WWW.TUNGZANGNEWS.COM

TUNGZANG NEWS
 
Aman kiam semsem mihing pumpi

Mihingte I man neihna pen ni khat khit ni khat kiam hanhan hi. Pumpi cilesa hoih semsem man nei semsem cih bang om thei tuan lo hi. Ni dang lai-in mel hoih a minting vangvang actress khat kiphawk thakna angah sak thupiang khat om ngei hi. Nungak mel hoih nu pen alawm ngaih pa tawh hong kitengin kamsiatna tawh asawt lo-in a pasal in sih san ciciat hi.

A mel hoih lau mahmah lai ahih manin, a Ngai tampi om lak ah aminthang actor mel hoih pilna nei banah sumlepai hau khat in hong ten pih tapeuh in ci-in Kham hai (Gold cup) khat tawi in va ngen hi. Nuthawi mel hoih nu in sang zo lo in na nawlh hi. Tangval pa zong lungkia lo in va paikik a, Ngun hai (silver cup) khat tawh tenpih ding va ngen leuleu hi. Nuthawi nu zong kei ka mel hoih mahmah lai hong deih tam ci-in nawlh leuleu hi.

Tangval pa zong lungkia tuan lo-in a thum vei-na sumngo hai (nickel cup) khat va tawiin hong tengpih in va ci-leuleu hi. Nuthawi nu zong tangval pa in a nget masak-lai sang a man nei lo semsem tawh akuan tangval pa hong tawng ngawp hi. Nong pai cil-in Gold cup na ngawn kong san loh bang ding-a, a tawm man semsem in hong kuan na hi hiam? zum thei lo maw? hibang zi nget kua hoh ngah ding na? a cih leh; Tnagval pa in nutawi aw, kei pen pilna nei hing. Na pumpi a man kiam semsem tawh kizui a hong ngen ka hi hi. Nang pen ni khat khit ni khat na teek semsem zaw a, na moi semsem thei kei hi.

Tua ahih teh, kong tawi vante zong a masa sangin, a nunungte in man a neih loh semsem mah bangin nang pumpi zong tua bang mah hipah a cih leh nuthawi nu zong thakhatin a om dan hong kikhel zo phial ci hi. Na kihoih sakna huhau-in na lungsim kiphasak kha-a, thu hoih thupha na ngaihsut khak loh ding, na hoih, na pha nasep khak loh ding kong dahpih hi ci-in tangvalpa in caih san hi.

Tangval pa thugen mah bangin nuthawi nu bek hi lo, eite zong ni khat khit ni khat kiham semsemin, nisim-a I thuak gentheih haksatna, khual-ul nisa kapna, lungkham sinkhamnate in hong zawm sakin pumpi man khiam semsem mihingte I hih lam kiphawk huai sa hihang. I kizat theihna hong kiam semsem ding a, I pil I siamna I mel hoihnate hong kiakia ding hi. Tomkal nuntak sungin lungsim pha tawh kimlepam a etlawm sak I suah zawh na ding ut huai ka sa hi.

Pasian thu-um eite in akisia thei I pumpi Pasian minthanna ding I zat khak leh tawntung I kha nuntakna man khang semsem ding cih lam-etna nei ihih manin Pasian adingin hanciam huai mahmah cih zong behlap nuam hang.
Khat Thang

 


Comments




Leave a Reply