WWW.TUNGZANGNEWS.COM

TUNGZANG NEWS
 
Malaysia Zomi Khuado 2014 Ka Siimna - 5

 


A phei ngo hilhialte lah tumkik ta, a duang cing zihziah Zotaang te zong, Zomi lasiam, awhoih leh mipi mai ah lasak siamte hong kipan leuleu, nak nop hiven. Nuam panpan ding hilai. Zomi te pen lasak zong a kiva leh a siam himawk hang. Lengtong Hoih te hunlai in hih bangin lasak siam leh awngaih suah siam kidemna om leh mite in nuamsa in tusangin na uangbawlzaw kaan lai un cia cih ka ngaihsun hi. Tu'n lah Pu Lengtong Pauno te a endik pawl hita a, a siam leh siamloh uh a endik te hita hi. 

Pu Lengtong Pauno in hong nusia khin a sanggampa phuah, Zawlla Ngumngek khat hong sa liahliah a lakam leh lathu bel amah bek a siam hilo in a unau vekpi un a siam uh na hizen hi. Amau innkuan in Zomi hong lapsangna uh Zomi te in phawkloh in koih ngei hetkei ni. A tul theilo lasiam nei ihih manin angtangin pahtawi in zahtak siam ni. I go, i gamh khat ahi uh hi. 

"Lamka pan hong zin Zomi lasiam Tg. Mungbawi in lasa ding" cih a kipulak ciangin hunzeek Pa Francis Khampi in a khut nih tawh Mungbawi naungek tawi bangin a lenuai pan dom in hong tawi leuleu a, stage tunga chair tungah a tutsak khit ciangin mipi in khutbengin muak ziahziah uh hi. I theihsa ciat bangin Mungbawi pen a pian pan a hici hi in a pumpi a khut a khe kim a, ahih hangin a cimeng teng khanglo ahih manin neu a, naupang bangin kidom ziauziau thei hi. A sanggamnu Lia Kim in hong zinpih a, naupuak bangin a nungah puakpuan tawh pua ziau lel hi. Lasa dingin a music hong ging ciangin mipi lungdamlua in khut kibeng ziahziah a, amah zong a lawpna hong khang semsem in la hong sak leh a aw suah ah mi batlohna limlim omlo in mi tampi sanga lasiamzaw in Topa in Talent pia a, hampha kasa hi. Amah letsong pia nuam hong kigual zihziah a, Lamka khuazang sanga tamzaw ding mi hong kigual deudau mai hi. Lungsim hong lawng in mipi hong phawng mahmah a, Zomi te i ki itna, i kideihsakna leh i kipahtawina lianpi kimu hi. Zinmangpipa in zong, "Mai kum April 23-26, 2015 ZOSUAN TUAILAI KHAWMPI, Tedim ah lasa dingin nong pai loh a phamawh hi", ciin vaikhak tangtang hi. 

La dawngkhat a sak sungin letsong pia naunau uh a, a sak khit ciangin zong a pia nuam Ciimnuai khua zah sang a tamzaw mipi kigual lai ahih manin a tutna ah letsong dawhna ding kikoihsak a, tua ni a Khuado siim a hong pai Zomi khempeuh a pialo om in ka umkei phial hi. Topa hoihna thupi kasa hi. Zomi lasiam min gualhna ah Mungbawi zong kigual thei lua hi cih ka mu hi. 

Tukpeng siamte kipahtawi:
Zomi Khuado hun madeuh teng Khuado Tukpeng kidemna na nei uh a, a siam vive hi in a siamlak ah a sui banlo te zong Zomi Nam Ni laiin Singapore Zomi Innkuan tawh ka suih uh leh ka zo dektak uh hi. Tua ahih manin Malaysia ah Zomi te tukpeng suih siam dan pen a kigen ngam vetlo hi (ko Singapore te zak ah! Ahi zongin maikum Zomi Cup ciang bel ka zawh ta ding uh um mai ing!!). Tuate khempeuh pahtawina leh a gualzo te khipi (medal) awhsakna ban ah Khuado Cup piakkhiatna zong limci takin kimawlna lam makaite in hong sai ziahziah uh a, mipi in etnuam kisa in kidak ngekngawk bek hi. 

