WWW.TUNGZANGNEWS.COM

TUNGZANG NEWS
 
Malaysia Zomi Khuado 2014 Ka Siimna - 6




Zolia leh Zotaang te zong a khatna pan a thumna dong kitelkhia ta ahih manin amaute ZOLIA leh ZOTAANG piakna zong om ding hita a, mipi in kua in a ngahtam aw ciin ciltui kai liang, mittang kia dekdek liangin a kien, a kizanuam ahi hi. Amau a kizepna uh hong laih leuleu uh a, a tom liklek, a dawk dinga kilawm ciang a dawk sitset, tangvalte zong a lawpsak mahmah tuam tuanlo in hong kizem uh a, mipi in khutbeng ziahziahin kimuak leuleu hi. 

Amau hong pai khiat kawmkawm un Zomi sungah lasiam Siamah Cingsan naunu ahi Siamah Lunbuah te innkuan (amah kihello!) in ZOMI VOCAL BAND kici in a pasal phuah Zolia cih la hih hun ading ngiat a a phuah sa kawm in a kiu khat ciat pan hong pusuak uh a, amau lah tangciin puan vive silh, a mel uh lah hoih, a tha uh lah hoih, la lah siam khin uh, a pa uh a naupang pen tawh kibang zawlai..... nak kilawm lua hiven. Zolia te hi leng bel tangval ka teel ding thei pah mai ning! Amau innkuan in Zomi hong lamsang in hong etlawm sak mahmah hi. Siamah Cingsan te unau lasiam zia a khan lai un ka muh khak loh hangin tunung ciang ka mu kha toto a Topa in hih zahta talent a piak pen hampha uh kasa hi. Amau zong a mawk ngah uh hih tuaklo a, a pa in a thunget ngiat hih tuak hi. Hih bang mi etteh huai Zomi sungah i neih pen hampha leh angtang mahmah hang. Ka tupa uh Sia David Vial Za Mung (tun a innkuan un Texas, USA tungta) pen 1989 kum in ka khua uh Murlen, India ah hong zin a, "Noh, khua lam ah bang pawlpi ah kikhawm?" ka cih leh "lasiam pawlpi ah," hong ci ziau hi! Bang e? ciin lamdang sa in ka dot kikkik leh "Lasiam Siamah Cingsan te pawl e..." hong ci hi. Aw, tua dan himaw... ciin tuni dong 'lasiam pawlpi' cih tawh ka melhtuah kha den hi. Sianu Lunbuah te innkuan pen Zomi sungah "Lasiam innkuan" kici leh kikhial lo ding hi. Lungdam hang. 

Zolia leh Zotaang kitheita; Zomi lasiam zong kitheita:
Zomi sungah nungak melhoih, thacing, duang hoih, lampai siam, khevik siam tampi lak pan tukum adingin a hoih penpen kitelna ah a khatna, a nihna, a thumna ngah dingin Zolia te pheizum ciangciang nahtang luang kheh ngek banga no sitset mipi mai ah hong kizui diamdiam uh a, tangvalte bang a mit uh phelep ngamlo liang uh hi! Papite bang a ciltui uh kaai duahduah liang hi (mu kha hi leeng). Nupi te in 'ka nungak lai hih bang kibawl hizen leh maw' na ci uh a, naupangte in 'ka nungak ciang'ciin ngaklah takin na en dimdiam uh hi. Tua bang mah in Zotaangte zong hong pai zetzet uh a, Zogam galkap te bang mah in a lampai uh kilawm, a thatang uh kidim, a duang uh thacing! Kumdanga te mu kha keng, ahi zongin tukuma teng bel ka muh lak pan a hoihpenpen teng mah hipah hi. 

A vekpi vua kigual diudeu lak pan a  1na, 2na, 3na cihte hong gen deudeu uh a, mipi in lungdampihna tawh khut na beng ziahziah uh hi. Kei bang dingto liangin ka khut ka beng a, ka lawpna hong khang mahmah hi. 

Zomi lungsim taktak kidawk: 
Takkheh Zomi! Zomi hih angtang buang ing. Zomi hih nak nop hiven. Banghang in maw? Zolia a ngah ding mi thum a kitelkhiat khit ciang khat khat in hunukte in thudong uh a, "Tu laitak na lungsim ah bang na ngaihsun a?" cih pen "Hih ciang ka tun zong ka lungdam lua khin mai. Kei pen ka nu in hong dampih nawnlo hi. Tu laitak ka nu in hong mu leh amah nakpi takin nuam ding hiven," ciin a lungsim tawnga ngaihsutna siangtak, ciimtak, hangsan takin hong genkhia a, mipi a kinul lo omlo hi. Hizah a Zolia picing, ngaihsutna cing zahtakhuai kasa hi. A nu in vantung pan hong ensuk dinga, "Bawi aw, ka tanu aw, nak hoih sam ciai maw Bawino. Na nu ka hih hampha angtang ing," ciin lungdam maitai in na laamlaam ding hi.  

Mi nga lak ah a kihel kha, mi thum lak ah zong a kihel nawnlo Zolia khat hunukte in, "Mi thum lak ah hong kiteel loh pen na khasia hiam; bang na ngaihsun?" a cih uh leh (mi tampi in dawng leng amah zah in dawng siam kei ni), "Nak khasiat kei lua ing.Hih ciang ka tun zong nak lungdam khin lua ing,"ci ziau hi. Nak picin hiven. Zomite hizah in i lungsim picingta hi cih ka muh ciang Zomite mailam Upate kammal kawmpak leng "Hin Gim Nam" mahmah hi. A taktak in a khatna ngah nuam vive a kihel hi uh a, mi thum lak ah zong kihel zo nawnlo cih pen khasiat-huai, lungkiathuai peuhmah ding hi. Ahi zongin tuabang a om phial zongin a maisuah ah kilangsak vetlo, a kam tawh genkhia vetlo, kiselzo, ki-imzo, ki-ukzo cih pen PICINNA ahih manin thupi a sa ka hi hi. Kuamah a khatna utlo omlo hihang, kuamah a penpen a utlo hi hang. Ahi zongin Zoliate in a khatna a ngah kei uh leh zong saangsiam, pomsiam uh hi. Pasalte aw, i numeite i etteh kul taveh! [Mai kum cianga Zomi Numei Khawmpi om ma in i gen ut teng gen samsam ni ei, hong lap ma un!]. 

Minam a khangto laitak leh a khangcing nailote in midang lawhcinna khat peuh mu leh HAZA uh hi. ENG lo uh a, HAZA uh hi. Tua bang lungsim Zomi sungah zong na om ngei lua thamtham hi. Ahi zongin tu in  tuate hong om nawnlo ahih manin Zomi hih hong angtanhuai mahmahta hi. 

Zomi hih bangin mainawt zel hen. Zomi, hih bangin Saipi paiin pai zel ni... 

(zop lai ding)
 
 
Hau Za Cin
Phuitong Liim
www.hauzacin.blogspot.com
 


Comments




Leave a Reply