WWW.TUNGZANGNEWS.COM

TUNGZANG NEWS
 
Picture
Khat Thang: Sik-tukilh
Sik-tukilh

Nidang lai in, Billy kici a lungtom, a heh baih lua den tangval no khat om hi. Ni khat, a Pa in sik-tu-kilh thongkuah dim khat le sekpi khat pia in, "Billy aw, na hehsuah sim, na lungtom simin, Inn nungah dai-khuam tungah sik-tu-kilh khat ta va khen in" ci-in sawl hi. Billy in zong sang pah bilbel in, tua ni bekbek in dai-khum tungah sik-tu-kilh 37 bang va khen zen hi. Tua bangin nisim hehsuah sim va pai in sik a khetkhet leh hong lungduai zawdiak thei in, dai-khuam tungah sik-tu-kilh khetna ma hong kivang semsem hi.
 
Billy in ngaihsutna hoih khat hong nei thei in, dai-khuam tung sik ka va khet niloh sangin heh sedah ningin sik khen in om hilhial lel ning hong cithei bilbel ban-ah a sawt na ciang, ni khat bup bang hehsuak lo in hong om zo ta hi. Billy zong lungdam takin a Pa kiangah "Pa aw, nisim in heh hetlo in om zota hing, sik khet kul nawn lo hi" cikawmin a sik-tu-kilh vang pawl khat va piakik hi.
 
A Pa'n zong "Aw hoih ei ka ta, tua ahih leh ni khat tawntung lungtom lo, hehsuak hetlo in na om zawh simin, dai-khuam tungah na khetsa sik-tu-kilhte khatta-in va dokkhiakik oo" ci-in sawl zel hi. Billy in zong kha li khit khawng sik-tu-kilh dokkik hong zo siang in, "Pa aw, dai-khuam tung sik-tu-kilh bangmah om nawn lo hi, tu-in ka lungduai in ka heh nawn kei hi" va ci hi. A Pa in Billy dai-khum gei ah kai in, " hoih ei ka ta, ahizongin, hih dai-khum ni dangin a zol dikdek hi-a, tun-ah na hehsuah sim, lungtom sim-a, na sik khetna ma, na sik dokkikna ma teng hangin dai-khuam pen a vang tawh, a dep tawh, a tekgawp vele! ni dang bangin maap nawn lo, liamma tawh kidim mawk hi, na mu hiam?" "Himah ei Pa aw" ci-in Billy in dawng hi.
 
"Tua mah bangin Billy aw, na hehna khat, na lungtomna khat peuh mi dang, na lawmlegualte tungah tu sakin, va tum kha, va dawt kha, kamsia va gen kha hi le teh hih dai-khuam tungah na sik-tu-kilh khet mah bangin mi dangte in nasa in, liam na, baina tuak dinguh hi. Kisik in na va thuamkik phial hang, dai-khuam tung pan sik-tu-kilh dawtkhiat na ma vang a om mah bangin, mite pumpi, lungsim sungah na hehna ma pen mang thei lo in kilang den ding hi ka ta aw"
 
"Mihingte pen I kimlepam ah kikhawlhpih ding, thulela kikuppih ding, I lungdamna, haksatna, nopna, dahnate I puakpih ding a manpha pen lawm hoihte a hi uh hi. Tua ahih man in ka ta aw, thu khat pepeuh hangin, lungtomin heh pahpah kha kei in, khut khial, khe khial in gamtat sawm peuhmah kei in, kimlepam na lawmlegualte pumpi ahi-a, lungsim ahi zongin, sik-tu-kilh khetna meima tawh a kidim dai-khuam suak sak kha peuhmah kei in. Na lawmlegualte zong tua bangmah in, lungsim kikem siam zo dingin itna lak den a na makaih zawh ding hanciam tawntung in" ci-in thu a hilh hi.
 
Tangthu deihna a telsiam ciat dingin lai-sim mimal kim Pasian in thupha hong pia hen. Lungdam!
By: Khat Thang, USA

 


Comments




Leave a Reply