WWW.TUNGZANGNEWS.COM

 
Zomi Cup Diary (03 February 2014)
Nisa inlah kei tuni in liap zawdeuh ning ci peuhmah lo ding cih pen theihsa hipah mah taleh lungkia lo in thawh phet mahin Zozum pan ka kithawi kheh khengkhang leuleu uh hi. Hunte geelsa om bangin kipan to pah ngekngek a, Pasian hehpihna tawh zingsang lam pen nisa lua sam lo ahihmanin bawlung sui dinga kiseh khuate pen lungdam thei mahmah uh hi. A hampha diak khuate lakah Zampi leh Thangnuai khua zong kihel thei bilbel uh a, nai khat sung nuaipi mah a hong kinuai khit tak uciangin goal khat tawh Zampi khua in ka zo liailiai sam uh hi. Goal khat bek himah taleh Point 3 angah kisuak pah ahihman in maitai takin tualpi nawl lamah Pasian tungah lungdamkohna kinei pah uh hi.

Tu ciangicang Pasian hehpihna tawh Goal tam thun pen Phaiza khua hi. Nihvei a suih khitna lakah Goal 7 tuak khum ek-ek mawk uh hi. Asui te siam man zong hi, amau leh amau tha kipiakdan a siam man zong hi sa ingh. Phaiza khua Team in a suih ding nak leh khua mipi a zah 4 bang a awng dingin anawlah ding pah dimdem mawk uh hi. Tha ngah huai sa mahmah ingh. Anlangh tezong nasia mahmah uh hi. Zawh a nei nailo khua pawlkhat om mah taleh lungkiat ding a sawm khat zong om nai lo uh hi. Tua mahmah zong thupi sa ingh. Napoleon Bonaparte in “The word Impossible is not found in my dictionary” acih mah bangin, ei Zomite lungsim ngaihsutna sungah zong “Lungkia” cih kammal pen om sak kei ni. Lelh hun om ding zawh hun om ding, tut hun om ding din hun om ding, tuuk hun om ding ahihang thoto kik teitei ding hihang.

Bawlungsui ding Team khempeuh in a kipatma ciat un kikawi in thungetna nei masa hamtang uh hi. Tua in Zomite Pasian amuang minam ih hihna kilangsak ka sa mahmah hi. Ih omna peuhah hong bawl Pasian a phawkdente ih hihmah bangin Pasian hong piak ih minam min ZOMI zong a lenkip suak minam suak zo lehang thupi mahmah ding hi cihpen ka ommuan a ka ngaihsut khinkhian thu khat ahihi.

Francis Lamthang (Zomi Quavadis)

 


Comments




Leave a Reply