Tukpeng sui siamte leh a siate uh, khua nu leh pate, pawlpi siate leh a upate uh cih bangin khat khit khat kipahtawi in kitheihpih in kilamsang tuah a om diamdiam Zomi te ka mit tawh ka muh ciang 'nuam sa ngaungau song ing' a cih uh ka bang hi. 

Khuado Sabak khat kei hong kipia: 
Zomi ka hih manin Zomi Khuado ka va siim hi. Hong kisam kei leh zong a pai sawm, a pai ut ka hi a, ka mipihte lungdamni in kei zong a kihel nuam ka hi hi. Zomi te kipumkhat in nasem khawm in kithutuak in gualnuam uh hi cih ka zak bek pen lungkim zo nailo in 'a takpi mah uh maw' ciin a va en nuam kawm, a va mu nuam kawm ka hi hi. Ka minam hihna a angtang, ka mipihte a ngai, ka mipihte tawh akikhawl nuam ka hi hi. Mun leh min khawng hong kipiak loh hang zong ka mipihte lungdamna ah kei zong a lungdam khawm nuam pawl ka hi hi. Thugenna tomno hong piak uh ciang, kei zong lungdam takin ka sang lel hi. Khuado sabak khat kei hong kipia ciin ka angtang mahmah hi. Khual pan ka hih mana hong kipia hidinga, ka gim ka tawl teng hong bei hanhan tawh kibang hi. Ka dam nak leh maikum lam ciangin zong pai kik zel ka sawm hi. 

Khuado Sabak hong kipiak ciangin kei zong:

"Khuado 2014 ah i phawk den ding thu nam 10" ciin thulu ka vawh demdam sam a, hih bangin ka gen suk biangbuang hi. 


1. Kithawi Khol: Zomi te in Khuado ding ciangin meilah sat in, meilah ten in meisel ding sialluang keu, singkhul ding singkhuah cih bangin na kaikhawm khol, zu na bilh khol uh, a kisam ding khempeuh na kaikhawm khin uh a; na kithawi khol khin hamtang uh hi. Zingciang khuado ding tuni in nawhsa in sa ding, sing ding, mei ding, khuai ding zong tawm hehu lo uh hi. A hun tun ma pek panin na kigingkhol, na gel khol in a hun a tun ma in na kithawi khol khin uh hi. Zomi te in vai khat peuhpeuh i neih ciang a mawk septe hilo in a kithawi khol sitset te hi hang. Tua mah kiplet den lai ni. 


2. Dawi leh Kaute na hawlkhia uh hi: Khuado ciangin na kisiansuh uh a, dawi leh kaute na hawlkhia uh hi. Tuga, heiga, singkhuah, suangtum khawng in lupna nuai, innnuai, huansung teng khawng in 'Dawi aw, kau aw, na zun na ek namsia, na ni na kha cingta, na nu na pa in hong lametzawh sawtzo, na khua na tui zuan in...' ciin a kihawlkhia, a kinotkhia ahi hi. Tuni zong Zomi te in i nuntakna ah a namsia, a kihhuai, a kilawmlo, a ginalo khempeuh hawlkhia in siansiah ding hi hang. I innkuan, i khuasung, i minam sung siansuah ding hi hang. Mimal nuntakna, minam nuntakna a namtui theih nadingin a namtuilo peuhmah tuni in hawlkhia in i ciah lam ciang a siangtho sa in ciahkik ding hi hang. Zu leh sa duhluatna, tuibuk, zatep cihte, a ginalo gamtatna leh Zomi hihna nangawn a gum ngamlote kiangah a angtanghuaina genin minam a hong bawl Pasian zahtak in angtang takin hih mun panin a siangthosa in ciahkik ding hi hang. 


