WWW.TUNGZANGNEWS.COM

TUNGZANG NEWS
 
Kong muan mahmah,




Zomi khang thak Pilna nei teng aw,

khua daak unla na mit uh hak un. Zomi hizah in nang hong mitsuan uh a, nang hong ngak dimdem uh hi. Na Zomi pih teng in lungsim siangtho takin hong en uh a, "Hih pa in minam phattuamna ding na hong sem dinga, Zomi te ih tenna leitang hong puah in hong zuun ding hi" ci ciat uh hi. Hizah taka nang hong muang na mipihte nung heisan in taisan ngam ding na hi hiam? Tulai khang thakte kiangah "Na sangkah man lecin bang sem ding na hiam?"  ci-in thu dong lehang a tamzaw in  Siavuan suak nuam ing, sitni suak nuam ingh ci ciat uh hi. Ka pianna ka gam leitang leh ka minam Zomi zuun in puah nuam ka hihman in Politics sem ning aci kua mah om lo uh hi. Mipil tampi in Politics pen kikhemna guamthuuk hi ci-in thupi sim lo uh a, a sungah lut in puah siang ning a ci khat zong om lo uh ahihman in Minam leh Gam leitang pen hehpihna leh itna nei lo, a huaiham leh ganhing lungsim neite khut sung tungsak pahpah uh hi. 

Khangno pilna nei leh thu ngaihsun thei tengin lim tak hong ngaihsun dih un. Khasum tul 50/60 san ding leh zi melhoih neih ding bek tawh lungkim in, ei angsung bek khual in nasem ding ih hi hiam? Khasum khol in ih teek ciang inmun logam lei in innhoih lam in, tawldam takin tutphazaal tungah Tadensa sim kawm in Coffee don hit-hiat ding bek ngaihsut bulpi in nei zaw ding ih hi hiam? Tua hun ciangin "Politics bel a kihhuai himawk mah ei" cihsan ziau lel ding ih hi hiam? Ngaihsun pha un Zomi khangthak pilna neite aw,Thomas Alva Edison in tua ciang bek lungsim nei hileh leitung in Khuavaak (Elelctric Light) mu nai lo ding a, Graham bell in zong ama angsung bek na khual hileh nang leh kei in Telephone thei kha nai lo ding hi hang.....Zomi in nang hong ngak hi, Thangmual dung, Meitei guun leh Zomi te tenna leitang in nang bek hong ngak hi!

Nang hong mitsuan den,




Francis Lamthang (Zomi Quavadis)


-- 
Patriotism means to stand by the Country. It does not mean to stand by the president or any other public official. - Theodore Roosevelt.

 


Comments




Leave a Reply