WWW.TUNGZANGNEWS.COM

TUNGZANG NEWS
 
Thum bulphuh luatna (Against Trinitarianism)
A Pasian hihna sangin tua thum teng bulphuh luatna ah upkhialhna le pomkhialhna piang thei tawntung hi. Mihing’ lungsim ah tua thum hihna bulphuh luatna panin kua lian pen ding cih ngaihsutna le Pasian pen thumpha hi cih (pluralism) thu hong lut pahpah thei hi. 



Thum hihna tawh kidim Pasian khat thu ah thuhilhkhialhna a piang sak thu thum om hi. Tuate in Tritheism, Monarchianism le Modalism ahi hi.


1.      Tritheism – Hih “Tritheism” thupomzia in Pasian pen thum bangin hong mu sak hi. Pasian ii hihna tua thum (persons) te a ngaihsutna uh pan Pasian pen thum pha in tuateng pen koibang zia hiam aw khatin a kizopna khat a om ahi hi, cihbanga hilhna pen thuhilhna maan lo ahi hi. 
2.      Monarchianism – Hih “Monarchianism” thupomzia in Pasian ii Khat ahihna bulphuh nuam lua in, Tapa le Kha Siangtho pen Pa sangin niam zawa, Pa kiang panin a kipiang sak hi kha ding hi ci uh a, a tawpna ah Pa bek Pasian taktak hi ding hi, ci uh hi. Hih thupomzia ahi *Arianism* in Khrih ii Pasian ahihna nial ahih manin thuhilhkhialhna kici hi. Hih thuhilhkhialhna ii a gah pen tuni in Jehovah’s Witnesses le Unitarianism te’ thupomzia hong suak hi.
3.      Modalism – Hih thupomzia in tua Pasian’ thum hihna (persons) te pen a kilamdang hi lo hi. A pianzia a kikhel a kilaih zel bek hi ci uh hi. Pasian pen Pa suak zel, Ta suak zel, Kha Siangtho suak zel cih bang daan hi. Pa, Ta le Kha pen maitang thum nei daan suah uh a, tui pen tuikhal suak tuikhal pen tuikhu suak (water, ice and steam = H2O) tawh genteh uh hi. Thumgawm Pasian pianzia pen tui ii pianzia H2O tawh gentehna pen thuhilhkhialhna ahi hi. 



Theihding (application)
Pasian pen thum pha lo hi. Pasian pen thum hihna Pa Ta Kha tawh kidim Pasian khat hi bek hi.  Pasian pen khat hi a, tua pen Pa Ta Kha kici hi. Pa Ta Kha sungah a kidawl kizopna (subbordination) om hi. Lu le liang le khuk le khe cih bangdanin kizopna om a, tuateng pen khat ahi hi. Neuzaw lianzaw cihna hi lo hi. Pa pen lian pen a, Pa pan in Ta le Kha a kipiang sak cih bang hi lo hi. Pa Ta Kha thumgawm Pasian khat, kipatna nei lo mongnei lo ahi hi. Pa pen Ta hi lo a, Ta pen Kha Siangtho hi lo a, Kha Siangtho pen Pa le Ta zong hi loin a tuam tek ahi hi. Kibang lo hi. Ahi zongin Pa pen Pasian hi a, Ta zong Pasian hi in, Kha Siangtho zong Pasian ahihna ah kibang ciat hi. Mit pen bil hi lo a, bil pen kam hi lo napi-in pumpi khat ahi uh hi. Mihing khat pen Pumpi Kha le Nuntakna thum tawh ih kidim hi. Hih ka gentehnate pen gentehna bek hi a, Pa Ta Kha pumkhat kizopzia pen hih sangin thuk in zai zaw a, upna tawh san ding bek ahi hi. Pa pen Ta bangin piang zel, Kha Siangtho bangin piangzel cih bang hi lo hi. 



Thumgawm Pasian thuhilhna pen hotkhiatna san theih up theih nadingin a kisam mahmah thugui pi khat ahi hi. Jesuh Khrih pen za ah za Pasian, za ah za mihing cih thumpom pen Christian thu upna adingin a bulpi khat hi a, a dangdang a thuhilhnate uh a maan mahmah a bat hangin hih thu upna pan pialkhiatna pen upna bulpi (the basic Christian doctrine) thu nialna ahih manin hih bang thuhilhna ah hotkhiatna maan (genuine salvation) piang thei ngei ding hi lo gige hi.  Thugawm Pasian upna sungah biakpiakna maan piang thei bek hi. Thumgawm Pasian upna sungah a picing thungetna piang thei bek hi (Eph 2: 18). Thumgawm Pasian khat bek tungtawn in Pasian le mihing le vantung leinuai kizopna maan piang thei bek hi (Eph. 3: 15).
 
Kum zalom li (AD 4) hun lai in Gregory of Nazianzus a kici thu-um misiangtho pa khat in hih bangin na gen hi, ‘Pasian khat thu ka ngaihsut simin Pa Ta Kha Thum zia tawh thakhat thu-in mukhawm loin ka ngaihsun thei ngei kei a, tuamah bangin Pa Ta Kha tua thum teng tua Pasian Khat sungah kikaituah kik loin om lo ding hi, cih ka mitkha ah mu loin ka om thei kei hi’ na ci hi. Cihnopna ah Pasian’ thu a ngaihsut simin Pa Ta Kha hih thumteng a ngaihsutna ah suak pah lian cihna hi a, tuamah bangin Pa Ta Kha Thum thu a kigen simin Pasian Khat ii ahihna a pianzia ahih lam ngaihsun thei pah lianlian cihna ahi hi. Pa Ta Kha thumgawm Pasian khat in muthei pah veve cihna hi.
 


Comments




Leave a Reply