, ahi zongin, mi hong theihna/ciaptehna tua hi ngei mah, ko a taktakin ka pu pa hun pan un Zomi kici, cihtheihna dingah, Zomi koizah, Zomi koiteng, Zomi te'n bang vai lianpi semzo cih ih lahtheih kul hi. Mihon vaihawm khopna lamah, namdangte leh mi hong thusim/zahtak zawh ciang ih tun' pian lohin, mi hong ciapteh nop leh mi hong ciapteh zawhzah ding haksa toto ding hi. Bawlung ci aa ih theihzawk tukpeng kimawlna pen, vai dang khempeuh sangin a thupi penpen hilo takpi kha ding hi. Ahi zongin, football team ahih kei leh football tournament neilo gam bel om khollo hi.

Tukpeng cih ngiat pen, pawi dang khatpeuh tawh kibang theilo hi. Banghang hiam cih leh, Zomi Cup en le’ng, a kimawl lian 11 tuak hi-in, a kimawl ding mah aa ngak apua-ah 9 tuak bang om hipah aa, kihel khakna mi tam in ngahthei pen pawi nam khat hi hamtang hi. Cihnopna-ah khat leh nih kia a kihel hitheilo ahih manin, mi tampi ahih kei leh khangno tamthei pen ii mun ngahna hi gige hi. Tuahang mahin zong, thalawp khopna om phadeuh in, ki pawlkhop kisinna hoih mahmah khat ahi hi.

Hidan teng hang bek tawh Zomi Cup ki vaihawm hi nailo lai hi. Minam Ni mahmah pahtawina-in ih vaihawm hi masa zaw hi. Minam Ni anei minam khat ihihna ki langsak hi.

Tuaciang bek hilo-in, zum tuamtuam leh namdangte muhna-ah ih lahkhiat zawh thu-in, haksatna tampi om himah ta leh, Zomi te-in vai lianpi vaihawm khawmzo hi ungh, cih pen ih lahzawh a thupi mahmah hi. Namdangte hong theihna leh hong etneu ngamlohna dingin zong a kisam vai lianpi khat ahi hi.

Haksa taleh ei leh ei kidingzo

Zomi sungah mihonpi ih vaihawmkhop ding khatpeuh a om simin, hong buaisak pen khat ahi sum leh paai kicin’lohna hiden pian hi. Ih kisuahtak sak hang a suakta hetlo leh ih hihna bangbang ih ngahtheih tawntung lohna dinmun tawh mi’ gam ah ih om hangin, Zomi te-in ei leh ei hanciam in ih dingzota hi. Ih mun ding tek ah dingthei aa, ih sepding tek ih zawhnak leh ei leh ei kidingzo lua na hi gige hi. Khua (43) kihelna-ah, lutmanh a kikim in ih khiattek khempeuh gawmkhawm aa tuateng lian a kizeek hi-in, apualam pan huhna ngetna ahi zong, sumtang tawh ma hong pan’ sawm zong ki omlo pah lel hi. Zomi Cup 2014 akihel Khua (43) teng ii sumkhiat teng a kizang ahi hi. Match/game kimawl zah buppi (101) pha-in, tua khempeuh hih gammi referee te kawmna-ah ih sumzat beipen hi. Tua zomah, kimawlna tualpi sap ah beipen hi. A Khatna, a Nihna leh a Thumnate pahtawina cih bangin sumzatna bulpite kimu thei hi. Ih dinmun omzia khat paulap lo-in hanciam ni cih kampau leh utna lungsim, hoihsakna ciangbek hilo aa, a hanciam takpi Zomi te ihihi.

Hunlap sensen Zomi te

Match (101) sinsen kimawlna-ah, tua match ah tua Khua te ziakai-in hun beisak tuam cih peuhmah a omloh pen lamdang mahmahin, Khua makaite leh a kimawl khempeuh ii ki thuhual dan pahtawi huai ngiat hi. Hih hunmaanna cihte kepcing zawh sawm ni.

Red card leh Yellow card

Zomi Cup 2014 buppi license tawi Referee leh Assistant Referee vive sumtang tawh kikawm hi-in, Red card ngah 3 leh Yellow Card ngah (96) om hi.

Zomi hihna ZAM Card tawite bek kimawl sak

Team khat ah kimawl ding mi 23 ciang kisang hi a, tua kimawl ding khempeuh in tukum pen a lamdang phadiak in Zomi hihna ZAM card tawi sitset tek bek kimawlna Zomi Cup ahi hi.



