WWW.TUNGZANGNEWS.COM

TUNGZANG NEWS
 
Bawhlung Suih Khit Ciang

 
A ngeina bangin Ninoni nitak bawhlung sui in khuamui, khuazin ciangin ka tawp uh hi. Tualpi kim a meivak te taang zeizai a, tua nuai ah bawhlung leng kimu cian mello in lawmte in a sui zom zel uh hi. Nitak nai 8 dong bang lunglut peuh leng kisui zom thei a, ka suihpih uh Sente leh Malayte in nai 9:30 tan bang sui suak den uh hi. Kei bel ka man sima Lasinna ah kihel dingin ka paikhia masa zel hi. Zan nitak zong lasin dingin ka khawl baih a, ka khedap Adidas Predator suah in ka thungpi sungah guangin ka kaihseng ka bulh hi. Zingsang lama guahzu hangin lei kawt in tualkiak nom lai ahih manin ka sik ciangin tualkiak tunga tuibangte in khe hong kawtsak dakdak a, vot sim hiuhiau hi. A kuakna mun deuh sikkha leng zong buannawi kisik kha ciauciau hi. Phamawhsalo in lasinna ding mun ka zuan suak uh hi. 

Biakinn ah ka tun ciang ka zun suak ahih ciangin tuibuk ah ka lutsuak nuam hi. Biakinn kongcingpa in tuibuk na nawt a, a zo lian ahi hi. Ka lut thei diam cih ka dot khit ciangin 'hithei e' hong ci a, ka lut hi. Ahi zongin a nawtna tui keu nailo in tuibuk sual kawtlai hi. Ka sik ciangin ka kaihseng (phanat) tunga buan bang pawlkhat sual kawt ah kimu thei ahih manin 'den ciang ka nawt kik ding man sum nong piak kul tuak ei' ciin hong ciamnuih hi. Kei zong 'awle, hihen ou' ciin ka ciamnuih kik hi. Ka pusuak ciangin amah tuibuk kongkhak ah na dinglai a, lawmte tawh na kiho ngakngak lai hi. Kei zong 'koi ka sikna munte va nawtsiang ning ei' ciin a sualnawtna puanlom a bul pan manin ka saan sawm leh 'Heih, a taktak in nang hih len dingin kilawmlo hi,' hong ci mawk hi! 'Bang hang in maw?' 'Tuibuk nawtsiangna vante nang let dingin a kilawmlo hi, nang na hihna tawh kituak lo hi, nang dinmun leh kei dinmun kibanglo hi. Nang pen makai hi in kei pen nasem hi ing,' hong ci mawk hi. Dena ka ciamnuih uh pen hong thutak gen mahmah ta a, hong kisuanlah-huai phialta mawk hi. Ko, Zomi ngei ah tua banga a niam a sangzaw cih bang omlo in ka kideidan kei uh hi. Christian sungah zong tua banga a sangzaw a niamzaw cih bang omlo hi, cih koh upna leh koh zuihdan hi ka cih uh hangin. Noh pen makai hi in koh pen nasem ka hi uh hi. Kideidanna a om lian loh hangin kei adingin nang hih bang sualnawt kong sepsak ding kilawmlo hi hong ci zen hi. 

Zomi sungah kideidanna omlo in a lian a neu i kikim hi ciin i zang thei hi. A lungdam huai hi. Zeisu Christ hangin i liangko kikim hi zong i ci thei hi. Gospel khuavak in Zomi sungah liangko kikim a nuntak dan hong zomsuak sak thei hi ciin ka um hi. A pilzaw leh a khangtozaw minam te gamtatdan kizui thei ahih manin a hampha minam hi hang ciin ka ngaihsun hi. Kideidan a kidawlseh lo a i nuntak ciangin i minam sungah kalsuan nuam a, i khuasungah vaihawm nuam in i kipawlna ah nasep nuam hi. A tam sem thei peuh in tam sem in a tawm sem thei in septheih zahzah in i pangkhawm hi. A tuantual leh a dom kulte kidom in a sangzawte kidelh a, a sangzawte in a huai kulte honghuai in, a kisamzawte in a masate khekhap delh in i kalsuan hi. Kideidan hilo in i phakna tan ciat ah i kalsuan khawm  hi. Namtui in nuam hi. Nuntak gim nam hi. 

Ahi zongin khatveivei ciang liangko kikim banga i om laitak a kingeksak, mite in hong 'sepsak leh' cih lunggulhna nei om thei hiam cih khawng ka ngaihsun hi. Lawmte khat in bel tuate pawl pen 'ki sia sak' ci in 'Sia Lungsim, Bu Lungsim' pua ci ziau se hi. Ann tuun nangawn 'hong phelsak in' ci nuam leh kilawm! Nahtang nangawn 'hong khehsak ve' ci hileh kilawm!! Ngabengte ciamnuihna ah, "Nangtang na duhna?" acih leh a lawmin, "Khehsa maw?" ciin dawng hi ci hi. Tua dan lungsim zong a nei omkhak theih, tuah khak theih hi. Ki bu sak, ki sia sak cihna hi ding hi. A bu, a sia te a bu hilo, a sia hilo cihna hilo in mite tungah a kilawmlo zah donga a lamet uh ciang mipi in cimtaak in nopmawhsa uh hi. 