3. Phuisam bek hilo, muhtheih in semkhia uh:  Khuado ciangin siampi te in zu phih in phuisam in kampau khia bek hilo in mipi khempeuh in tuga, heiga tawiin muncin teng holh in dawi leh kaute hawl in na diang khengkhang uh hi. Kampau bek tawh gen ziau hilo in thatang mahmah tawh diangkhia uh hi. Zomi te in vai khat peuhpeuh ah a gen bek hilo in a sep tawh kithuah pahpah hi. Gen bek si in sep ciang omlo cih bang Zomi ngeina hilo hi. Tuni in a thu a i gen theih pen a tak a semsuah den Zomi te i hi hi. 


4. Zehtang uh hi: Kuamah a phengphi omlo, a tuamtat omlo, thu tuam sat nuam omlo in kithutuak diamdiam in Khua na do uh hi. A tuamtat a om ciang a Khuado uh lawhcinglo, dawi leh kaute kihawlkhia zolo in mai kum ciang a hauh ding zah uh a tuahphat ding zah uh , a cidam ding zah uh hilo thei ci uh hi. Tua manin hih bang hun ciangin kuamah mipi leh lam ah pang nuamlo uh hi. Kua mah a kituambawl omlo uh hi. Kuamah a tuamtat omlo in hih khawm liailiai uh a, pangkhawm uh hi. Tua banga kithutuak ciangin Dawi leh Kau te in zong na kihta pah in na neh ngamlo pah hi. 


5. Khuaila in khuahun na en uh hi: Zomi te pen khuadak lo in a gamtanglote hi hang. Mailam hun ding bangci ding hiam ciin tuhun a thupiangte pan i sin theih om hiam ciin a kituat khol ahi hi. Kim leh pam ah thupiangte, minam sungah thupiangte, innkuan sungah thupiangte enkai in mailam adingin kal a kisuan ahi hi. Khuai a lak uh ciangin a tak leh takloh tawh mailam hun ding khawng na gen thei uh hi. Khuaino lup dan pan zong na mukhol thei uh hi. Zomi te aw, i kim i pam ah bangthu pianga, bangci mailam kalsuan ding cih limtak khuadak in kalsuan den ding hi hang. Pheng pai in thu khat peuh mittaw sialkhaulet lo ding hi hang. A hun, a mun, a kihilna en in pilvang takin gamta ding hi hang. 


6. A si a hing kiphawk uh hi: Zomi te kuamah kimangngilh ngeilo in a kiphawk valvalte i hi hi. A si ahi a,  a hing laite ahi zongin a kiphawk veuveute ihi hi. Khuado ciangin a si sate zong kiphawk in amau zalna dai ah va hawh in nupite in tuibuk, buhman, tangho, sa, zu cih bangin a lim theithei na puak uh hi. A ne thei lai ding cih banghilo a, ahi zongin ki itna kiphawkna lahna hi. Vaphual tawh kiciamteh Zomite pen a ki it diak leh a kingai diakte i hih manin i hun nuam, i hunpi te ah it leh ngaih hong paisan khinte kimangngilh theilo hi. A hingte zong kiphawk in sabak kipia a, annek ciangin kideihsak in sa minsa nangawn na kibak uh hi. Zu na kitulh uh a, niangtui na kitulh uh hi. A lim a al na nekhawm uh a, na kingai diamdiam uh hi. Tua bang ngeina Zomi te in i mangngilhloh ding ahi hi. 


