WWW.TUNGZANGNEWS.COM

TUNGZANG NEWS
 
Hun A Mawk Bei Ciang Pammaih

Zomi te zong leitung hun tawh kituak in na kalsuan den ahih manin vai khat peuh ah mi khat thu tawh na kalsuan ziauziaulo in a kikum ding teng kikum in a hoih pen dinga khentatna tawh kizui in na kisem hi. Innkuan limlim pan zong tua pen Zomi khempeuh ngeina hi a, pa pen in a makaihna nuai ah vai kihawm hi. Pa pen in vaihawm in pa a om nawn kei leh nu in vaihawm in nu leh pa a om nawn kei leh unau sunga upa pen in vaihawm cih bangin a dawl a dawl in na om suk diudeu hi. Tua mah bangin khuasungah, minam sungah, gambup sungah vaihawmna na om toto hi. Amau vaihawmna ciat huamkim in vaihawmte in zong na vaihawm den uh ahih manin na khangto in mi na pha uh hi. 

Tuhun ciangin i tenna khua leh gam, i hunzeek dan leh i vaizeek dan hong kidang hiaihiai ta ahih manin mun tuamtuama om Zomi te i kituahkhop ciang i vaihawm dan zong hong kidang hiaihiaita hi. Tua bang hun ciang tup leh ngim kician tak, deihna kip leh sepzia gelna kician a om kei leh hun tampi 'vaihawmna, thukikupna, nasep sehna' cihte in bei thei mawk ding hi. Tua ahih manin, hun leh thatang, sum leh pai a mawk bei loh nadingin bangcih ding i hiam? 

1. Tup leh Ngim Kiciantak Nei Ding: Sep ding tup leh ngim kician tak, banga kimang ding, bangzah phatuam ding, banga kinoptuampih ding cih theihna leh ngimna kiciantak nei a kal a kisuan kei leh a mawkna in hun leh sum, tha leh zung tampi bei ding hi. Tua manin vai neih ding ciangin a kisam ding khempeuh kaihkhopsa in makaite, thutheite in na kikum masa, na ngaihsun masa, na gel masa hamtang ding hi. Kimuh cianga gen ding leh kikup ding - ngimna leh tupte theihsa in thukikupna sungah lutpih ding hi. 

2. Kikupzia Gina takin Nei Ding: Tup leh ngim kician tak a om khit, thu kikum dinga i paikhop khit ciang i kikup dingte mah gen pah tangtang dingin a dang, thudang, vaidangte ah lut kawikawi, sawk kawikawi lo ding. Tua manin tuhun ciang khut tung pan a kizang ziauziau thei - email, sms, phone tawh kiho cihte koihkhia phot ding hi hang. Ahih theih leh vai neih sung peuhmah a kisam lua mahmah ahih sam kei leh i handphone te zanglo ding hi hang. 

3. Kithawikhol Ding: Hithei hileh i thu kikup ding pen a kikum ding tengin na zasak khol khin thei leng hoihpen hi. Tua hileh kikum dinga i tutkhop ciangin i kikup ding kithei khin a, gen kikkik kullo in vai kipan pah thei hi. Laisim ding, thu kan kholh ding, mi dot kholh ding a om leh tuate na kan khin, na dong khinsa in tukhawm leng vai kimanlangin hun kidoklo hi. A mimal a hong gen ding uh deihna a om leh tutkhopma in hong gen dingte kiangah a gen ding uh hilh khol leng vai manlang tuam hi. 

4. Thu Khentat Thei Ding: Mun pawlkhat ah thu kikumkum napi thu khentatna kibawl mello thei hi. Kikhen khit ciang i thu kikup bang ahia leh? peuh cih kikkik in om thei hi. Tua ahih manin kikhop makai (chairman) penin thu kikup ciangin a gen ding tengin a gen khit ciangin thu khentatna khat a bawl ding ahi hi. Thu khentatna a om kei leh a ciamteh pen in zong a ciamteh ding omlo a, a gelh ding, a ciamteh ding theilo hi. A gen nuam valval lai a om leh a gen a phatuam lai mah hiam, a kihelte, thukikumte deihna a kitel khinta lel hiam cih makaipa in en in a kisap nawn kei leh gen kik sak kul nawnlo hi. Thu khentatna om thei taktaklo, deihna kician taktak nailo, deih dan kibang thei nailo ahih leh a gen nuam laite in a ngaihsutna uh hong gen zel leh thu ngaihsut dan, thu tel dan cihte hong kicianzaw, kicingzaw thei hi. Tua bangte ah bel hun zeek luat ding hilo leuleu hi. Thu khentatna a om theih het kei a, a hoih pen ding a kikumte in a theih het kei leh a thulu hong puakpa deihna gensak kik ding hi. A ki khentat theih nai tuan kei leh mailam ah kikup lai dinga koih phot ding hoih hi. Khentat loh theihloh ahih leh bel a hoih pen dinga theih tawh khentat in i sep suah sawm mai ding ahi hi. 