Tuibuk nawtsiang leh makai dinmun banga 'kilawmlo' cih bang zah donga ngaihsutna Zomi sungah i neih lianloh hangin tua zuulzuul a ngaihsutna a pai khat bel khatveivei om thei hi cih i phawk ding hoihsa ing. Tua bang ngaihsutna leh lametna a neite adingin a kilawmlo leh a vallua hi cih theiin mipi in tua tan thupisalo uh hi cih a phawk uh zong hoih hi. 

Tuni internet pan ka simna ah Mars Hill Church, Seattle, USA te in a pastor uh Mark Driscoll tawpsak uh hi cih ka mu kha hi. Hun khat laiin leitunga pawlpi khang hat pen leh pawlpi lawp mahmah leh mite zuat mahmah khat hi. Ahi zongin a kilawm zah vala a gamtatna hangin a pawlpi mite in deih nawnlo in tawpsak a, a pawlpi zong kiphiat hi. Hun nunung ciangin kamsang zuau leh kineih hong piang ding cihte hong phawksak hi. Topa in Ama mite a cidamna dingin mimal khat, biakinn, pawlpi phiat ngam a, zong phiat thei hi. Topa mai ah kiniamkhiat ding leh Ama mai zon ding longal mihingte adingin omlo ahih lam hong musak, phawksak hi. Ka thulu pan pial kha zawzen ing e! Ka simkhak thu in hong phawnglua ahih man hi. Biakna i cih zong mihing a hilo in Pasian a hi cih a kilatna a gen nuam lua hizaw ing. 

Khatveivei lah Zomi sungah kihelzau lua liang in i makaite nangawn zahtak dan kisin hetlo in i meltheih bawl lua liang leuleu hi. Nam dang khat makai leh pu aw, pi aw ci napi Zomi khat makai hileh 'ka theihsa hi, ka muhsa hi, a khua a tui zong ka theih hi' ci hilehang kilawm phial in kithupi bawl, kizahtak bawl kisiamlo hi. Hodan, kholhdan kilawm zong zang thei mello in kipheng om gawp zong a baih mahmah himawk hi. Zomi te khantohna kum za tampi pha nailo i ci kha ding hi, zong himah hi. Ahi zongin midang ahih cianga zahtak bawl khuankhuan in Zomi teekteek ahih cianga lawmbawl lua, meltheihbawl lua, theihsa bawllua cih pen kilekkimlo hi. Midang i hopih zah mah in i Zomi pihte zong i bawl ding a kilawm naciang khat om hi. Ulian hong pai ding ciin khuazang a a dawn uh leh a khuapihpa uh ulian na hi, mi khat in, "Eh! ulian hong pai ding ka sak leh ka khuapihpa uh na hi leltak"  ci hi cih ciamnuih cihtak a kigen kaza ngei hi. Zomi bawk thum sangin namdang san thum khat zahtak bawl nuam zah a mihai khawng zong mihing om theih hi. 

Zomi te kikhangto zaw in kilamto diaidiai hi hang. A khangto a kahto mite gamtat bang hi a, a khantohna uh bang tawh kiteh a, bang tawh kiciamteh, kisit hiam cih i theih tohtoh zong hoih hi. A niamte sep ding tua, a sangte sep ding tua cih bangin khentatsa leh koihsa omlo hi. I Topa Zeisu hong sinsak bang 'kiniamkhiat a mite ading nasem hih ding' hizaw lai hi; kiphatsak nading, kiliatsak nading om vetlo hi. Gamtat kilawm pen a pilna te muh ah zahtak huai a, a haite muh ah etteh huai a, mittawte in zong cim kilkel in mu in bilngongte in zong ciantak in za uh hi. Tua zaha sangto munzang ah Zomi te i kalsuan (nuam)ta hi. Topa in hong huh ding hi. A kilimneih hilo, a kibawltawm hilo, a kithanuamsak tawm hilo a thanuam ngiat, a kithukhualsak hilo a thukhual ngiat, a kipilsaktawm hilo a pil gamtat ngiat, a hoih a thei a agen bek hilo in a hoih a kilawma gamta thei, gamta siam Zomi hikim dingin i biakin Pasian in hong siamta hen. 

Tui buk nawtna ka va lawnkhak bang kisik huai phial tamah leh kei adingin ngaihsutna tampi hong neisak, Zomi te hamphatna leh Zomi te thupha hong simsak thu khat ahih manin ka lungdam veve hi. 

Zomi leh Zogam in mainawt zel hen.  
 
 
Hau Za Cin
Phuitong Liim
www.hauzacin.blogspot.com
 
 


Comments




Leave a Reply