WWW.TUNGZANGNEWS.COM

TUNGZANG NEWS
 
Leitung ah mipil tampi hong piang uh a, tuateng lakah a pil leh minthang pha deuh 10 kitel khia ding hileh Galileo Galilei  zong kihel zo hamtang ding hi. Amah pen February 15, 1654 kum in Pisa(Italy) ah hong suak in,amah pen amau unau 7 lakah a upa pen ahihi. A pianna pa pen Music tum siam leh Samul zuak tawh sumbawl mihau khat ahihi. Galileo suah kum in leitung mi minthang Willliam Shakepeare inzong anu gilsung panin leitung khuavak hong mukhia a,  tua kum mahin leitunga limsuaih siam pen leh suangmilim bawl siam pen ahi Michael Angelo na si hi. Hih mipil teng thum pen cikmah hunin leitung in mangngilh ngei nawn lo ding hi. Galileo pianna pa in a tapa pen zatui lam siam dingin deihsak ahihman in kum 10 (1674) hong phak ciangin Jesuit Monastery khat ah sang na kah sak hi.




A sangkah zawh kum 4 khit ciangin Galileo in a pa kiangah phungzi (monk) suak nuam ingh ci miau hi. A pa zong lungkham ahihmanin a sangkahna mun panin nawh takin lakhia pah hi. Kum 17  (1581) hong cin ciangin University of Pisa ah zatui lam sin dingin kha leuleu hi. Kum 20 hong cin ciangin Biakinnpi (Cathedral) tung khuma lalcinpi kikhai pen tawlnga lo in a kivei den a muh ciangin lamdangsa in limtak hong ngaihsun pha hi. Tua zawh a sawt loin leitungin atheih khak nai loh naipi bawl theihna The law of Pendulum hong mu khia hi. Ahizongin University ah akah hangin nambat tuat (Mathematics) sim loh adang  peuhmah nopsak nei lo mawk hi.  Tualaitak in Tuscan Court ah hunbit in Mathematics  a sin theihna ding kivaihawm sak hi. Hih thu hangin Galileo pianna pa pen nuam khollo hileh kilawm hi. Bang hang hiam cileh tua hunlaiin Music tum siamte sum thalawh zah leh Mathematicians te sum ngah zah kikim lel hi. A sawt loin Degree khat zong ngah loin University pan hong paikhia hi. Nek zonna dingin naupangte Mathematics sinsak hong kipan ta hi. Tua kawm mahin “suangmanpha leh tui a tamdan kibang napi suangmanpha gikzaw tham hi” cih thu hong mukhia leuleu hi. University thupi khatah Mathematics hilhnuam ahihman in nakpi takin hong hanciam a, hong ngah takpi hi. Ahizongin pil in siam mahmah taleh alawm leh agual tawh kilem thei lo ahihman in University thuneite’n zong ama mun luah ding midang  a lak mai nop hun uh tam mahmah hih tuak hi.




A lamdang mahmah khat ah Galileo pen  Literature lamah hong lunglut ciangin Mathematics a hilh lai sangin lawhcing in min hong nei zaw thamtham mawk hi. Tuahun laitakin Florence a mipil  kipawlna The Academy of Florence akici teng pen  Dante’s Inferno tawh kisai kam akinial zawh uh kum 100 val bang na cing khin ta a, tua kinialna sungah Galileo zong hong kihel hi. Hih Dante’s Inferno pen a zaina bang zah hiding, koimunah om, bangci bang melpua cih thu Scientist te lungsim puak tawh kituak in deihtak lungkim takin hong genkhiat ciangin mipi in thangah mahmah uh hi. Tuani a kipan Degree a ngah zawh lohna ahi University of Pisa in amah tawh kum 3 sung nasem khawm dingin Contract sign pah uh hi.  Tuamun a tun zaw asawt lo in University huang sungah Aristotle’s  law of nature (na limlim a sanna mun pan in khia suk lehang a gikzawzaw pen lei tu masa zaw hi) tawh kisai kam kinialna aso laitak ahihi. Ataktak in cilehang Aristotle ii thugen ahihnak leh Topa Zeisu thugen mah tawh kibangin khialhna om lo ding hi akici liang ahihi. Aristotle ii muhkhiat The law of nature pen mite’n a hiding mah sa pah lel uh a, maan maw maan lo cih thu akan kuamah om se lo uh hi. Galileo hun ciangin amahmah hong kipan khia hi. The Leaning Tower akici inn-awn, Meter 54 asanna dawnah van honkhat tawh Galileo va kahto hi. Adawn atun ciangin a van puak teng khia suk hi. Agikte leh a zaangzaw deuh teng, avek in hun kituak lianin lei tusuk gai uh hi. Aristotle in amuh khiat Law of nature pen maan lo hi cih mipite leh Galileo in tuani in hong mukhia uh hi. Gensa mah bangin Galileo pen midang tawh kithuah thei lo ahihman in kum thum hun hong bei ciangin a sepna University in phal takin ciahsak uh hi. Tuani a kipan zawn a haksat zia hong sinto in, a pa in a sihsan khit lailai ciangin nuntaakna hong baih nawn del lo hi.




(Biography of Galileo)

Francis Lamthang (Zomi Quavadis)

 


Comments




Leave a Reply