WWW.TUNGZANGNEWS.COM

TUNGZANG NEWS
 
Pa Dam Khau Nang lai-at hoih mahmah sa ing ei. Minam it dan a kibanglo nam 4 khawng om tuak sa ing. 1. Neu cil a kipan minam it ahih manin hanciam in, gamtat hoih in nungta a, minam dangte hong zahtaak dingin om-a, minam a lamsangte. (Col. Khen Za Moong dante ci ni.) 2. ZCB tuiphum pawlpi sung vaihawmna tungtawn in thu kitukalh na kilemlohna tuamtuamte tungtawn pana hong piangkhia minam itte. .... 3. CNF te ngongtatna, saih donna thuakkhakna tungtawn a minam itte, .... 4. UNHCR thu hangin kideidanna tuahkhakna pan a hong piangkhia minam itte,.... tua teng hi. Minam it vive ihih hang I thu kihual thei lo, I minam itna zia le tong, I muhnate kikim lo tua hang hi sa ing. Ei mun koiteng cih kitel ciakin kampau luhek siam ding thupi sa ing.

2002 kum in tua hun lai USA ah Zomite tam penna  Florida ah Zo Tum Hmung hong pai in mivomte lawyer khat tawh Guam pan a tungthakte Green Card suaihna ding hong vanpih hi. Tua bang hong sep khitteh Zomi makaite in tua lel dih ei zong hih lah kei ni ee cihsan pong sam hi. 2003 ciang khatvei Zo Tum Hmung hong hawh leuleu a, makaite in lah hipa I galte hi cih san in thu kikuppih nuam lo banah, zin kido lo hi. U Kham Go Pau kiangah zintung in sun sungteng ken a painopna pawl khat ka vakpih hi. India le Malaysia ah UNHCR tungtawnin I mite sap theih ding a hanciamnate hong gen hi. Zomi sungah mipil tampi om a kipawlna kician a om ding hong hanthawn hi. Na sem khawm ni ci a hong zawn a hi hi. Tua hun lai I makaite kuamah in hopih lo na thudon het lo uh ahih manin lungnuam mello in ciah kik hi. 2003 kum bei lam pawl ciangin Miami pan World Relief Makai mikangte nih Sia Edie Hang makaihna leh vaihawmna tawh Sheridan Baptist Church aa Zomi Worship Service ah hong pai in India, Thailand leh Malaysia a om na mipihte uh min list na theih zahzah uh hong pia un ci-uh  ahih manun ko zong kaikhawm keii in ka pia uh hi.  Tua lain Malaysia sangin India pen lam-etna om zaw dingin genuh hi.

Malaysia leh India panin Chin min tawh refugees hong lut nawh sim ciangin Chin min pua makaite in Tedim min ahih nak leh gawt bawl pah uh hi.  Nasep ding kizawt lai in kua mah a ut loh sam hang, hamphatna a kimuh khiat teh US om Zomite zong Inn lam phone kiset nainai in Malay na pai un, India na pai un, Thailand na pai un ci in kihopih nainai zel hi. UNHCR vai in Chin deihte muhdahna pen manlo ahih lam ka telgen nuam hi. Nasem khawm dingin hong kizawt lain Zomi makaite in panpih nuam lo, tutpih nuam lo I hih man ahi hi. Malaysia a ZAM hong om khit Zomi min tawh UNHCR ten hong san khit hun lamteh US lam a Zomi makaite minam it in hong kilekin hero pi bang khat in a om bang kiom phingphing zel sam hi.

Tu hun pen Chin state in Kawl kumpi tungpan Pinlong agreement omsa bangin Federalism kiukna zattheih ding I hanciam hun revolution period hi-a, minam min vai tawh buai luat hun hinai lo hi. Democracy kician I ngah khitteh mipi deih min I kipsak zo pan ding hi. Tua pen politicians te-in hong makaih dinguh ahi hi.  Tutung Myanmar census  ah Zomi min gelh ding kihanthawn in kihanciam hi. Ahi zongin 914 code a ki-at code nei nai lo min thak teng pen computer in khentel thei lo ahih manin code number thak guat kulmasa dinga U Khin Ye leh a pawlteng in khut tawh khatkhatin a sim ngekngek kul ding uh hi. Tua khitteh, Zomi bangzah om a, hih Zomite Chin minam nuai ah koih ding maw? Atuam vivelin taiyinta minam thakin koih ding maw? cih thu pen problem lianpi khat hong hizel ding hi. I sanggamte tawh thu kikum khawm lo, thuvai hawmhawm loh phatmawh hun hong om ding hi. Zomi itte pilvang takin kampau huai sa ing.  
 


Comments




Leave a Reply