5. Mi Kim Hamtang Ding:  Thu kikup ding ciang ahih theih leh vai khat peuhpeuh ah a kikum dinga kilawm, a gel dinga i deih, i kilawm thu sung thei dinga i lamette a vekpi un a kim ding uh ahi hi. Numeite khantohna dingin innsung nasep zong pasal in huh zel kisam hi cih bang kikum ding hileng, gentehna in, numei kihel kei kikeuh mawk leh a kihel pasal vive bek in a kisapna a theih uh hang numei kihel a a genkhiat sangin kicing lo zaw deuh kha ding hi. Tua manin a kisaipih lam peuhmah ahi theih zahzah kihel hamtang leh hoihpen ahi hi. Thu khat peuhpeuh kikup ding ciang bel themkhat kankholhna (general research) bawl loh a phamawh thu hi. 

6. Hun Lap Ding: Vai neih ding hun ciangtansa a om nak leh tua tawh kituak a tun hamtang ding ahi hi. Vai kigel in a hun lap kei leng a tungsate hun khempeuh ziakaisak hi. Mi 6 in mi khat ngak in minute 10 bek a ngak zongin a vekpi kigawm minute 60 phata ahih manin nai khat hun mi 6 in a sum uh ahi hi. Tua manin hun a kisehsa a om leh a lap teitei dinga kuan khiat ding ahi hi. Laplo ding, ziakai ding ahih leh bel theihsak kholh masak hamtang ding ahi hi. Ciah baih ding, hun a tawp tan om theilo ding ahih leh zong a hilhkholh kisam hi. Tua ahih kei leh a kikhawmte a zahtaklo leh a thusimlo, tua kikupna a thapialo leh a thupisimlo bangin mite in ngaihsun kha thei hi. 

7. Gimneih Loh Ding: Thu kikup ciang ziakai thei lua, man hak theilua cih bangin kua mah in a gimneih loh nadingin hun a kigelna bangin pan in a ciangtan a tun ciang tawp ding hoihpen hi. Tua ahih kei leh mite in tua lai in zong kipan hak, tua laiin kipan baih ciin muhna khat nei thei uh hi. Tua ahih kei leh thu kikup ding gina taka kigen kholhna a om loh ciang a kihelte in theikhollo ahih manin cimtak thei uh hi. Tua bang a omloh nadingin hun sehsa bangin kipan, kikup ding cihteng  mah kikum pah ngiatngiat, tawp ding cih hun mah in tawp! Kikup khit manloh a om a, a thupi mahmah a hih leh makaite nih leh thum in na kikum in na khentat mai uh hen, mipi ziakai sak sangin hoihzaw lai veve hi. Thu kikup nuamsa, thu zong namtui, lawp huai ahih a tutkhop nuamsa i hih leh bel ciangtan luat zong omsak lo a holim banga tut kawma gengen theih hi. 

Zomi te leitung gam tuamtuam ah om in gam khangto leh hun hawmthawh gam ah vai i neih ciangin i ciahna ding, i vakna ding dang a om kawm leh hun kidelh tangtang ahih manin i gim luat lohna ding, i hihnop teng i hun neih bangbang tawh kinawh hetlo a i hih theih nadingin hunzeek siam kisam ahih na hih teng tawh kong gelh hi. Gelkhol, theikhol, ngaihsunkhol in thu kikum, vai kihawm leh hun manpha tampi kiluak kik hi cih i lah nopna zong hipah hi. Hun a zangsiam semsem Zomi hi dingin Topa in hong ompihta hen. 
 
 
Hau Za Cin
Phuitong Liim
www.hauzacin.blogspot.com
 


Comments




Leave a Reply