7. Hun ciangtan nei uh hi: Khuado hun sung dinga kiciangtan ni thum sung bek mah Khua na do uh a, a val na behlap tuanlo uh hi. A kipatni ding mah in na kipan uh a, a tawpna ding mahin na tawp uh hi. Zomi pupate in nai leh hun ciamtehna na tuamneih lo in ni leh kha leh ak khuang khawng tawh hun na ciamteh uh hi. Ahi zongin kuamahin hun laplo, ziakai, hun khengval cih bang omlo hi. A hun lap in nasem uh a, a hun ciangin tawp uh hi. Zomi te pen mite hun a mawk beisak utlote hi hanga, zinna vakna ah zong a val a tut khak ding, a val lua taam khak ding cih bang a kikhual tangtangte hi hang. Tuhun ciangin zong a hun ciangtan a kigamtang hi a, kuamah a hun ciangtan a gamtang theilo cih bang ki omlo hi. Hih pen a zangto den ding, a kemcing dingte i hi hi. Hun bek hilo in, van leh nate zong a kisam zah val a khol euaute hilo in a kicing dinga a zeek te hi hang. A val a hih pekpak cih bang omlo hi. 


8. Sa na kikholh uh hi: Khuado ciangin veng leh pam ah beh leh phung sungah, lawm leh gual sungah, khuasung gam sungah i nek ngaihte sabak kieu in kikholh hi hang. Tua pen kinekngaihna hi a, itna kilahna hi. Kiphawk cih lahna hi a, i muinam nek khat mite in na ne kei leh eibek in i nek leh i gilna thei ciin mite cilphul ding khualna zong hikawm hi. Ei bek kikhual a gamtang nuamlo minam i hihna leh mite i huaina, i khualna lahna ahi hi. I ki itna te a kemcing toto ding hi hang. 


9. Khuangtum Sialkitum nei uh hi: Khuado ciangin khuasung siansuahna, gualnopna zong na nei uh a - siampi, khuangtum cih bangin sep ding mawhpuak na kigual diudeu uh hi. A sep ding ciat uh sem in amau seploh dingte ah kicinglah in va diang sesu seselo uh hi. Amau sep ding ciat zo tak in sem uh a, amau hanga pellem ding deihlo uh hi. Tua ahih manin Khuado ciangin mi khempeuh in amau sep ding omciat a, amau sep ding ciat zothawh takin sem ciat uh hi. Tua manin a hun ciamsa bangin kipan, kizo hi. Khuaila dingte in khuaila, singpua dingte in singpua, meilah sat dingte in meilah sat, sa bawl dingte in sa bawl cih bangin vai na nei tek uh hi. Vai khat peuh ah Zomi te saseh hawm banga kihawm diamdiam hi hang. Nek ding ciang zong nekhawm diamdiam hi hang. Eima satan tek a kem, a zeek, a semkhia hi hang. Tua pen i minam ngeina hi. 


10. Zu leh Sa ne in nuamsa uh hi: A ni tawp ni ciangin dawi leh kaute a kihawlkhiat khit ciangin a lungdamna uh late sa in gualnop in zu leh sa na ne khawm uh hi. Kikawi in lam uh a, a lim nono nek dingte kitulh in kino uh hi. Nopbawlna a nunung pen ah koih in sep ding teng sem masa uh hi. Sep ding khempeuh sep khit ciang a nuam ah lut pan uh ahih manin minam khangto leh minam pilte gamtatzia tawh kizui ahi hi. Zomi te zong a pheng gamtat hideksuailo in a kilawm, a hoih, a namtui in a gamtate hi hang cih kimu thei hi. I nuntakna ah tua bang i zuih ding i pu i pate in hong nusiat uh hi. Khangthakte in zong tua gamtat dan hoihte i kep i zat i ciin ding ahi hi. 


Tuni in Khuado sabak nong kholh uh ka lungdam. Zomi Khuado hong siim khempeuh Khuado thupha namcin tawh Topa in hong phungvuh ciatta hen. Ka lungdam.

Hih teng ka gen khit ciang sawtpi ding ka sak leh minit sagih sung khawng bek hiding hong ci uh a, 'hun sau zang kei ing, ka lungdam' ka ci kikkik hi. 

(zop lai ding)



Hau Za Cin
Phuitong Liim
www.hauzacin.blogspot.com
 


Comments




Leave a Reply