WWW.TUNGZANGNEWS.COM

TUNGZANG NEWS
 
Vol- 4
Issue - 14
Date - August 30, 2014

TZNewspaper hawmna sungah ka at a sim kham nuam khat leh nih om khak leh cihna tawh hong hawm sawn ing.

THUPHA BAWL KIDEM HUN


Thu patna, tuhun pen Leitung gam khempeuh mun khempeuh khua kimu in ki khangto mahmah ta hi. Nidang sangin nasep silbawlna te tampi kikhai ta hi. Zomite zong gam dang mun tuamtuam ah ki tungin mite hauhna mite pilna te vasin in minam dang te tawh liangko kikim in ki om ta hi. 

A masa in ah, ei Zomi te pen a genhak mahmah ki hi citciat sese hi. Bang hangin genhak ci I hiam cih leh thumantheina pi-in ki zui nuamlo sese hi. Thuhoih thei na pi-in ki semlo sese hi. Thusia thei na pi-in kisem veve hi. Thuhoih gen ding sangin thusia gen ding nuam kisa zaw sese hi. Mi tungah thpha bawl ding sangin ei tungah thupha hong kibawl leh kici zaw sese hi. Mi tungah kamal hoih zatding sangin kammal hoihlo peuh kizang zaw sese hi. Thuhoih ki hilh ding sangin thusia lampeuh kihilh zaw sese hi. Thu hoih ki hilh leng ki mangnuam lo sese hi. Thusia ki hilh leh ki mang zaw sese hi. A gualzo te pahtawi ding sangin ki hazat lam hizaw sese hi. Tua te khempeuh a tawpna ah a kimanna khat zong omlo in supna lungkhamna kisikna hong tun ding hi. Tua ahih manin a hoih in I gamtat ding pen Pasian deihna hi in a thupi penpen ahi hi. Mihing te khat leh khat ki it in ki thupi sim kizahtak bawlna pen lungsim picing mi khangto te zat ahi hi. 

Tua ban ah, ei mahmah I nisim nuntakna gamtat luhek mukpau kampau te kisiktel huai hi. Leitung ah mipil te in hih bangin kam na pau hi: thu na gen ma-in nihvei ngahsun masa in na ci hi. I kammal in mite lungsim suangah ling bangin a do thei hiam cih pen gnaihsut huai hi. Kampau kammal in Lai Siangtho sungah langnih a hiam temte sangin hiamzaw ci hi. Hih ka kampau ka kammal te in mite adding in thupha thuhoih maw mite lungsim nasak hiam cih pen ngaihsut masak ding pen a kisam leh a thupi mahmah ahi hi. Ei sang a hauzaw, a zawngzaw, a pilzaw, a mawlzaw, a lianzaw, a neuzaw  kua mah deidan lo-in a kibang in ki zahtak ki thupit bawl ding hi. Tua bang gamtatna pen mikhangto gamte leh mipil te zat ahi hi. Zomi lasiam Lengtong Pauno in zong la tawh hih bangin na gen hi. “ nang tungah hong ki bawl ding na deih bangin midang tung bawl in.” ci-in la in na sa hi. 


A tawpna ah, Leitung ah mite khangto semsem in computer bek tawh nakisem ta hi. IT (Information Technology) nasepna hong khang semsem in mun khat leh mun khat kizopna te manlang lua ahih manin a omkhawm a tukhawm a khalkhawm mah tawh kibang ta hi. Leitung pen mipil te in khua khat “Global Village.” cita uh hi. IT nasepna hong khang semsem in mailam ah mun khempeuh ahcomputer bek tawh nakisem ta ding hi. Tua ahih manin pilna lo tawh koi mun ki gam ah hamsa in  bang mah kisem theilo hi. Hong khangto ding siamsin sangnau pangte in I hancia ding kisam hi. Eite in nidang I pu I pa te’n mang zongah a mat ngamloh  a muh ngeiloh uh mite pilna siamna te tu-in kizang ta hi. Gam lamnapi tuipi gal khat pan in melmuh lo tong kisang in, thelnah laileng, melmuh tongsan te tawh nuamtak in thu kiza thei in nuamtak kizang ta hi. Septheih bangin nasep kipat hun hita hi. Khanglui te paunak in: “mihing leh papo” ci hi. Hih Leitung ah tawmvei nuntak sungin nahoih sepding hanciam huai hi. Ei mihingte nuntakna poen mitphiat kal sung a beithei thu ahih lam I thei hi. Na hoih sepding pen mi khempeuh in kithei in a sem ding mi kikhat hi. Pilna , siamna neihsa, thatangte sitlo in innkuan sung, ulenau, khualetui, gam leh minam ading sepkhiat hun hi ta hi. Thusia bawlbawl mi gen siatsiat ding hun hilo hi. Thupha bawl hun khaici tuhhun hita hi. I pilna, I siamna, I neihsa, I thatang te piakkhiat hun zekhiat hun hita hi. Ni khat ni takciangin I vawh bangin at hun hongtung ding hi. Tawmvei nuntak sung neihsa, thatang, pilna, siamna te zatsiam seksiam ni—vokpi mai ah suangmanpha bang hilo zaw in I nuntak sung hunte zatsiam ni. 

 
Thu khupna, Leitung ah thupha ngah mi nuamsa I cihte kua te khiam  cih leh thupha bawl zote na hoih semte na hi hi. Neihval, lamval hilo in deisakna itna veina tawh sepna khempeuh maksuak lo hi. Thusia bawl hun hilo in thupha bawl hun hita hi. Thupha bawl kidem hun hita hi. 

 By: Kap Tung (USA)

 



 


Comments




Leave a Reply