Lungdamkohna

  • USA pan Cup golpi hong pia Pa Langh Kap Pau leh Pa Thang Do Hang (Tungzang Khua) te unau tungah Zomi aveina uh lungdam angtan’pihna beithei lo hi.
  • Zomi Cup 2014 hong uap Zomi Innkuan (Singapore) te tung leh honpawi a thungenna hong neih sak Dr. Hau Za Cin (ZIS President) tungah lungdam mahmah hi.
  • Zomi Cup 2014 zawh theihna dingin, ma hong panpih khua (43) makai, kimawlna makai khempeuh tungah lungdam mahmah hi. Sum le pai, thatang vaihawm haksak nate puazo, thuakzo bekthamlo in, thu leh la a ki vaihawm bangbang zuih zawhna nei na hih manun mai lamah zong hih dan lungsim hoihte kep tawntung ding thupi mahmah hi.
  • Na hanciamna uh, na supna baina uh, na sepkhop theihna nate, na thuakzawhna uh, lungdam zia nazat siamna uh leh na angtanpih siamna te hangun a kibawl mimal khempeuh tungah lungdam mahmah hi.
  • Ka khuapih tuipih vaihawmna ci-in Malaysia sung pan hita leh gam tuamtuam pan hita lehsumtang mahmah tawh tha apia sanggam khempeuh tungah zong lungdam mahmah hi.
  • Zomi Cup 2014 a kipat a tawp dong zingsang khua vakma pan sun nisa sung khuamui dong hamciam tak a hong seppih ZAM palai khempeuh tung leh Advisor Pa Dai Za Kam (Pangsak) tungah lungdam mahmah hi.
  • Match report vai khempeuh ah ma hong pang ZEC sang pan sia Gin Khan Tuang (Taaklam) leh Sia Ci Pau (Cikha), REC pan Mungpi (Tuimui) tungah zong lungdam mahmah hi.
  • Zomi Cup 2014 sung ihmut cim manlo in nisa nuai ah sawl bangbang mangin taisuk, taito ZEC sang naupang 3 te tungah zong lungdam mahmah hi.
  • Zomi Cup sung buppi motor manngetloh a hong zangsak leh hong hawlsak pah Sia Mangpu (Sezang) tungah lungdam mahmah hi.
  • Zomi Cup 2014 sung tawntung sun nisa nuai ah video record hong neih sak bek thamlo in zanteh tua teng mah hong edit sak pah a leitung bup Zomi te et theih ding a hong khak khiat sak Zomidaily Media tungah zong lungdam mahmah hi.
  • Kilawmtatna kimawl ahih mah bangin hih hunsung ki lungkim lohna, ki pau khialna a om leh khua khat le khua khat lungsim sungah kikoihlo in Zomi Cup 2014 man tawh man khawm sakin beisak ni.
  • Zomi Nam Ni pahtawina ih bawl ahih mah bangin Zomi Nam Ni ciangin pahtawina mipi maiah kipia lai ding ahih manin khua (43) kihel kimawl khempeuh nong kihel nangun kong zawn lai uh hi.
Pahtawhna ngahteng

Goal tam khum pen (Top Scorer) : Langh Za Sing (Phaiza, No. 20) goal 10
Kungpang siam pen (Best Goalkeeper) : Kap Sawm Cin (Anlangh, No. 1)
Nungdal siam pen (Best Defender) : Lian Suan (Ngua Sing, No. 32)
A lai siam pen (Best Midfielder) : Dim Pian Tuang (Anlangh, No. 8)
Maikah siam pen (Best Striker) : Langh Sian Thang (Ngua Sing, No. 10)
Player of Zomi Cup 2014 : Mung Kap Thang (Anlangh, No. 10)

A Li na : VANGTEH
Medal 1 tuak leh sumtang RM 500
A THUM na : PHIAZA
Medal 1 tuak leh sumtang RM 1000
A NIH na : NGUA SING
Medal 1 tuak leh sumtang RM 2000
A KHAT na : ANLANGH
Medal 1 tuak leh sumtang RM 3000

Theihsakna

Zomi Cup 2014 honpawi ni a group photos (maante) a deih na om uh leh ZomiDaily Facebook ah kien thei hi. Tu kum pen kum dang banglo in sum leh pai zong tam hong beizaw ahih manin ZAM zumpi panin a cinglo teng hong siksak uh hi. Sum sazian a thei nuam na om uh leh ZAM zumah ki dong thei hi.

Seppihte tawh,
Hau Suan Khai, Kam Mung leh Mangpu


 


Comments




Leave a Reply