WWW.TUNGZANGNEWS.COM

TUNGZANG NEWS
 


Kei le Ka Boss-pa


Ka thazangin, ka maitai den hi. Ka lungsim lawpna le lemetna tawh kidim hi. Bang hang hiam cih leh nuntak hamsatna Kawlgam panin mi tampite utna mun USA gam tungin nasep kipan thei ding hi ta ka hih man ahi hi.

Nasep nopsa le lawpna tawh nisim mapangden ka hih manin ka Managerte in hong it thei mahmah uh hi. Nasep a tam hun ciangin overtime sep ding zong ka thasial ngei kei hi. Ni le khate hong paipai-in, ka kimlepam naseppih khempeuh tawh ka ki-it uh a, unau bangin ka kikhawl thei uh hi.

Zingsang khat alarm ging valval ahih manin nasep kuan ding kithawi saisai-in, zekai ding patauhna tawh ka tai vingveng hi. Ni dangin alarm gin main khanglo lianlian hi napi ing, a zan nitakin ka lawm ngaihnu in "Sian gawm loh hi mai ni, gi bang I khen kul ding hi, kei singdang anglai khat na zuan ta ning" hong ci ahih manin a thu, a la om lopi hibang thu ka zak manin zan thapai ihmu lo ka hih man ahi hi.

Tua ni tawntung, ka nasepna-ah maitai zo lo-in, ka khitui bang luang zel kha hi. Ka lawmte hong muh ding ut lo lua ka hih manin, dailen buk peuhah pai-in ka kidik vatvat kha liang hi. Ka mai phiatin nasep ka zom teitei hi. Ka mai puak hong en gige ka manager pa in, "Mr. Thang aw, tu ni lunch va nekhawm ni" ci-in hong zawn ciciat hi. Nial nuam lo ka hih manin, ut lopipi, sun-an ka ne khawmuh hi. An nek khit ciangin, ka manager pa in, "tu ni na maitai zo lo ahi ciangin ka lungnop lo hi, bang tuak na hi tam, kong dong thei dia?" hong cipetpet mawk hi. Kei zongin ka kuppih ding dang om tuan lo ahih manin, ka lawmngaihnu tawh a zan nitak ka kihona, zan ka ihmut theih lohna teng ka gen hi. Ka manager pa in tua ahih leh zingciang ni khat na tawlnga hithiat in, hong ci vat hi. Kei zong poi kei ee, boss aw, ka cih nop hangin ka nasep lut cil lai-a, nasepna sungah maitai den ding, customerte maitai takin hopih ding a deih ka manager pa thu gen phawk ka hih manin, aw! ka ci ta hi.

A thai ciangin nasep ka kuankik hi. Tua ni pen, ka nasepna uh mei kisia-in, computerte down ahih manin nasep tampitak kiphelh hi. Ka company uh kumpi lampanin inspection semte hong lut sawnsawn hi. Ka manager pa lungtomin, maitai zo peuhmah lo-in, hong awtol bangbang keii hi. Nitak Inn ciah ding hun ciangin ka pusuah leh mawtaw parking ah manager pa a mawtaw sia in na bawl niloh ka tuak hi. A gei ka va neih a, "kong huh theih ding aom hiam?" ka cih hang, "piang thei ken teh tu zan ka mawtaw hiah nusia mai ning, ka Inn ah nong kha thei diam Mr. Thang?" hong ci-in, kei zong "kingah lua ei Boss!" ka ci hi.

Caih ma-in ka boss pa tawh sai sung ka va lutkik pakuh a, ka boss pa-in a zumkha sung a, singkuang khat hong hongin van khat a koih bang khatin ka mu hi. Ahi zongin a khutah na khat peuh a tawi ka muh sak kei hi. Sai khakin Inn ka ciah uh hi. Ka boss pa Inn ka tunguh ciangin Inn sungah tawmvei ka zui suk hi. A zi-le-tate in "Pa hong tungta ci-in kawiin, nam keii uh hi, ka boss pa zong maitai-in, a zi, a tate hopihin lungnop mai mahmah mawk hi. Ka ciah khiat ciangin ka Boss pa in ka mawtaw gei dong hong kha-in, "Boss aw, tu ni I nasepna ah lawh cing het lo hang-a, na mawtaw bang sia sawnsawn a, Inn na tun teh bangci bangin na maitai in hi ci om thei mawk na hiam?" ci-in ka dong hi.

Ka boss pa in zong, "I ciah ma-in zum khansungah singkuang sung-a ka van koihna mu hiam?" hong ci hi. "Mu mah ing, ahih hang bang hiam thei keng?" ka cih leh tua pen, "tu ni tawntung a, I tuahsiatna, I ma kipelhnate leh ka hehsuahnate ka Inn ah pua nuam lo ka hih manin zumkha singkuang sungah a nusia ka hi hi. Tua teng pen zingteh a hoih zaw dingin ka bawlkik ding ahi hi." hong ci mawk hi.

Kei zong tua ni-a kipanin matai takin nisim ka nasepna nuam sa-in, ka mapang den thei ta hi. Bang hang hiam cih leh ka Inn ah sing kuang nih tak nei ka hih man ahi hi. Singkuang khat pen lawmnu tawh ka lemlohna singkung hi a, a dang khat pen ahih leh Inn lam Nu le Pa, sanggam ulenaute vai taumtaumte singkuang ahi hi. Tu in, tua ka lawmngaihnu tung a, na kasakna singkuang pen tuipi sungah ka paiikhia zo ta hi. Lungdam.

Khat Thang

-- 

 


Comments




Leave a Reply