WWW.TUNGZANGNEWS.COM

TUNGZANG NEWS
 
A Pha Lungkimna

Kumpi Inn sung thu dotpupi le Kumpipa tapa ni khat khual hong zin khawm uh hi. Lui tui lung sialsial khat hong tuak uh-a, lui gei-ah suangpi tung khat-a kikoih puannak kiphop lipliap khat le puanten lui sim aom mu uh ahih manin mi zawng sim tham tui bual-a kisil khat om hi cih thei uh hi.

Kumpipa tapa in, thudotpu kiang ah "Sia aw, hih puante mun khat ah sel sak ni-in, ei hih sawlbawk pang khat ah bu-in, en sim leng! kisil mipa lui nawl hong pai ciang, a puante hong zong keii ding-a tua gal-et le hang nuih zak huai mahmah khat hi ding hi" ci-in kuppih hi. Thu dotpupi in a hih leh, "Kumpi' tapa aw, mi khat dahna, sinkhamna tuak-a aom en-in nuih zak huai sa-a, lungkimna pen mi pil, mi thupite gamtat zia hi lo hi. Na lungkim nop takpi leh hi bangin hih in ci-in;"

Thudotpu in, a ip sung pan kham dangka tang nih la-in, kumpipa tapa kiangah "hih kham dangka tangte tui bualpa puan-ip veiletak sungah tang khat tuak va koih sim in" ci-in sawl hi. Kumpipa tapa in zong a siapa thu mangin dangka tangte va koih sim hi. Tua khit ciangin a nihun sawlbawk pang panin en sim khinkhianuh hi.

A sawt lo-in, mi zawng kisilpa lui sung panin hong pai khia-in a puanten hong teng hi. A puan hong silh leh, a gik pian lillel bang khat om sa a hih manin, a puan ip sung hong sawk leh kham dangka tang hong mu petpet hi. Mi zawng pa zong lamdang sa lua, um zo lo phial a hih manin, dangka tang en phapha, zut zel, a ha tawh bang pet mai phial in, lungdam lua-in kipei keii hi.

A puan angkilhte hong kilh kawmkawmin a ip lang khat hong sawk leuleu leh kham dangka tang khat na om leuleu hi. Mi zawngpa zong lungdamna khitui tawh tua munah hong khukdin-in, "Aw kei hong it-a hong huh, hong siam Pasiante aw, Ka Inn ah cidam lo, lupmun ngak-a om ka Nu nong kepsakna uh ahi hi. An nek ding neih lo ka hih manun tha zawm-a om ka sanggamnu zong tu-in hong gupkhiat sak na hi uh hi" ci-in biakpiakna khat a neih khitteh lungdam takin Inn lam a zuan hi.

Hi bang thu piangteng a en sim khinkhian kumpipa tapa ahih leh a khitui hong tak keuhkeuh ta hi. Thudotpupi ahih leh lungdam maitai in hong om hi. Kumpipa tapa in "Sia aw, tu ni-in ka khantawn ka mangngilh ngei loh ding thu manpha mahmah nong hilh hi" ci-in lungdam a ko hi.

Thudotpupi in zong "Kumpipa tapa aw, mite lungkhamna, buaina khat peuh guan se a, tua tungtawn-a kingah lungkimna sangin, mite lungdamna ding gel sak, hawm sakna pan a hong piang lungkimna pen thumaan thutak lungdam, lungtaina hipan hi. Hi thu ciamteh tawntungin ci-in a khualzinna uh a zom-uh hi.

Hih tangthu in eite bang thu hong hilh cih laisim mimal khat ciat in ngaihsutna nei kim dingin lamen hi hang. Lungdam zel ei!

Khat Thang

 


Comments




Leave a Reply