WWW.TUNGZANGNEWS.COM

TUNGZANG NEWS
 
Dollar 20


Sang naupang 40 tang khawng lai hilh Siapa khat in a ip sung pan sum $20 dal khat lakhiain, "tu ni hih $20 no teng lakah khat kong pia ding hi, na deih uh hiam?" a cih leh, sang naupangteng in vekpi un "deih mah!!" ci-in khut lam ngeingai uh hi.

Siapa in zong a khut sung-a $20 dal nuaiton gawp-in, "khaileh, kuan' deih lai?" ci-in a dotkik leh, naupangte in " Ken deih veve!!" ci-in dawng lai uh hi. Tua leh Siapa in $20 sual tungah khiasuk-in a khedap tawh a siksuk khitteh, "A deih lai na aom uh hia tun'h?" ci-in a dot leh sang naupangteng in khutlam in, ken deih lai, kei zong deih lai veve Sia!!" a cih ngei-un ci uh hi.

Siapa in zong "a bang hangin deih teitei na hi vua?" a cih leh, sang naupang khat hong dingto-in, "Sia aw, sum pen a-ma manh neihna khat aom khin-sa hi-a, ton gawpin, nin bang-in, mit muhna ah hoih sensan kei ta leh kizang thei veve hi." ci-in dawngkik hi.

Siapa in zong " Maan mah hi. Sum i cih pen a mannei ahih lam a thei khempeuh in kideih tek hi. Thak sitset tak kei leh, lui-in vul ta leh, tongawp ta leh a ma man neihna a theite in kideihin kikem ciat hi. Tua mah bangin, note zong bangzahta-in zawngin, gilo-in, kihhuai phial-in, pawl khat bang khut kim, khe kim nei lo phial na hih uh hang' mannei hong sate in hong it, hong deih veve dinguh hi. Na NulePa, lawmlegualte in note mannei hong sak laitenguh hih $20 tongawp-in, sikgawp ta leng na deih veve bangmah-un hong it, hong deih dinguh hi" ci-in thu hilh hi.

Ka tuah khak thu khat, April 2013 in ka Pa cidam lo veh ding ka ciah lai, Yangon Airport pan pusuakin zattawm ding $1000 ka khek leh sumkhek bank nasemte in ka $ a thakte bek deihin a lui pian teng hong piakik zen uh hi. Ka lungsim hong nopmawh sak zo phial uh a, i gen hang khua za thei lo banguh ahih manin, kei zong kei le kei ka muhna laihin "Aw lawmte in $ pen sum dan-a, ngaihsun lo uh a, van danin ngaihsun kha uh ahi ve maw" ci-in a thak ka neih teng ka khek hi. A tatakin sum pen van hi lo-in, van lei-na ding-a, kibawl hi-in aman neihna a sum tungah number a kikhen-sa ahi hi.

Nute in tate a manphatna tel uh ahih manin bang zahta-in gina lo hi ta leng hong it veve uh hi. Nute sangin, Pasian in mihingte ama limlemel sunin hong bawl ahih banah nuntakna huu hong muap ahih manin mannei hong sa sem lai hi. "Nupi in a nawi zu apiak a ta mangngilh ding hi, ahi zongin ken note kong mangngilh kei ding hi" ci-zen hi.

Ei leitung mihingte, bangzah takin gina lo, tatsia-in, lungsim siangtho lo, it bang lopi i hih phial hang mannei hong sa tawntung Pasian in ahih leh leitungah mi bangin hong piangin, eite tawntung nuntakna dingin sihna thuakin hong tankhia zen hi. Pasian in hong it-in hong deih den hi. Pasian in eite zong a-ma itna bang nei ding, mi deidan lo-in, mihing khempeuh a kikim-a, mannei ahih lam i tel dingin hong deih ahih lam zong phawk ding hi hang. Eite mannei hong-sa Pasian i it theihkik leh mi hampha penpente i hi ding hi.

Khat Thang

 


Comments




Leave a Reply